ស៊ីហ្គេម៖ បុគ្គលិក និងកម្មករ-កម្មការិនីសាងសង់ភូមិកីឡា នៅពហុកីឡដ្ឋានជាតិមរតកតេជោចំនួន ៦៤៩នាក់ទៀតហើយបានទទួលវ៉ាក់សាំងការពារជំងឺកូវីដ-១៩ ដែលរៀបចំដោយគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) សហការជាមួយក្រសួងការពារជាតិនៅព្រឹកថ្ងៃទី២២ ខែកក្កដា ឆ្នាំ២០២១។
មន្ដ្រីគណៈកម្មាធិការជាតិ CAMSOC បានឲ្យដឹងថា នេះគឺជាលើកទី២ ហើយដែលបុគ្គលិក និងកម្មករ-កម្មការិនីនៅពហុកីឡដ្ឋានជាតិមរតកតេជោ បានទទួលការចាក់វ៉ាក់សាំង ហើយជាលើកទី៥ ផងដែរដែល CAMSOC និងក្រុមការងារវ៉ាក់សាំងនៃក្រសួងការពារជាតិ បានរៀបចំយុទ្ធនាការចាក់វ៉ាក់សាំងនេះឡើង ខណៈ ៣លើកដំបូងគឺចាក់ជូនថ្នាក់ដឹកនាំ មន្ដ្រី គ្រូបង្វឹក កីឡាករ-កីឡាការិនី និងសហព័ន្ធកីឡាជាតិនៅមន្ទីរពេទ្យព្រះកេតុមាលា ដែលសរុបចាក់ទាំង ៥លើកនេះមានចំនួន ២,៣៤៧នាក់មកហើយ។ តាមការបញ្ជាក់ដដែលបន្ដថា តាមផែនការនេះទំនងមិនមែនជាការចាក់លើកចុងក្រោយ ក្រោមកិច្ចសហការរវាង CAMSOC និងក្រុមការងារវ៉ាក់សាំងនៃក្រសួងការពារជាតិ ព្រោះតាមគោលការណ៍ CAMSOC ក៏ដូចជាសហព័ន្ធកីឡាជាតិនឹងចាក់បន្ដទៀត ពិសេសម្រាប់ក្រុមកីឡាករ-កីឡាការិនីដែលត្រូវប្រកួត និងចេញទៅហាត់នៅចិនតែមានអាយុក្រោម ១៨ឆ្នាំ។
ប៉ុន្តែផែនការនេះគឺរង់ចាំការសម្រេច និងជូនដំណឹងរបស់រាជរដ្ឋាភិបាល ក៏ដូចជាក្រសួងសុខាភិបាលថា តើអាចចាក់ជូនប្រជាពលរដ្ឋអាយុក្រោម ១៨ឆ្នាំ ឬអាយុ ១២ឆ្នាំឡើងនៅពេលណា? បើសិនទទួលបានការអនុញ្ញាតនេះ CAMSOC នឹងបន្ដរៀបចំការចាក់វ៉ាក់សាំងបន្ដទៀត។ យ៉ាងណាមិញក្រឡេកមកចាប់អារម្មណ៍ការវ៉ាក់សាំងដល់បុគ្គលិក និងកម្មករ-កម្មការិនីនៅពហុកីឡដ្ឋានជាតិមរតកតេជោ ផ្នែកលើបទពិសោធន៍លើកទី១ នៃការចាក់ដល់បុគ្គលិក និងកម្មករ-កម្មការិនីសាងសង់កីឡដ្ឋានធំនៃសំណង់ប្រវត្តិសាស្ត្រនេះ បានពន្លឿនឲ្យការសាងសង់មានដំណើរការកាន់តែល្អប្រសើរ។ ដូច្នេះតាមរយៈការចាក់ជូនបុគ្គលិក និងកម្មករ-កម្មការិនីសាងសង់ភូមិកីឡាថ្ងៃនេះដែរ ក៏នឹងផ្ដល់នូវភាពកក់ក្ដៅ និងជំរុញឲ្យការសាងសង់សម្រេចតាមផែនការដើម្បីទទួលស្វាគមន៍ប្រតិភូ និងអត្តពលិកដែលត្រៀមចូលរួមព្រឹត្តិការណ៍ប្រវត្តិសាស្ត្រលើកដំបូងនៅកម្ពុជា គឺការប្រកួតកីឡាស៊ីហ្គេម-អាស៊ានប៉ារ៉ាហ្គេមឆ្នាំ២០២៣ ផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
