ប្រធានាធិបតីបារាំង លោក Emmanuel Macron នៅថ្ងៃព្រហស្បតិ៍ (ទី៤ ខែមេសា) នេះ បាននិយាយថា លោកមិនមានការសង្ស័យនោះឡើយដែលថា រុស្ស៊ីនឹងព្យាយាមកំណត់គោលដៅព្រឹត្តិការណ៍កីឡាអូឡាំពិក នៅទីក្រុងប៉ារីស នារដូវក្តៅនេះ។

ក្នុងការឆ្លើយតបទៅនឹងសំណួររបស់អ្នកសារព័ត៌មានអំពីថា តើលោកគិតថា រុស្ស៊ីនឹងព្យាយាមកំណត់គោលដៅលើព្រឹត្តិការណ៍កីឡាអូឡាំពិកដែរ ឬទេ លោក Macron បាននិយាយថា៖ «ខ្ញុំមិនមានការសង្ស័យអ្វីទាំងអស់ ក្នុងនោះរួមទាំងនៅក្នុងលក្ខខណ្ឌនៃព័ត៌មាននេះផងដែរ»។

ការអត្ថាធិប្បាយរបស់លោក Macron បែបនេះ ដែលត្រូវបានធ្វើឡើងនៅឯព្រឹត្តិការណ៍សម្ពោធមជ្ឈមណ្ឌលកីឡាអូឡាំពិកថ្មី នាទីក្រុងប៉ារីស តំណាងឲ្យការទទួលស្គាល់យ៉ាងច្បាស់លាស់បំផុតរបស់លោក រហូតមកដល់ពេលនេះនៃការគំរាមកំហែងពីបរទេស ចំពោះសន្តិសុខ ឬការដំណើរការដោយរលូននៃការប្រកួតប្រជែង ក្នុងព្រឹត្តិការណ៍កីឡាដ៏ធំរបស់ពិភពលោកនេះ។

គួរបញ្ជាក់ថា ទំនាក់ទំនង រវាងរុស្ស៊ី និង IOC (គណៈកម្មាធិការអូឡាំពិកអន្តរជាតិ) មានសភាពកាន់តែអាក្រក់ទៅៗ ក្នុងរយៈពេលនៅមុនព្រឹត្តិការណ៍កីឡា នៅក្រុងប៉ារីស (Paris Games) ដែលត្រូវចាប់ផ្តើមនៅថ្ងៃទី២៦ ខែកក្កដា ពោលគឺជាការប្រកួតប្រជែងកីឡា ដែលអត្តពលិករបស់រុស្ស៊ី និងបេឡារុស នឹងចូលរួមក្នុងលក្ខខណ្ឌអព្យាក្រឹត្យ ដោយគ្មានទង់ជាតិ និងភ្លេងជាតិ ហើយមិនត្រូវបានឲ្យចូលរួមក្នុងក្បួនដង្ហែបើកកម្មវិធីនោះឡើយ។

ដំបូងឡើយ ពួកគេត្រូវបានហាមប្រាមមិនឲ្យចូលរួមក្នុងការប្រកួតអន្តរជាតិនានា បន្ទាប់ពីការលុកលុយរបស់រុស្ស៊ី កាលពីខែកុម្ភៈ ឆ្នាំ២០២២ លើអ៊ុយក្រែន ដែលទីក្រុងមូស្គូហៅថា ជា «ប្រតិបត្តិការយោធាពិសេស»៕