ប្រធានាធិបតីកូរ៉េខាងត្បូងលោក Yoon Suk Yeol បានទៅបោះឆ្នោត ខណៈដែលការបោះឆ្នោតមុនកាលកំណត់រយៈពេល ២ថ្ងៃ សម្រាប់ការបោះឆ្នោតសភា នាសប្តាហ៍ក្រោយ បានចាប់ផ្ដើមនៅថ្ងៃសុក្រនេះ ដែលការបោះឆ្នោតនេះគណបក្សកាន់អំណាចរបស់លោក ព្យាយាមដណ្តើមយកសំឡេងភាគច្រើននៅក្នុងសភា ដែលត្រូវបានគ្រប់គ្រងដោយគណបក្សប្រឆាំង។

យោងតាមគណៈកម្មាធិការជាតិរៀបចំការបោះឆ្នោត បានឲ្យដឹងថា មានមនុស្សជាង ២,២លាននាក់ ឬប្រហែល ៥,១ភាគរយនៃអ្នកមានសិទ្ធិបោះឆ្នោត បានទៅបោះឆ្នោត នៅការិយាល័យបោះឆ្នោតប្រហែល ៣.៥០០កន្លែង នៅទូទាំងប្រទេស គិតត្រឹមម៉ោង ១១ព្រឹក ម៉ោងក្នុងស្រុក។ មានការកត់សម្គាល់ពីចំនួនដ៏ខ្ពស់បំផុតនៃអ្នកចេញទៅបោះឆ្នោត សម្រាប់ការបោះឆ្នោតសភា នាពេលនេះ គិតចាប់តាំងពីប្រព័ន្ធបោះឆ្នោតមុនកាលកំណត់ ត្រូវបានអនុម័តក្នុងឆ្នាំ២០១៣។

លោក Yoon បានទម្លាក់សន្លឹកឆ្នោតរបស់លោកជាមួយនឹងជំនួយការជាច្រើនរូប នៅមណ្ឌលបោះឆ្នោតមួយ ក្នុងទីក្រុងកំពង់ផែភាគខាងត្បូង Busan ជាទីដែលលោកត្រូវបានគេរំពឹងថា នឹងចូលរួមក្នុងព្រឹត្តិការណ៍ពាណិជ្ជកម្មមួយ។ លោកបានជំរុញឲ្យប្រជាពលរដ្ឋ ទៅបោះឆ្នោតនៅថ្ងៃទី១៥ ខែមេសា ដោយនិយាយថា វាមិនត្រឹមតែជាសិទ្ធិរបស់ពលរដ្ឋប៉ុណ្ណោះទេ តែថែមទាំងជាការទទួលខុសត្រូវផងដែរ។

ហានិភ័យ គឺមានខ្ពស់សម្រាប់លោក Yoon ខណៈដែលគណបក្សអំណាចប្រជាជន (PPP) របស់ខ្លួន មានបំណងឈ្នះសំឡេងភាគច្រើន នៅក្នុងសភាតែមួយ ដែលមាន ៣០០អាសនៈ ទោះបីជាការស្ទង់មតិបង្ហាញថា ការបោះឆ្នោតមានរយៈពេលកៀកពេកមិនអាចកំណត់បាន។ ការបរាជ័យ អាចកាត់បន្ថយគំនិតផ្តួចផ្តើមសំខាន់ៗរបស់លោក Yoon ក្នុងការជំរុញសេដ្ឋកិច្ច សុខភាពសារពើពន្ធ និងអត្រាកំណើត ក៏ដូចជាការជំរុញកិច្ចសហប្រតិបត្តិការសន្តិសុខត្រីភាគីជាមួយសហរដ្ឋអាមេរិក និងជប៉ុនផងដែរ។

ជាមួយនឹងសំឡេងភាគច្រើន ១៦៧អាសនៈ គណបក្សប្រឆាំងដ៏ធំ គឺគណបក្សប្រជាធិបតេយ្យ (DP) បានអនុម័តសេចក្ដីស្នើច្បាប់ដ៏ចម្រូងចម្រាសរាប់សិប ក្នុងនោះរួមទាំងច្បាប់គិលានុបដ្ឋាយិកាដែលត្រូវបានវេតូដោយលោក Yoon និងគណបក្សរបស់លោកផងដែរ៕