រដ្ឋបាលខេត្តស្វាយរៀង នៅថ្ងៃទី៥ ខែមេសា ឆ្នាំ២០២៤ម្សិលមិញនេះ បានចេញសេចក្តី​ប្រកាស​ជូន​ដំណឹង អោយដឹងថាក្នុងឱកាសប្រារព្ធវិធីបុណ្យចូលឆ្នាំថ្មីប្រពៃណីជាតិខ្មែរនាពេលខាងមុខ ក្នុង​រយៈពេលបីថ្ងៃចាប់ពីថ្ងៃទី១៤.១៥និងថ្ងៃទី១៦ ខែមេសាឆ្នាំ ២០២៤ រដ្ឋបាលខេត្តស្វាយរៀង នឹង​រៀបចំ​កម្មវិធី «ស្វាយរៀងសង្ក្រាន្ត» នៅទីតាំងរង្វង់មូលវិមានឯករាជ្យ ក្រុងស្វាយរៀង ដើម្បី​បង្កើត​ភាព​អ៊ូអរ និងបង្កបរិយាកាស សប្បាយរីករាយ ជូនបងប្អូនប្រជាពលរដ្ឋបានចូលរួមទស្សនា លេង​កម្សាន្ត និងចូលរួមអបអរសាទរ ទទួលអំណរពរជ័យបុណ្យចូលឆ្នាំថ្មី ប្រពៃណីជាតិ ឆ្នាំរោង ឆស័ក ព.ស.២៥៦៨ គ.ស.២០២៤ រយៈពេល៣ថ្ងៃ។ ដែលកម្មវិធីនេះនឹងរៀបចំចាប់ពីម៉ោង ១០និង​០០នាទីព្រឹកតទៅ ជារៀងរាល់ថ្ងៃ ចាប់ពីថ្ងៃទី១៤-១៥-១៦ ខែមេសា ឆ្នាំ២០២៤ ដោយ​មាន​កម្មវិធីកម្សាន្តសប្បាយជាច្រើនដូចជា កម្មវិធីលេងល្បែងប្រជាប្រិយ ការដាក់តាំង​បង្ហាញ​ផលិត​ផល​នានា កម្មវិធីប្រគំតន្ត្រីខ្នាតធំដោយមានការចូលរួមពីសិល្បករ សិល្បការិនី ល្បីៗ​នៅ​ក្នុង​ប្រទេស ​និងការបាញ់ទឹក ការរាំលេងកម្សាន្ត រួមនឹងកម្មវិធីកម្សាន្តសប្បាយៗជាច្រើន ផ្សេងទៀត ។

ជាមួយគ្នានេះ ដើម្បីចូលរួមអបអរសាទរបុណ្យចូលឆ្នាំថ្មីប្រពៃណីជាតិឱ្យបានកាន់តែមានភាព អធិកអធម នៅតាមបណ្តាក្រុង ស្រុក ក្នុងខេត្ត ក៏មានរៀបចំកម្មវិធីសង្ក្រាន្តឆ្នាំថ្មីនៅតាមទីតាំង សំខាន់​ៗមួយចំនួនដូចជា រមណីយដ្ឋាន ទីប្រជុំជន និងវត្តអារាម សម្រាប់បងប្អូនប្រជាពលរដ្ឋ ចូល​រួមលេងកម្សាន្តផងដែរ ។ 

អាស្រ័យហេតុនេះ សូម បងប្អូនប្រជាពលរដ្ឋក្នុង និងក្រៅខេត្ត និងសាធារណជនទូទៅ មេត្តា​ជ្រាប និងអញ្ជើញចូលរួមទស្សនា និងលេងកម្សាន្តឱ្យបានច្រើនកុះករ ដើម្បីញ៉ាំងឱ្យកម្មវិធីនេះ ប្រព្រឹត្ត​ទៅប្រកបដោយភាពឱឡារិក និងសប្បាយរីករាយ៕