គ្រោះរញ្ជួយដីកម្រិត ៤,៨ រិចទ័រ បានវាយប្រហារនៅជិតទីក្រុងញូវយ៉ក កាលពីថ្ងៃសុក្រ ដែលទីភ្នាក់ងារស្ទាបស្ទង់ភូមិសាស្ត្រសហរដ្ឋអាមេរិកបាននិយាយថា បានអង្រួនអគារនៅឆ្នេរសមុទ្រខាងកើត និងធ្វើឲ្យប្រជាជនភ័យខ្លាច នៅក្នុងតំបន់ដែលកម្រជួបប្រទះសកម្មភាពរញ្ជួយដីគួរឱ្យកត់សម្គាល់បែបនេះ។

ចំណុចកណ្តាលនៃការរញ្ជួយដី គឺនៅ ទីក្នុង រដ្ឋ New Jersey ភាគកណ្តាល មានចម្ងាយប្រហែល ៦៤ គីឡូម៉ែត្រ ភាគខាងលិចទីក្រុងញូវយ៉ក។ ទីភ្នាក់ងារស្ទាបស្ទង់ភូមិសាស្ត្រសហរដ្ឋអាមេរិក និយាយថា វាបានកើតឡើង នៅជម្រៅ ៤,៧ គីឡូម៉ែត្រ ប៉ុន្តែគ្មានការខូចខាតទ្រង់ទ្រាយធំ ត្រូវបានគេរាយការណ៍នោះទេ ទោះបីជាអភិបាលរដ្ឋញូវយ៉ក លោកស្រី Kathy Hochul បានព្រមានអំពីលទ្ធភាពនៃការរញ្ជួយដីដ៏មហន្តរាយ នៅក្នុងសន្និសីទសារព័ត៌មានក៏ដោយ។

ក្រុមវិស្វកម្ម កំពុងត្រួតពិនិត្យផ្លូវ និងស្ពាន។ លោកស្រី បាននិយាយថា នេះគឺជាការរញ្ជួយដីធំបំផុតមួយនៅឆ្នេរខាងកើតក្នុងសតវត្សរ៍ចុងក្រោយនេះ។

នៅក្នុងសេចក្តីថ្លែងការណ៍មួយ អភិបាលក្រុងញូវយ៉ក លោក Eric Adams បាននិយាយថា ពុំមានអ្នករងរបួសណាម្នាក់ ត្រូវបានរាយការណ៍ទេ ប៉ុន្តែបានជំរុញឱ្យអ្នករស់នៅក្នុងទីក្រុង ចូលលាក់ខ្លួននៅក្រោមគ្រឿងសង្ហារឹម ឬនៅជាប់ជញ្ជាំងខាងក្នុងផ្ទះ ប្រសិនបើពួកគេគិតថាមានគ្រោះរញ្ជួយដី។ 

រដ្ឋបាលអាកាសចរណ៍សហព័ន្ធ (FAA) បានប្រាប់ក្រុមហ៊ុនអាកាសចរណ៍ថា ពួកគេអាចរំពឹងថាជើងហោះហើរនឹងត្រូវដំណើរការសម្រាប់អាកាសយានដ្ឋានទីក្រុងញូវយ៉ក រហូតដល់ពេលថ្ងៃត្រង់ដោយសារតែរញ្ជួយដី និងការពន្យារពេលពី ៣០ ទៅ ៤៥ នាទី។ 

យោងតាមគេហទំព័រតាមដានជើងហោះហើរ FlightAware បានឱ្យដឹងថា ជើងហោះហើរមួយចំនួនសម្រាប់ទីក្រុងញូវយ៉ក បានបង្វែរទៅអាកាសយានដ្ឋានផ្សេងទៀត។