រដ្ឋាភិបាលនៃប្រទេសអេក្វាឌ័រ កាលពីថ្ងៃព្រហស្បតិ៍ (ទី៤ ខែមេសា) បានប្រកាសថា ឯកអគ្គរដ្ឋទូតរបស់ម៉ិកស៊ិកប្រចាំប្រទេសរបស់ខ្លួន មិនត្រូវបានស្វាគមន៍នោះទេ ដោយលើកយកការអត្ថាធិប្បាយ «ដ៏គួរឲ្យសោកស្ដាយ» ពីប្រធានាធិបតីម៉ិកស៊ិកអំពីការបោះឆ្នោតដែលញាំញីដោយអំពើហិង្សារបស់អេក្វាឌ័រកាលពីឆ្នាំមុន។

ក្រសួងការបរទេសអេក្វាឌ័របានប្រាប់សារព័ត៌មាន Reuters ថា ឯកអគ្គរដ្ឋទូតលោកស្រី Raquel Serur Smeke គួរតែចាកចេញពីប្រទេសនេះ «ឆាប់ៗ» បន្ទាប់ពីបានពណ៌នាលោកស្រីថា ជា «បុគ្គលដែលមិនត្រូវបានស្វាគមន៍» នៅក្នុងសេចក្តីថ្លែងការណ៍មួយ។

កាលពីថ្ងៃពុធ (ទី៣ ខែមេសា) ប្រធានាធិបតីឆ្វេងនិយមរបស់ម៉ិកស៊ិក លោក Andres Manuel Lopez Obrador បានអត្ថាធិប្បាយជុំវិញការធ្វើឃាត កាលពីឆ្នាំមុនលើបេក្ខជនប្រធានាធិបតីអេក្វាឌ័រលោក Fernando Villavicencio ដោយប្រៀបធៀបការសម្លាប់នោះជាមួយនឹងអំពើហិង្សាថ្មីៗ អំឡុងរដូវកាលបោះឆ្នោតបច្ចុប្បន្នរបស់ម៉ិកស៊ិក ដែលបេក្ខជនក្នុងស្រុកជាច្រើនត្រូវបានបាញ់សម្លាប់។ ការបោះឆ្នោតនៅប្រទេសម៉ិកស៊ិកគ្រោងនឹងធ្វើនៅខែមិថុនា។

អំឡុងការសម្ដែងការយល់ឃើញនោះ លោក Lopez Obrador បានផ្តល់យោបល់ថា «បេក្ខជនជាស្ត្រី» ដែលកំពុងនាំមុខគេក្នុងការប្រកួតប្រជែងតំណែងប្រធានាធិបតី ត្រូវបានយកទៅពាក់ព័ន្ធដោយអយុត្តិធម៌ទៅនឹងការសម្លាប់លោក Villavicencio ហើយបន្ទាប់មកបានបាត់បង់សន្ទុះ។ លោក Obrador បានបន្តបន្ទោសប្រព័ន្ធផ្សព្វផ្សាយដែលលោកអះអាងថា ពុករលួយ។

គួរបញ្ជាក់ថា ក្នុងការបោះឆ្នោតជ្រើសរើសប្រធានាធិបតី កាលពីខែតុលា បេក្ខជនជាក្ដីសង្ឃឹមឈ្នះតំណែងនេះខាងពួកឆ្វេងនិយម លោក Luisa Gonzalez ដែលជាអ្នកស្ថិតក្រោមការជ្រោមជ្រែងរបស់អតីតប្រធានាធិបតីលោក Rafael Correa មិនអាចយកឈ្នះលោក Daniel Noboa បានឡើយ ដោយបរាជ័យជាមួយនឹងសំឡេងគាំទ្រប្រហែល ៤៨ភាគរយ ទល់នឹង ៥២ភាគរយ។ នៅក្នុងសេចក្តីថ្លែងការណ៍របស់ខ្លួន ក្រសួងការបរទេសអេក្វាឌ័របានកត់សម្គាល់ថា ប្រជាជាតិនេះនៅតែ កាន់ទុក្ខចំពោះការធ្វើឃាតលើលោក Villavicencio ហើយថា រដ្ឋាភិបាលរបស់ខ្លួន បានប្តេជ្ញាចិត្តចំពោះគោលការណ៍មិនធ្វើអន្តរាគមន៍លើបញ្ហាផ្ទៃក្នុងរបស់ប្រទេសដទៃ៕