សហរដ្ឋអាមេរិក កំពុងពិនិត្យមើលរបាយការណ៍ប្រព័ន្ធផ្សព្វផ្សាយ ដែលថាយោធាអ៊ីស្រាអែល បាននិងកំពុងប្រើប្រាស់ប្រព័ន្ធបច្ចេកវិទ្យាប្រាជ្ញាសិប្បនិមិត្ត (AI) ដើម្បីជួយកំណត់អត្តសញ្ញាណគោលដៅទម្លាក់គ្រាប់បែកនៅតំបន់ហ្កាហ្សា នេះបើតាមអ្នកនាំពាក្យរបស់សេតវិមាន លោក ចន ឃឺបប៊ី (John Kirby) បានប្រាប់ទូរទស្សន៍ CNN កាលពីថ្ងៃព្រហស្បតិ៍ (០៤ មេសា)។

នៅក្នុងបទសម្ភាសន៍របស់ CNN លោក ឃឺបប៊ី បាននិយាយថា សហរដ្ឋអាមេរិក មិនបានផ្ទៀងផ្ទាត់ខ្លឹមសារនៃរបាយការណ៍ប្រព័ន្ធផ្សព្វផ្សាយដែលត្រូវបានបោះពុម្ពនៅក្នុងទស្សនាវដ្តី ផ្លើស៩៧២ (+972 Magazine) និងប្រព័ន្ធផ្សព្វផ្សាយ ឡូខល ខល (Local Call) កាលពីថ្ងៃពុធទេ។ ការចេញផ្សាយនោះបានលើកឡើងថា ក្រុមមន្ត្រីចារកម្មអ៊ីស្រាអែល បានពាក់ព័ន្ធនឹងកម្មវិធីដែលត្រូវបានរាយការណ៍នោះ ដែលគេស្គាល់ថាឈ្មោះកម្មវិធី «ឡាវេនដឺ» (Lavender)។

របាយការណ៍ប្រព័ន្ធផ្សព្វផ្សាយបាននិយាយថា កងទ័ពអ៊ីស្រាអែលបានកំណត់ពលរដ្ឋហ្កាហ្សា រាប់ម៉ឺននាក់ជាជនសង្ស័យសម្រាប់ការធ្វើឃាត ដោយប្រើប្រាស់ប្រព័ន្ធ AI ដែលមានការត្រួតពិនិត្យពីមនុស្សតិចតួចប៉ុណ្ណោះ ប៉ុន្តែកងកម្លាំងការពារអ៊ីស្រាអែល IDF បានបដិសេធការលើកឡើងនេះ។

របាយការណ៍បានបន្ថែមថា កម្មវិធីរបស់កងកម្លាំង IDF នេះកំណត់ប្រព័ន្ធវិភាគឱ្យធ្វើការពិនិត្យឯករាជ្យ ដែលក្នុងនោះពួកគេផ្ទៀងផ្ទាត់ថា គោលដៅដែលបានកំណត់មួយណា បានបំពេញតាមនិយមន័យពាក់ព័ន្ធ ដែលស្របតាមច្បាប់អន្តរជាតិ និងគោលការណ៍ណែនាំរបស់អ៊ីស្រាអែល៕