ក្រសួងការបរទេសរបស់ទីក្រុងម៉ានីល នៅថ្ងៃសុក្រ (ទី៥ ខែមេសា) នេះ បាននិយាយថា កិច្ចប្រជុំកំពូលត្រីភាគី រវាងមេដឹកនាំរបស់សហរដ្ឋអាមេរិក ជប៉ុន និងហ្វីលីពីន នឹងរួមបញ្ចូលការពិភាក្សាអំពីឧប្បត្តិហេតុថ្មីៗនេះ នៅក្នុងសមុទ្រចិនខាងត្បូង។

នៅសប្តាហ៍ក្រោយ ប្រធានាធិបតីអាមេរិកលោក Joe Biden នឹងធ្វើជាម្ចាស់ផ្ទះទទួលនាយករដ្ឋមន្ត្រីជប៉ុនលោក Fumio Kishida និងប្រធានាធិបតីហ្វីលីពីនលោក Ferdinand Marcos Jr ដើម្បីពិភាក្សាអំពីទំនាក់ទំនងសេដ្ឋកិច្ច និងតំបន់ឥណ្ឌូ-ប៉ាស៊ីហ្វិក។

លោក Hans Mohaimin Siriban អនុរដ្ឋលេខាធិការទទួលបន្ទុកកិច្ចការបរទេសស្តីទីរបស់ប្រទេសហ្វីលីពីន បានប្រាប់សន្និសីទសារព័ត៌មានមួយថា កិច្ចប្រជុំកំពូលដែលគ្រោងនឹងធ្វើឡើងនៅសប្តាហ៍ក្រោយនេះ មិនមែនសំដៅទៅលើប្រទេសណាមួយនោះទេ បើទោះបីជាប្រទេសទាំង៣ បានសម្តែងការព្រួយបារម្ភអំពីភាពឈ្លានពានរបស់ចិន នៅក្នុងតំបន់ក៏ដោយ។

លោក Siriban បាននិយាយថា៖ «យើងអាចរំពឹងថា នឹងមានការសម្របទស្សនៈ ក្នុងចំណោមប្រទេសទាំង៣ លើឧប្បត្តិហេតុថ្មីៗនេះ»។ លោកបានបន្ថែមថា មេដឹកនាំប្រទេសទាំង៣ ត្រូវបានគេរំពឹងថា នឹងបង្កើត «សេចក្តីថ្លែងការណ៍រួម» ស្តីពីទំនាក់ទំនងការទូតរបស់ខ្លួន។ ជាមួយគ្នានេះ លោកបានក៏បានប្រាប់ដែរថា លោក Biden និងលោក Marcos នឹងមានជំនួបទ្វេភាគីដាច់ដោយឡែកពីគ្នា មុនកិច្ចប្រជុំកំពូលត្រីភាគី។

គួរបញ្ជាក់ថា ប្រទេសហ្វីលីពីន និងចិន មានការប៉ះទង្គិចគ្នាជាបន្តបន្ទាប់ នៅដែនសមុទ្រ និងការចោទគ្នាទៅវិញទៅមកយ៉ាងក្ដៅគគុក កាលឆ្នាំមុន ជុំវិញសណ្ឋានដែនសមុទ្រមានជម្លោះ ក្នុងនោះរួមទាំងឧបទ្ទវហេតុមួយ ក្នុងខែមីនា ដែលចិនបានប្រើកាណុងបាញ់ទឹក ដើម្បីរំខានដល់បេសកកម្មផ្ដល់សម្ភារផ្គត់ផ្គង់របស់ហ្វីលីពីនដល់ទាហានដែលឈរជើងនៅលើនាវាចម្បាំងដែលចតចោលនៅតំបន់ថ្មប៉ប្រះទឹក ក្នុងសមុទ្រចិនខាងត្បូង៕