វិទ្យាស្ថានជាតិពហុបច្ចេកទេសតេជោសែន ក្រុងតាខ្មៅ ខេត្តកណ្តាល នៅថ្ងៃទី៥ខែមេសា ឆ្នាំ​២០២៤ បានរៀបចំកម្មវិធីសង្ក្រាន្តអបអរសាទរពិធីបុណ្យចូលឆ្នំាថ្មី ប្រពៃណីខ្មែរ ដោយមាន​ការ​ចូលរួម​ពីលោក ច្រឹង ណារី នាយក វិទ្យាស្ថានជាតិពហុបច្ចេកទេសតេជោសែន លោកគ្រូ អ្នកគ្រូ សិស្ស និងនិស្សិតជាច្រើនកុះករ។

នៅក្នុងកម្មវិធីសង្គ្រាន្ត លោកច្រឹង ណារី បានឱ្យដឹងថា ការរៀបចំកម្មវីធីសង្រ្កាន្តនៅពេលនេះ ធ្វើ​ឡើង​ក្នុង​គោលបំណងជួបជុំគ្នាលេងល្បែងប្រជាប្រិយខ្មែរគ្រប់ទំរង់ និងរាំលេងកម្សាន្ត ដើម្បី​អបអរ​ពិធី​បុណ្យចូលឆ្នាំថ្មីប្រពៃណីជាតិ។ ក្រៅពីនេះ នៅកម្មវិធី ក៍មានការរាំរបាំជូនពរ របាំគ្រុឌ របាំ​គោះ​ត្រឡោក និងរបាំឱផ្ទៃស្រុកខ្មែរ សម្តែងដោយ​ក្រុម​គោលដៅ​ចូលរៀន​ក្នុង​កម្ម​វិធី​បណ្ដុះ​បណ្តាល​ជំនាញវិជ្ជាជីវៈ និងបច្ចេកទេស ១.៥លាននាក់។

មុន​ពិធីបុណ្យចូលឆ្នាំថ្មី ប្រពៃណីជាតិ ចូលមកដល់ គេសង្កេតឃើញថា នៅតាមបណ្តាវត្តអារាម សាលា​រៀន ស្ថាប័នថ្នាក់ជាតិ ថ្នាក់ក្រោមជាតិ និងវិស័យឯកជនជាដើមនោះ បានរៀបចំ​កម្ម​វិធី​សង្ក្រាន្ត​យ៉ាង​ផុសផុស ដើម្បីអបអរពិធីបុណ្យចូលឆ្នាំ។

គួបញ្ជាក់ដែរថា ពិធីបុណ្យចូលឆ្នាំថ្មី ប្រពៃណីជាតិ នឹងប្រារព្ធធ្វើឡើងចាប់ពីថ្ងៃទី១៣ រហូត​ដល់​ថ្ងៃ​ទី១៦ ខែមេសា ឆ្នាំ២០២៤។ តាមទម្លាប់ ជនជាតិខ្មែរនិយមរៀបចំពិធីបុណ្យចូលឆ្នាំចំនួន ៣ ថ្ងៃ ដោយ​ថ្ងៃទី១ ជាថ្ងៃចូលឆ្នាំ, ថ្ងៃទី ២ ជាថ្ងៃ (វារៈ) វនបត និងថ្ងៃទី ៣ ជាថ្ងៃឡើងស័ក ។ ពលរដ្ឋ​ខ្មែរ​មានជំនឿថា ក្នុងមួយឆ្នាំនៃការរស់នៅ គេតែងជួបប្រទះអពមង្គល ឧបទ្រព្យចង្រៃផ្សេងៗ ជូន​កាល​មាន​ទុក្ខសោក ជួនកាលមានគ្រោះអាសន្ន ជួនកាលមានជំងឺរូបរឹតរាងកាយ ជូនកាលទៀត បាន​ប្រព្រឹត្ដអំពើសៅហ្មង មិនគប្បី ។ លុះផុតឆ្នាំចាស់ទៅ គេនាំគ្នាធ្វើបុណ្យ គេស្លៀកពាក់ថ្មីៗ គេ​នាំគ្នា​ដើរលេងកំសាន្ដ ដើម្បីឱ្យអស់កង្វល់ ហើយឱ្យមានសិរីសួស្ដី និងមាន​សុភមង្គល​នៅ​ក្នុងឆ្នាំថ្មី៕ អត្ថបទ៖ ទូច សោភ័ណ