សៀមរាប៖ មន្រ្ដីស៊ីម៉ាក់ និងគណៈប្រតិភូអ៊ុយក្រែនដឹកនាំដោយអនុរដ្ឋមន្រ្តីក្រសួងមហាផ្ទៃ​ប្រទេស​​អ៊ុយក្រែន ឯកឧត្តម Bogdan Drapiatyi អមដំណើរដោយមន្ត្រីជាន់ខ្ពស់មកពី​ក្រសួង​សេដ្ឋកិច្ច និងតំណាងអង្គភាព ផ្តល់សេវាកម្មរដ្ឋ ក្នុងគ្រាអាសន្នសម្រាប់ប្រទេសអ៊ុយក្រែន (SESU) រួមជាមួយ មន្រ្តីជាន់ខ្ពស់មកពីទីភ្នាក់ងារសហប្រតិបត្តិការអន្តរជាតិជប៉ុន (JICA) នៅថ្ងៃទី៥ ខែមេសា ឆ្នំា២០២៤ បានអញ្ជើញទៅ​ទស្សនកិច្ចស្វែងយល់ពីប្រតិបត្តិការ​បោស​សម្អាត​មីននៅចម្ការមីន ស្ថិតនៅនៅភូមិស្នាសង្គ្រាម ឃុំបល្ល័ង្គ ស្រុកប្រាសាទបាគង (បច្ចុប្បន្នក្រុងតេជោសែនរុនតាឯក)។

សកម្មភាពដែលគណៈប្រតិភូបានទស្សនាដោយផ្ទាល់នោះរួមមានការបោសសម្អាតមីនដោយមនុស្ស ការបោស​សម្អាតដោយសុនខហិតមីន និងការបោសសម្អាតដោយគ្រឿងចក្រជាដើម។ បន្ទាប់​ពីការ​ទស្សនាចម្ការមីនហើយ គណៈប្រតិភូក៏បន្តដំណើរទស្សនកិច្ច នៅសារមន្ទីរតេជោ​សន្តិភាព​ស្ថិតនៅឃុំត្រពាំងធំ ស្រុកប្រាសាទបាគង ដែលដឹកនាំដោយ ឯកឧត្តម អ៊ុំ ភូមិរ៉ូ អគ្គនាយករង​ស៊ីម៉ាក់។

គួររំលឹកថា គោលបំណងនៃដំណើរទស្សនកិច្ចរបស់គណៈប្រតិភូអ៊ុយក្រែនមកកម្ពុជា គឺដើម្បី​ស្វែងយល់​អំពីយុទ្ធសាស្ត្រស្តីពីសកម្មភាពមីនមនុស្សធម៌នៅកម្ពុជា និងដើម្បីស្វែងយល់ពីប្រតិបត្តិការបោសសម្អាតមីននៅកម្ពុជា ពិសេសប្រតិបត្តិការ​ដោយការ​ប្រើប្រាស់​គ្រឿងចក្របោសសម្អាតមីនជប៉ុន និងឧបករណ៍រាវរកមីន ដែលនឹងផ្តល់ជូន​ដល់​អ៊ុយក្រែន ដោយមានការគាំទ្រពីរដ្ឋាភិបាលជប៉ុន៕