ក្រុមហ៊ុន RMA Cambodia ជាក្រុមហ៊ុនដែលនាំចូលនូវរថយន្តម៉ាកល្បីៗលើពិភពលោក និង​ចែកចាយផ្តាច់មុខសម្រាប់រថយន្ត Land Rover ដែលជាក្រុមហ៊ុន​ផលិតរថយន្ត​ដ៏​ធំបំផុត​របស់​ពិភព​លោក​កាល​ពីថ្ងៃទី៤ ខែមេសាឆ្នាំ២០២៤នេះ បានរៀបចំសន្និសីទ​សារព័ត៌មាន​មួយ​ដើម្បី​បង្ហាញ​អំពី​ការ​ប្រើប្រាស់រថយន្ត Range Rover ឱ្យកាន់តែប្រសើរឡើង។

លោក Sajai Nalupurakkal ប្រធានផ្នែកសេវាកម្មជួលជុលរបស់ក្រុមហ៊ុន Land Rover Cambodia បានលើកឡើងថា ក្រុមហ៊ុនតែងតែនាំមុខគេជានិច្ចនូវបច្ចេកវិទ្យា និងការ​បង្កើត​ថ្មី​ដោយ​ផ្តោត​លើ​ការយកចិត្តទុកដាក់អតិថិជនជាស្នូល។ ដោយឡែក ករណីឆេះរថយន្ត Range Rover នៅលើផ្លូវល្បឿនលឿនភ្នំពេញ-ព្រះសីហនុ លោកបានពន្យល់ថា មានហេតុផលជាច្រើន ដែលកើតចេញពីកត្តារួមផ្សំគ្នាដូចជា ការធ្វេសប្រហែសក្នុងការថែទាំរថយន្ត ការខូចទ្រនាប់ការពារ លេចធ្លាយ ឬប្រព័ន្ធខ្សែភ្លើងដែលមានបញ្ហាហានិភ័យកើនឡើង។

លោកបានបន្តថា ការកែឆ្នៃរថយន្តខុសបច្ចេកទេស ការកែប្រែប្រព័ន្ធខ្សែភ្លើង ដោយអ្នក​បច្ចេកទេស​ដែល​គ្មានជំនាញច្បាស់លាស់ ការនាំយកយានជំនិះពីស្តង់ដារអឺរ៉ុប និងការ​កែប្រែប្រ​ព័ន្ធ​បង្ហូរ​ប្រេង ដើម្បីដំណើរ​ការ​ជាមួយ​និង​លក្ខខណ្ឌ​ប្រេង​ឥន្ធនៈ​ផ្សេងៗ​ក៏​អាច​នាំឱ្យឡើ​ង​កំដៅ​ដែរ​។ នៅពេលដែលម៉ាស៊ីនឡើងកំដៅខ្លាំងសារធាតុរាវរបស់វា ដូចជាប្រេង និងទឹកស្អំម៉ា​ស៊ីន​កើន​ឡើង​ដល់​សីតុណ្ហភាពខ្ពស់ហើយចាប់ផ្តើមហៀរចេញ ដែលអាចបញ្ឆេះលើផ្នែកម៉ាស៊ីនក្តៅ ឬ​ប្រព័ន្ធ​បង្ហូរប្រេង ដែលជាហេតុនាំឲ្យមានភ្លើងឆេះ។

អតិថិជនម្នាក់ ដែលយករថយន្តមកជួសជុលផ្ទាល់នៅក្រុមហ៊ុន Land Rover Cambodia លោក គួច លេងឃាង បានបង្ហាញទស្សនៈថា លោកតែង​តែទទួល​បាន​ការ​យក​ចិត្តទុកដាក់​ពី​ផ្នែក​សេវាកម្ម​របស់ក្រុមហ៊ុន ដើម្បីត្រួតពិនិត្យឡាន ដូចជា ការផ្លាស់ប្តូរប្រេងម៉ាស៊ីន និងការឆែក​ប្រព័ន្ធ​សុវត្ថិភាព​ជាដើម ជាពិសេសពេលត្រូវដល់ពេលមកឆែកឬពេលត្រូវទៅឆ្ងាយម្តងៗ គឺមិនដែរ​បារម្ភ​ទេ សឹងតែទិញឡានហើយចាំតែចាក់សាំង និងដូរប្រេងម៉ាស៊ីនតែប៉ុណ្ណោះ។

ជាមួយនេះលោក សៀង រិទ្ធ ប្រធានផ្នែករោងជាង បានចែករំលែកអំពីទំនុកចិត្ត​ក្នុង​ការ​ជួសជុល​រថយន្ត​នេះដែរថា ក្រុមជំនាញដែលមានតុល្យភាពនៅក្នុងការផ្ដល់សេវាកម្មមេកានិក និងផ្នែក​រោគ​វិនិច្ឆ័យ​នៃ​កំហូចរថយន្តគឺត្រូវបានចុះឈ្មោះនៅក្នុងវេទិកាបណ្តុះបណ្តាល Land Rover ដោយ​បន្ត​ការ​បណ្តុះ​បណ្តាល​ជាប្រចាំតាមរយៈថ្នាក់អនឡាញ និងរៀនដោយផ្ទាល់​នៅ​ក្នុង​ថ្នាក់​នៅ​សាលា​បណ្តុះ​បណ្តាល Land Rover ក្នុងប្រទេសសិង្ហបុរី និងចក្រភពអង់គ្លេស៕ អត្ថបទ៖ ឈិត បូរ៉ាវី