អ្នកនាំពាក្យក្រសួងការបរទេសរុស្ស៊ីអ្នកស្រី Maria Zakharova បាននិយាយកាលពីថ្ងៃពុធថា ប្រទេស  រុស្ស៊ី បានចាត់ទុកការសម្រេចចិត្តរបស់កូរ៉េខាងត្បូងក្នុងការដាក់ទណ្ឌកម្មប្រឆាំងនឹងបុគ្គល និងអង្គភាពរបស់រុស្ស៊ីថា ជាសកម្មភាពបង្កអរិភាព ហើយនឹងឆ្លើយតប ក្នុងពេលសមស្រប។

កូរ៉េខាងត្បូង បានដាក់ទណ្ឌកម្មលើកនាវារុស្ស៊ីពីរគ្រឿងដែលខ្លួននិយាយថា បានដឹកទំនិញយោធាទៅកាន់កូរ៉េខាងជើង។ ទីក្រុងសេអ៊ូល បាននិយាយកាលពីថ្ងៃអង្គារថា ខ្លួនក៏បានដាក់ទណ្ឌកម្មលើអង្គការរុស្ស៊ីពីរ និងពលរដ្ឋរុស្ស៊ីពីររូប ដែលជាប់ពាក់ព័ន្ធទៅនឹងកម្មវិធីនុយក្លេអ៊ែរ និងមីស៊ីលរបស់ទីក្រុងព្យុងយ៉ាង។

អ្នកស្រី Zakharova បានប្រាប់អ្នកយកព័ត៌មាននៅក្នុងសន្និសីទប្រចាំសប្តាហ៍របស់ខ្លួនថា៖«នេះគឺជាទង្វើអមិត្តរបស់ទីក្រុងសេអ៊ូល ហើយជារឿងគួរឲ្យសោកស្តាយយ៉ាងខ្លាំង។ ការដាក់ទណ្ឌកម្មខុសច្បាប់ នឹងជះឥទ្ធិពលអវិជ្ជមានដល់ទំនាក់ទំនងជាមួយរុស្ស៊ី» ។

អ្នកស្រី បានបន្ថែមថា៖«រុស្ស៊ីកំពុងបង្កើតទំនាក់ទំនងអ្នកជិតខាងល្អជាមួយកូរ៉េខាងជើងជាមិត្ត ស្របតាមបទដ្ឋាននៃច្បាប់អន្តរជាតិ ដោយមិនប៉ះពាល់ដល់សន្តិសុខជាតិរបស់(កូរ៉េខាងត្បូង)»។

ទំនាក់ទំនងរវាងទីក្រុងមូស្គូ និងទីក្រុងព្យុងយ៉ាង ត្រូវបានពង្រឹង បន្ទាប់ពីមេដឹកនាំកូរ៉េខាងជើងលោក គីម ជុងអ៊ុន បំពេញទស្សនកិច្ច នៅចុងខាងកើតនៃប្រទេសរុស្ស៊ី កាលពីឆ្នាំមុន។

កាលពីសប្តាហ៍មុន ប្រទេសរុស្ស៊ី បានវេតូការបន្តប្រចាំឆ្នាំរបស់ក្រុមអ្នកជំនាញដែលតាមដានការអនុវត្តទណ្ឌកម្មរបស់អង្គការសហប្រជាជាតិប្រឆាំងនឹងកូរ៉េខាងជើង ជុំវិញកម្មវិធីអាវុធនុយក្លេអ៊ែរ និងមីស៊ីល   បាលិស្ទិករបស់ខ្លួន។

សហរដ្ឋអាមេរិក បានចោទកូរ៉េខាងជើងថា បានបញ្ជូនសព្វាវុធទៅឲ្យរុស្ស៊ីសម្រាប់ប្រើក្នុងសង្គ្រាមនៅអ៊ុយក្រែន។ ទាំងក្រុងមូស្គូ និងក្រុងព្យុងយ៉ាង បានបដិសេធការចោទប្រកាន់នេះ ប៉ុន្តែបានប្តេជ្ញាកាលពីឆ្នាំមុនថា នឹងធ្វើឲ្យទំនាក់ទំនងយោធាកាន់តែស៊ីជម្រៅឡើង។