កិច្ចខិតខំប្រឹងប្រែងស្វែងរក និងជួយសង្គ្រោះ នៅតែមានបន្ត នៅកោះតៃវ៉ាន់ បន្ទាប់ពីគ្រោះរញ្ជួយដី កាលពីថ្ងៃពុធ (ទី៣ ខែមេសា)។ ហើយឥឡូវនេះ អាជ្ញាធរបានឲ្យដឹងថា មនុស្សយ៉ាងហោចណាស់ ១០នាក់ត្រូវបានបញ្ជាក់ថា បានស្លាប់ ជាង ១.០០០នាក់ រងរបួស និង ៣៨នាក់ កំពុងបាត់ខ្លួន។

នាព្រឹកថ្ងៃព្រហស្បតិ៍នេះ មនុស្សម្នាបាននាំគ្នារង់ចាំនៅឯស្ថានីយ ក្នុងភូមិមួយ នៅតំបន់ Hualien ដែលរងគ្រោះខ្លាំង ជិតនឹងចំណុចកណ្តាលនៃការរញ្ជួយដីនេះ។ មនុស្សជាច្រើនដែលបានជាប់គាំងដោយការរញ្ជួយដីបានព្យាយាមឲ្យទាន់រថភ្លើងខ្សែដំបូង។ ស្ត្រីម្នាក់បាននិយាយថា៖ «ខ្ញុំកំពុងធ្វើដំណើរទៅធ្វើការនៅថ្ងៃពុធ ពេលមានការរញ្ជួយដីនោះ។ សេវារថភ្លើងត្រូវបានបញ្ឈប់ ហើយផ្លូវត្រូវបានកាត់ផ្តាច់ ដែលធ្វើឲ្យមិនអាចត្រឡប់ទៅផ្ទះវិញបាន»។

ចំណែកបុរសម្នាក់បាននិយាយថា៖ «ខ្ញុំបានរស់នៅទីនេះជាង ៥០ឆ្នាំមកហើយ ហើយមិនដែលជួបប្រទះការរញ្ជួយដីខ្លាំងបែបនេះពីមុនមកទេ។ ខ្ញុំចង់ត្រឡប់ទៅផ្ទះវិញភ្លាមៗ ព្រោះរំញ័រនៅតែបន្តកើតមាន កាលពីយប់មិញ និងព្រឹកនេះ»។

គួរបញ្ជាក់ថា មន្ត្រីឧតុនិយមកោះតៃវ៉ាន់ បាននិយាយថា គ្រោះរញ្ជួយដីកម្រិត ៧.២រ៉ិចទ័រ បានវាយប្រហារឆ្នេរសមុទ្រ Hualien កាលពីព្រឹកថ្ងៃពុធ។ ការរញ្ជួយដ៏ខ្លាំងក៏បានកើតមានពាសពេញកោះតៃវ៉ាន់ ក្នុងនោះរួមទាំងទីក្រុងតៃប៉ិ និងញូវតៃប៉ិ (New Taipei) ផងដែរ៕