យន្តហោះរបស់លោកស្រី Yellen បានចុះចតនៅទីក្រុង Guangzhou (ក្វាងទុង) ហើយ កាលពីថ្ងៃព្រហស្បតិ៍ (ទី៤ ខែមេសា) ខណៈដែលរដ្ឋមន្ត្រីក្រសួងរតនាគាររបស់អាមេរិករូបនេះ នឹងចាប់ផ្ដើមកិច្ចពិភាក្សារយៈពេល ៤ថ្ងៃជាមួយមន្ត្រីចិន អំឡុងដំណើរទស្សនកិច្ចលើកទី២ របស់លោកស្រីទៅកាន់ប្រទេសសេដ្ឋកិច្ចដ៏ធំជាងគេបំផុតលំដាប់ទី២ របស់ពិភពលោក ក្នុងរយៈពេលមិនដល់មួយឆ្នាំ។

នៅព្រឹកថ្ងៃសុក្រ (ទី៥ ខែមេសា) នេះ លោកស្រីបាននិយាយថា សហរដ្ឋអាមេរិកបានប្តេជ្ញាចិត្ត ក្នុងការមាន «ទំនាក់ទំនងសេដ្ឋកិច្ចដ៏ល្អប្រសើរ» ដោយសម្ដីត្រូវបានពោលឡើងអំឡុងជំនួបជាមួយអភិបាលខេត្ត Guangdong ជាខេត្តដ៏ធំដែលតំណាងឲ្យកំណែទម្រង់ និងការអភិវឌ្ឍ ពោលគឺជាកម្លាំងជំរុញឲ្យមានការរីកចម្រើនក្នុងល្បឿនយ៉ាងឆាប់រហ័សរបស់ប្រទេសចិន។

ប៉ុន្តែលោកស្រីបានសង្កត់ធ្ងន់ថា ទំនាក់ទំនងនោះទាមទារឲ្យមាន «ទីលានលេងប្រកួតប្រជែងស្មើភាព ទាំងសម្រាប់កម្មករនិយោជិត និងក្រុមហ៊ុនអាមេរិក» ក៏ដូចជាការមាន «ការទំនាក់ទំនងបើកចំហ និងដោយផ្ទាល់លើផ្នែកនានាជាច្រើនទៀតដែលយើងមានការខ្វែងគំនិតគ្នា»។ លោកស្រី Yellen បានបន្ថែមទៀតថា៖ «បញ្ហានេះរាប់បញ្ចូលទាំងបញ្ហាឧស្សាហកម្មហួសប្រមាណរបស់ប្រទេសចិនផងដែរ ដែលសហរដ្ឋអាមេរិក និងប្រទេសផ្សេងទៀតមានការព្រួយបារម្ភ ពោលគឺជាបញ្ហាដែលអាចបណ្តាលឲ្យមានប៉ះពាល់រីករាលដាលជាសកល»។

ជាមួយគ្នានេះ លោកស្រី Yellen ក៏បានព្រមានដែរថា ការឧបត្ថម្ភធនដ៏ធំរបស់ប្រទេសចិន សម្រាប់បច្ចេកវិទ្យា ដូចជាថាមពលបៃតង រថយន្តអគ្គិសនី និងអាគុយជាដើម បង្កជាហានិភ័យបង្កើតឲ្យមានទំនិញច្រើនហួសប្រមាណ ដែលបន្ទាប់មកជោរជន់ពេញទីផ្សារពិភពលោក ដោយប៉ះពាល់យ៉ាងធ្ងន់ធ្ងរដល់ក្រុមហ៊ុនអាមេរិក និងប្រទេសដទៃទៀត។

ក្នុងដំណើរទស្សនកិច្ចនេះ លោកស្រី Yellen គ្រោងនឹងជួបជាមួយនាយករដ្ឋមន្ត្រីចិន លោក Li Qiang និងឧបនាយករដ្ឋមន្ត្រីលោក He Lifeng ព្រមទាំងទេសាភិបាលធនាគារកណ្តាល លោក Pan Gongsheng និងរដ្ឋមន្ត្រីក្រសួងហិរញ្ញវត្ថុ លោក Lan Fo'an។ ការពិភាក្សាជាមួយបណ្ដាឥស្សរជនទាំងនោះ នឹងមើលឃើញពីការជជែកគ្នាយ៉ាងជ្រៅពីលក្ខខណ្ឌសេដ្ឋកិច្ចរបស់ប្រទេសទាំង២ និងដោះស្រាយផ្នែករសើបជាច្រើនទៀត ដូចជាសន្តិសុខជាតិ និងការគាំទ្ររបស់ទីក្រុងប៉េកាំង សម្រាប់មូលដ្ឋានឧស្សាហកម្មការពារជាតិរបស់រុស្ស៊ី៕