យោងតាមមន្ត្រីរដ្ឋបាលជាន់ខ្ពស់បាននិយាយឲ្យដឹងថា ប្រធានាធិបតីសហរដ្ឋអាមេរិក លោក Joe Biden កាលពីថ្ងៃសុក្រ បានសរសេរទៅកាន់មេដឹកនាំ ប្រទេសអេហ្ស៊ីប និងកាតា ដោយអំពាវនាវឱ្យមេដឹកនាំប្រទេសទាំងពីរដាក់សម្ពាធលើក្រុមហាម៉ាស ឱ្យចុះកិច្ចព្រមព្រៀងចំណាប់ថ្នូរជាមួយអ៊ីស្រាអែល មួយថ្ងៃបន្ទាប់ពីលោកបានអំពាវនាវឱ្យនាយករដ្ឋមន្ត្រីអ៊ីស្រាអែល លោក Benjamin Netanyahu បង្កើនកិច្ចខិតខំប្រឹងប្រែងទ្វេដងឡើងវិញ ដើម្បីឈានដល់បទឈប់បាញ់។

មន្ត្រីដែលបាននិយាយក្នុងលក្ខខណ្ឌមិនបញ្ចេញឈ្មោះដើម្បីពិភាក្សាអំពីលិខិតឯកជន បាននិយាយថាទីប្រឹក្សាសន្តិសុខជាតិរបស់លោក Biden នឹងជួបនៅថ្ងៃចន្ទ ជាមួយសមាជិកក្រុមគ្រួសារចំណាប់ថ្នូរប្រហែល ១០០នាក់ដែលត្រូវបានគេជឿថានៅតែស្ថិតនៅក្នុងតំបន់ហ្កាហ្សា។ លិខិតនេះ បានធ្វើឡើងនៅពេលដែលលោក Biden បានបញ្ជូននាយក CIA លោក Bill Burns ទៅកាន់ទីក្រុងគែរ ប្រទេសអេហ្ស៊ីប សម្រាប់កិច្ចពិភាក្សានៅចុងសប្តាហ៍នេះ អំពីវិបត្តិចំណាប់ថ្នូរ។

វាមានរយៈពេលប្រាំមួយខែហើយ ចាប់តាំងពីក្រុមហាម៉ាសបានវាយលុកលើអ៊ីស្រាអែល ដោយបានសម្លាប់មនុស្សយ៉ាងហោចណាស់ ១.២០០នាក់ និងបានចាប់ចំណាប់ថ្នូរប្រហែល ២៥០ នាក់ ដែលប្រមាណ ១៣០ នាក់នៅតែត្រូវបានឃុំខ្លួននៅក្នុងតំបន់ហ្កាហ្សានៅឡើយ។ អ៊ីស្រាអែល បានឆ្លើយតបដោយសង្គ្រាមក្នុងការតាមប្រមាញ់ក្រុមហាម៉ាស ដែលបាននាំឱ្យពលរដ្ឋប៉ាឡេស្ទីនជាង៣ម៉ឺននាក់ស្លាប់ ភាគច្រើនជាស្ត្រី និងកុមារ។

អ៊ីស្រាអែល ក៏បានស្ថិតនៅក្រោមសម្ពាធកាន់តែខ្លាំងកាលពីថ្ងៃសុក្រ ដើម្បីបង្កើនជំនួយដល់តំបន់ហ្កាហ្សា ដោយយោធារបស់ខ្លួនបានសារភាពថាមាន «កំហុសធ្ងន់» នៅពេលដែលយានដ្រូន បានសម្លាប់បុគ្គលិកផ្តល់ជំនួយប្រាំពីរនាក់នៅក្នុងដែនដី ដែលកំពុងប្រយុទ្ធគ្នា។ 

អង្គការសប្បុរសធម៌ World Central Kitchen មានមូលដ្ឋាននៅសហរដ្ឋអាមេរិក ដែលបុគ្គលិករបស់ខ្លួនត្រូវបានសម្លាប់នៅក្នុងការវាយប្រហារដោយយានដ្រូនកាលពីយប់ថ្ងៃចន្ទ បានទាមទារឱ្យបង្កើតគណៈកម្មការឯករាជ្យមួយ ដើម្បីស៊ើបអង្កេតការសម្លាប់នេះ។