យោធាអ៊ីស្រាអែល បាននិយាយថា យោធា បានបណ្តេញមន្ត្រីពីរនាក់ និងបានថ្កោលទោសជាផ្លូវការមេបញ្ជាការជាន់ខ្ពស់ បន្ទាប់ពីការស៊ើបអង្កេតលើការសម្លាប់បុគ្គលិកជំនួយប្រាំពីរនាក់ នៅក្នុងការវាយប្រហារតាមអាកាសនៅតំបន់ហ្កាហ្សាក្នុងសប្តាហ៍នេះ ដែលបានរកឃើញថាជាកំហុសធ្ងន់ធ្ងរ និងការរំលោភលើនីតិវិធី។

ការស៊ើបអង្កេត បានរកឃើញថា កងកម្លាំងអ៊ីស្រាអែលជឿជាក់ដោយយល់ច្រឡំថា ពួកគេកំពុងវាយប្រហារខ្មាន់កាំភ្លើងរបស់ក្រុមហាម៉ាស នៅពេលដែលយានដ្រូន បានវាយប្រហាររថយន្តបីគ្រឿងរបស់ក្រុមផ្តល់ជំនួយ អង្គការ World Central Kitchen កាលពីយប់ថ្ងៃចន្ទ ហើយនីតិវិធីស្តង់ដារ ពុំត្រូវបានអនុវត្ត។

លោក ដេនញែល ហាហ្គារី(Daniel Hagari) អ្នកនាំពាក្យយោធាអ៊ីស្រាអែល បាននិយាយថា ការវាយប្រហារលើយានយន្តដឹកជំនួយ គឺជាកំហុសដ៏ធ្ងន់ ដែលកើតចេញពីការបរាជ័យក្នុងប្រតិបត្តិការធ្ងន់ធ្ងរ ក្នុងការចាត់ថ្នាក់ និងការកំណត់អត្តសញ្ញាណខុស ដែលកំហុសជាច្រើនក្នុងការសម្រេចចិត្ត និងការវាយប្រហារ ធ្វើឡើងដោយបំពានលើនីតិវិធីប្រតិបត្តិការស្តង់ដារ។

យោធានិយាយថា ខ្លួនបានបណ្តេញនាយសេនាធិការកងពលតូច និងមន្ត្រីជំនួយការអង្គភាពពន្លត់អគ្គិភ័យ និងបានធ្វើការស្តីបន្ទោសជាផ្លូវការដល់មន្ត្រីជាន់ខ្ពស់ រួមមានទាំងឧត្តមសេនីយ៍ នៅទីបញ្ជាការភាគខាងត្បូងផងដែរ។

ការសម្លាប់បុគ្គលិកជំនួយទាំងប្រាំពីររូប ដែលរួមមានពលរដ្ឋអង់គ្លេស អូស្ត្រាលី និងប៉ូឡូញ ដែលជនជាតិអាមេរិក-កាណាដា និងសហការីប៉ាឡេស្ទីន បានធ្វើឱ្យមានការផ្ទុះកំហឹងជាសកល ក្នុងសប្តាហ៍នេះ។ បន្ទាប់ពីការចុះផ្សាយនៃការស្លាប់បុគ្គលិក អង្គការ World Central Kitchen បានទាមទារឱ្យមានគណៈកម្មការឯករាជ្យមួយ ដើម្បីស៊ើបអង្កេតឧបទ្ទវហេតុនេះ។