យោងតាមការវិភាគដែលបានចេញនៅថ្ងៃព្រហស្បតិ៍នេះ ដោយគម្រោងតាមដានរបស់ក្រុមឃ្លាំមើលព្រៃសកលលោក បង្ហាញថា ការបាត់បង់ព្រៃត្រូពិក បានធ្លាក់ចុះកាលពីឆ្នាំមុន ប៉ុន្តែសូចនាករផ្សេងទៀត បង្ហាញថា ដីព្រៃរបស់ពិភពលោកនៅតែស្ថិតក្រោមសំពាធខ្លាំងដដែល ។

 ការបាត់បង់ព្រៃសំខាន់នៅតំបន់ត្រូពិក បានធ្លាក់ចុះ ៩ភាគរយកាលពីឆ្នាំមុន នេះបើធៀបនឹងកាលពីឆ្នាំ ២០២២ ប៉ុន្តែក្រុមអ្នកស្រាវជ្រាវរបស់ក្រុមឃ្លាំមើលព្រៃសកលលោក និយាយថា ការបំផ្លិចបំផ្លាញនៅតែបន្តស្ថិតក្នុងកម្រិតខ្ពស់ខ្លាំងដដែល ។

 កាលពីឆ្នាំមុន ពិភពលោក បានបាត់បង់ព្រៃតូ្រពិកចំនួន ៣៧.០០០គ.មក្រឡា គឺជាផ្ទៃដីដែលមានទំហំធំប៉ុនប្រទេសស្វីស ឬធំជាងរដ្ឋ Maryland របស់សហរដ្ឋអាមេរិក ។

 អ្នកស្រី Mikaela Weisse គឺជាប្រធានក្រុមឃ្លាំមើលព្រៃសកលលោក និយាយប្រាប់សន្និសីទសារព័ត៌មានថា ការធ្លាក់ចុះការបាត់បង់ព្រៃនៅប្រទេសប្រេស៊ីល និងប្រទេសកូឡុំប៊ី ត្រូវបានទូទាត់ភាគច្រើនជាមួយការបាត់បង់ព្រៃខ្លាំងនៅកន្លែងផ្សេងទៀត ។

 អ្នកស្រី Weisse បន្តថា ប្រេស៊ីល សាធារណរដ្ឋប្រជាធិបតេយ្យកុងហ្គោ និងបូលីវី ឈរនៅលំដាប់កំពូលតារាងជាប្រទេសត្រូពិកមានការបាត់បង់ព្រៃច្រើនបំផុត ។

 អ្នកស្រីថា ទោះបីជាយ៉ាងណាក៏ដោយ ការបំផ្លិចបំផ្លាញព្រៃឈើនៅប្រទេសប្រេស៊ីល បានធ្លាក់ចុះ ៣៦ភាគរយ ស្របពេលដែលលោកប្រធានាធិបតី Luiz Inacio Lula da Silva បន្តគោលនយោបាយអភិរក្សព្រៃឈើ ជាពិសេសនៅព្រៃជប់ភ្លៀងអាម៉ាហ្សូន ។

 អ្នកស្រី Weisse កត់សំគាល់ឃើញថា ប្រទេសជិតខាងកូឡុំប៊ី បានមើលឃើញការបាត់បង់ព្រៃឈើធ្លាក់ចុះ ៤៩ភាគរយ ។ លោកប្រធានាធិបតី Gustavo Petro បានធ្វើឲ្យការអភិរក្សបរិស្ថានក្លាយជាផ្នែកដ៏សំខាន់មួយនៃដំណើរការស្វែងរកសន្តិភាពជាមួយក្រុមប្រដាប់អាវុធ រស់នៅតំបន់ព្រៃស្តុក ៕