រដ្ឋមន្រ្តីការបរទេសសហរដ្ឋអាមេរិកលោក Antony Blinken បានចុះហត្ថលេខាលើអនុស្សរណៈយោគយល់(MoU)ជាមួយហ្វាំងឡង់ដែលជាសមាជិកថ្មីបំផុតរបស់អង្គការណាតូ ដើម្បីប្រយុទ្ធប្រឆាំងនឹងព័ត៌មានមិនពិត អំឡុងជំនួបក្រុមរដ្ឋមន្រ្តីសម្ព័ន្ធមិត្តយោធាមួយនេះ ក្នុងទីក្រុងព្រុចសែល ប្រទេសបែលហ្ស៊ិកនាថ្ងៃព្រហស្បតិ៍នេះ ។

 រដ្ឋមន្រ្តីការបរទេសហ្វាំងឡង់លោកស្រី Elina Valtonen និយាយថា MoU គឺសំខាន់ខ្លាំងណាស់ ក្នុងការប្រយុទ្ធប្រឆាំងនឹងឧបាយកលព័ត៌មានរដ្ឋ ។

 លោក Blinken និយាយដែរថា វាគឺជាការបញ្ជាក់ឡើងវិញពីការយល់ដឹងរួមគ្នារបស់ប្រទេសទាំង ២លើការប្រយុទ្ធប្រឆាំងឧបាយកលព័ត៌មាន ដែលលោកនិយាយថា គឺជាការប្រឈមថ្មីនៃពេលវេលារបស់ពួកយើង ។

 គួរឲ្យដឹងថា ហ្វាំងឡង់ បានចូលរួមជាមួយអង្គការណាតូកាលពីខែមេសា ឆ្នាំ ២០២៣ ដើម្បីឆ្លើយតបដោយផ្ទាល់ចំពោះការវាយលុករបស់រុស្ស៊ីលើអ៊ុយក្រែន ហើយពួកគេកំពុងមានវត្តមាននៅទីក្រុងព្រុចសែល សម្រាប់ខួបលើកទី ៧៥នៃការបង្កើតសម្ព័ន្ធមិត្តយោធាមួយនេះ ។

 នៅថ្ងៃទី ២នៃជំនួបនាថ្ងៃព្រហស្បតិ៍នេះ ក្រុមរដ្ឋមន្រ្តី បានប្រារព្ធការចុះហត្ថលេខានៅទីក្រុងវ៉ាស៊ីងតោនកាលពីថ្ងៃទី ៤ ខែមេសា ឆ្នាំ ១៩៤៩ លើសន្ធិសញ្ញាអាត្លង់ទិកខាងជើងដែលបានបង្កើតសម្ព័ន្ធយោធា និងនយោបាយឆ្លងអាត្លង់ទិកមួយនេះ ៕