ក្រុមបាតុករ បានចេញធ្វើបាតុកម្មដើរដង្ហែរឆ្លងកាត់ទីក្រុងឡុងដ៍្រភាគកណ្តាលកាលពីថ្ងៃសុក្រ ខណៈក្រុមគាំទ្រប៉ាឡេស្ទីន នៅជុំវិញពិភពលោកប្រារព្ធទិវាអន្តរជាតិគាំទ្រប៉ាឡេស្ទី អាល់ហ្គុត ឌេ( al-Quds Day)។ បាតុកកម្មបានជួបជុំដោយក្រុមបាតុករប្រឆាំងអ៊ីស្រាអែល នៅពេលឆ្លងកាត់នៅជិតសភា ។

នគរបាលទីក្រុងឡុងដ៍្រ ចក្រភពអង់ភពអង់គ្លេស បាននិយាយថា នគរបាលបានដាក់ពង្រាយមន្ត្រីជាង ៥០០នាក់ ដើម្បីការពារបាតុកម្មប្រចាំឆ្នាំ ដែលរៀបចំដោយគណៈកម្មាធិការសិទ្ធិមនុស្សអ៊ីស្លាម ព្រមទាំងបាតុកម្មប្រឆាំងអ៊ីស្រាអែល នៅជិតអគារសភារបស់ចក្រភពអង់គ្លេស។ ទិវាអន្តរជាតិគាំទ្រប៉ាឡេស្ទីន ឬ Al Quds Day ត្រូវបានចាប់ផ្តើមដោយលោក អាយ៉ាតូឡា រូហូឡា កូម៉េនី(Ayatollah Ruhollah Khomeini) ជាមេដឹកនាំ នៃបដិវត្តអ៊ីស្លាមឆ្នាំ ១៩៧៩ របស់អ៊ីរ៉ង់ ជាការបង្ហាញសាមគ្គីភាពជាមួយពលរដ្ឋប៉ាឡេស្ទីន ហើយត្រូវបានប្រារព្ធឡើងនៅថ្ងៃសុក្រចុងក្រោយនៃខែតមអាហាររបស់ពលរដ្ឋមូស្លីមនៃខែបុណ្យរ៉ាម៉ាដាន។

ទន្ទឹមនឹងនេះ មនុស្សរាប់រយនាក់នៅទីក្រុងអ៊ីស្តង់ប៊ុល ប្រទេសទួរគី បានប្រារព្ធការបួងសួងបុណ្យសពជានិមិត្តរូបសម្រាប់ប្រជាជនប៉ាឡេស្ទីន ដែលត្រូវបានសម្លាប់នៅក្នុងសង្គ្រាមរយៈពេល ៦ ខែកន្លងទៅនេះ របស់អ៊ីស្រាអែល លើក្រុមហាម៉ាស នៅតំបន់ហ្កាហ្សា កាលពីថ្ងៃសុក្រ នៅខាងក្រៅវិហារ Fatih នៅថ្ងៃទិវាអន្តរជាតិគាំទ្រប៉ាឡេស្ទី ឬ Al-Quds Day។ ក្រុមបាតុករ បានដើរដង្ហែទៅកាន់សួន Sarachane Park ជាកន្លែងដែលពួកគេបានដុតទង់ជាតិអ៊ីស្រាអែល និងសហរដ្ឋអាមេរិក។ អ្នកតវ៉ា បានជំរុញឱ្យរដ្ឋាភិបាលទួរគី បញ្ឈប់ការធ្វើពាណិជ្ជកម្មជាមួយអ៊ីស្រាអែល និងអាស៊ែបៃហ្សង់ ដើម្បីបញ្ឈប់ការលក់ប្រេង។ ពួកគេក៏បានបង្ហាញការគាំទ្រដល់ក្រុមហាម៉ាស និងបានស្រែកពាក្យប្រឆាំងអ៊ីស្រាអែល និងប្រឆាំងសហរដ្ឋអាមេរិក។ រីឯ នៅក្នុងជំរំជនភៀសខ្លួនប៉ាឡេស្ទីន ប៊ជ អាល់ បារ៉ាចណេ(Burj al-Barajneh) ប្រទេសលីបង់ ហ្វូងមនុស្ស និងសមាជិកនៃរណសិរ្សសម្រាប់ការរំដោះប៉ាឡេស្ទីន បានចេញធ្វើបាតុកម្មបន្ទាប់ពីការបួងសួងកាលពីថ្ងៃសុក្រ ដោយមនុស្សជាច្រើនគ្រវីទង់ជាតិប៉ាឡេស្ទីន។ 

ជាមួយគ្នានេះ ហ្វូងមនុស្សក៏បានចេញធ្វើបាតុកម្មក្នុងរដ្ឋធានីបាដាដរបស់ប្រទេសអ៊ីរ៉ាក់ កាលពីថ្ងៃសុក្រទី ៥ ខែមេសា ដែលប្រារព្ធទិវាអន្តរជាតិគាំទ្រប៉ាឡេស្ទីនប្រចាំឆ្នាំ។ ក្រុមបាតុករ បានកាន់ទង់ជាតិ និងស្លាកសញ្ញាគាំទ្រប៉ាឡេស្ទីន និងក្នុងការប្រឆាំងអ៊ីស្រាអែល និងសហរដ្ឋអាមេរិក៕