ក្នុងរយៈពេល ៣ខែ ដើមឆ្នាំ២០២៤ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងថ្មី និង​គម្រោង​ពង្រីកផលិតកម្មចំនួន ១០៦គម្រោង ដែលមានទុនវិនិយោគសរុបប្រមាណ ២,២​ពាន់​លានដុល្លារអាម៉េរិក និងអាចបង្កើតការងារបានជាង ១០៧ពាន់កន្លែង។

ក្រុមប្រឹក្សាអភិវឌ្ឍន៍កម្ពុជា នៅក្នុងសេចក្តីប្រកាសព័ត៌មាន ចុះថ្ងៃទី៥ ខែមេសានេះ បានរៀប​រាប់ថា គម្រោងវិនិយោគដែលមានទីតាំងស្ថិតនៅក្រៅតំបន់សេដ្ឋកិច្ចពិសេសមានចំនួន ៧៣​គម្រោង ក្នុងនោះមានគម្រោងពង្រីកផលិតកម្មចំនួន ៣គម្រោង ដោយឡែក​គម្រោង​វិនិយោគ​ដែល​មាន​ទីតាំងស្ថិតនៅក្នុងតំបន់សេដ្ឋកិច្ចពិសេសមានចំនួន ៣៣គម្រោង ក្នុងនោះ មាន​គម្រោង​ពង្រីក​ផលិតកម្មចំនួន ៣គម្រោង។ ជារួមក្នុងត្រីមាសទី១ ឆ្នាំ២០២៤នេះ ការអនុម័តគម្រោង វិនិយោគ​មានការកើនឡើងចំនួន ៦៧គម្រោង ខណៈទុន​វិនិយោគ​មា​ន​ការ​កើន​ឡើង​គួរ​ឱ្យ​កត់​សម្គាល់​ប្រមាណជិត ២ពាន់លានដុល្លារអាម៉េរិក ស្មើនឹងប្រមាណ ៦៤៩% ធៀបនឹងរយៈពេល​ដូចគ្នា​នៅ​ឆ្នាំ២០២៣។

ប្រភពដដែល បានបន្តទៀតថា ការកើនឡើងយ៉ាងគំហុកនេះ គឺដោយសារវត្តមាន​នៃ​គម្រោង​ថ្មី​នៅ​ក្នុង​វិស័យហេដ្ឋារចនាសម្ព័ន្ធ, វិស័យឧស្សាហកម្ម, វិស័យទេសចរណ៍, និងគម្រោង​ពង្រីក​ផលិតកម្ម​នៃ​វិស័យឧស្សាហកម្មនៅក្នុងតំបន់សេដ្ឋកិច្ចពិសេស។

បើតាមក្រុមប្រឹក្សាអភិវឌ្ឍន៍កម្ពុជា គម្រោងពង្រីក​ផលិតកម្ម​របស់​គម្រោង​វិនិយោគ​ផលិត​សំបក​កង់​រថយន្ត ដែលមានទីតាំងនៅតំបន់សេដ្ឋកិច្ចពិសេស ឈីលូ ជាន ពុ ចាយ នៅខេត្តស្វាយរៀង ក្នុង​ទុន​វិនិយោគបន្ថែមប្រមាណ ២១២លានដុល្លារអាម៉េរិក និងអាច​បង្កើត​ការងារ​បន្ថែម​បាន​ចំនួន​ ៦៥៥កន្លែង។

សូមបញ្ជាក់ជូនថា ក្នុងត្រីមាសទី១ ឆ្នាំ២០២៤នេះ ការវិនិយោគក្នុង​ស្រុកឈរ​នៅ​លំដាប់​លេខ​រៀងទី​១ រីឯការវិនិយោគមកពីប្រទេសចិន ស្ថិតនៅលំដាប់លេខរៀងទី២ ដោយបាន​រួម​ចំណែក​ប្រមាណ​ជាង ៩៣% នៃការវិនិយោគសរុប៕ អត្ថបទ៖ ឈិត បូរ៉ាវី