ជើងហោះហើរជាង ១០០វ៉ុល ត្រូវបានពន្យារពេល ឬលុបចោល នៅអាកាសយានដ្ឋានស៊ីដនី (Sydney Airport) កាលពីថ្ងៃសុក្រ (ទី៥ ខែមេសា) ដោយសារអាកាសធាតុអាក្រក់ធ្ងន់ធ្ងរ បាន​បន្ត​មាន​ឥទ្ធិពល ចំពោះរដ្ឋ New South Wales ភាគខាងកើតនៃប្រទេសអូស្ត្រាលី។

អាកាសធាតុអាក្រក់ធ្ងន់ធ្ងរនេះ បានបណ្ដាលឲ្យមានភ្លៀងធ្លាក់ឥតឈប់ឈរ និងខ្យល់​បោក​បក់​ខ្លាំង​ដែលបង្កឲ្យមានជាទឹកជំនន់ និងការរំខាន នៅទូទាំងរដ្ឋ New South Wales ក្នុង​នោះ​រួម​ទាំង​នៅ​ទីក្រុងស៊ីដនី ដែលជារដ្ឋធានីរបស់រដ្ឋនេះផងដែរ។

គិតត្រឹមម៉ោង ១៤:៣០នាទី ម៉ោងក្នុងស្រុក ជើងហោះហើរអន្តរជាតិចំនួន ៦វ៉ុល និងជើង​ហោះ​ហើរ​ក្នុង​ស្រុកចំនួន ១០៩វ៉ុល ត្រូវបានលុបចោលរួចហើយ។ ដោយសារតែការលុបចោល និង​ការ​ពន្យារ​ពេលជើងហោះហើរ អ្នកដំណើរជាច្រើនត្រូវបានជាប់នៅព្រលានយន្តហោះនោះ។

គិតត្រឹមល្ងាចថ្ងៃសុក្រ តំបន់ជុំវិញទីក្រុងស៊ីដនីក្នុងរដ្ឋ New South Wales ឃើញ​មាន​កម្រិត​ភ្លៀង​ធ្លាក់​ដល់ ១៦០មីលីម៉ែត្រ ក្នុងរយៈពេល ៤៨ម៉ោង ដែលជាកម្រិតខ្ពស់បំផុត ក្នុងរយៈពេល ៤ឆ្នាំ។ ជាមួយគ្នានេះ ភ្លៀងក៏បានជះឥទ្ធិពលយ៉ាងខ្លាំងដល់ជីវិតប្រចាំថ្ងៃ និងការ​ធ្វើ​ដំណើរ​របស់​អ្នក​ស្រុក​ផងដែរ ដោយតំបន់មួយចំនួន បានជួបប្រទះនឹងការដាច់ចរន្តអគ្គិសនី និងទឹក។ ក្រៅ​ពី​នេះ ​ផ្លូវជាច្រើនត្រូវបានបិទ ខណៈខ្សែរថភ្លើងជាច្រើនត្រូវបានពន្យារពេល។ លើសពីនេះទៀត យ៉ាង​ហោចណាស់សាលារៀនចំនួន ១០កន្លែង ត្រូវបានបិទជាបណ្តោះអាសន្ន។

នាយកដ្ឋានឧតុនិយមក្នុងតំបន់បានព្រមានថា ភ្លៀងធ្លាក់ខ្លាំង និងស្ថានភាព​អាកាស​ធាតុ​អាក្រក់​ធ្ងន់​ធ្ងរ​នេះ ត្រូវបានរំពឹងថា នឹងបន្តមាននៅតំបន់មួយចំនួននៃរដ្ឋ New South Wales រហូត​ដល់​ថ្ងៃអាទិត្យ​៕