ដើម្បីពង្រឹងការតាមដានគុណភាពខ្យល់នៅក្នុងប្រទេសកម្ពុជា ក្រសួងបរិស្ថាន​បានបំពាក់​ឧបករណ៍​ពិនិត្យគុណភាពខ្យល់ចំនួន១២ទីតាំងបន្ថែមទៀត នៅតាមបណ្តាខេត្តមួយ​ចំនួ​ន​ក្នុង​ប្រទេស​កម្ពុជា។ នេះបើតាមការឱ្យដឹងពីឯកឧត្តម ខ្វៃ អាទិត្យា អ្នកនាំពាក្យក្រសួងបរិស្ថាន បាន​ប្រាប់BTV នៅថ្ងៃទី០៦ ខែមេសានេះ។

ឯកឧត្តម ខ្វៃ អាទិត្យា បានបន្តថា ទីតាំងចំនួន១២ ដែលក្រសួង​បរិស្ថាន​បាន​បំពាក់​ឧបករណ៍​ពិនិត្យ​គុណភាព​ខ្យល់បន្ថែមនោះរួមមាន៖ទី១.ការិយាល័យធនធានធម្មជាតិ និងបរិស្ថាន​ស្រុក​បាភ្នំ ខេត្តព្រៃវែង ទី២.ការិយាល័យធនធានធម្មជាតិ និងបរិស្ថានស្រុកកែវសីម៉ា ខេត្តមណ្ឌលគីរី ទី៣.សាលាបឋមសិក្សាបរកែវ ខេត្តរតនគីរី ទី៤.សាលាស្រុកថាឡាបរិវ៉ាត់ ខេត្តស្ទឹងត្រែង ទី៥.​សាលា​ស្រុកបុរីអូរស្វាយសែនជ័យ ខេត្តស្ទឹងត្រែង ទី៦.តំបន់សេដ្ឋកិច្ចពិសេស ខេត្តកោះកុង ទី៧.​ស្នាក់​ការរងឧទ្យានជាតិភ្នំព្រួស ខេត្តកែប ទី៨.សាលាស្រុកវាលវែង ខេត្តពោធិ៍សាត់ ទី៩.​ស្នាក់ការ​តំបន់​ប្រើប្រាស់​ច្រើនយ៉ាងសំឡូត-ប៉ៃលិន ខេត្តប៉ៃលិន ទី១០.សាលាស្រុកសំពៅលូន ខេត្តបាត់ដំបង ទី១១.សាលាស្រុកថ្មពួក ខេត្តបន្ទាយមានជ័យ និងទី១២.ស្នាក់​ការ​ឧទ្យានុរក្ស​កេស​កូល​ភ្នំគូលែន ខេត្តសៀមរាប។

ឯកឧត្តមបន្តថា បច្ចុប្បន្នឧបករណ៍ពិនិត្យគុណភាពខ្យល់នៅក្នុងប្រទេសកម្ពុជាសរុបចំនួន ៥៩ទីតាំង ហើយឧបករណ៍​នេះ​មានសារៈសំខាន់​ណាស់​ក្នុង​ការ​តាម​ដាន​គុណភាព​ខ្យល់​នៅ​ទូទាំង​ប្រទេស​កម្ពុជា ដោយឧបករណ៍នេះអាចត្រួតពិនិត្យប៉ារ៉ាម៉ែតសារធាតុបំពុលខ្យល់ ដូចជា ភាគ​ល្អិតនិចល PM2.5, PM10, CO, NO2, O3, SO2 សំណើម និងសីតុណ្ហភាព។

ក្រៅពីនេះ ឯកឧត្តមបានគូសបញ្ជាក់ថា បច្ចុប្បន្នគុណភាពខ្យល់នៅក្នុងប្រទេសកម្ពុជា ជា​ពិសេស​ខេត្តព្រំដែនកម្ពុជា-ថៃ មាន​ស្ថានភាព​ល្អប្រសើរ​ដោយ​យោង​តាម​ឧបករណ៍​តាម​ដាន​គុណភាព​ខ្យល់ និងរថយន្តចល័តដែលបានចុះត្រួតពិនិត្យថ្មីៗនេះរកឃើញថា លទ្ធផលភាគល្អិត PM2.5 ជា​មធ្យម​ក្នុងរយៈពេល២៤ម៉ោងចន្លោះពី១០ ទៅ ១៥ មីក្រូក្រាមក្នុង១ម៉ែត្រគូប ដោយ​ស្តង់ដារ​គិត​ជា​មធ្យម ៥០មីក្រូក្រាមក្នុង១ម៉ែត្រគូប។

ជាការកត់សំគាល់ ក្នុងរយៈពេល៣ខែកន្លងមកនេះ ក្រសួងបរិស្ថាន បានតាម​ដាន​គុណភាព​ខ្យល់​សាធារណៈ​ជា​ប្រចាំ នៅរាជធានីភ្នំពេញ ចំនួន១៧ទីតាំង និងតាមបណ្តាខេត្តទូទាំងប្រទេសចំនួន ៣៧ ទីតាំង និងបានបំពាក់ឧបករណ៍ត្រួតពិនិត្យថ្មី ចំនួន១២ទីតាំង នៅតាមបណ្តាខេត្ត បន្ថែម​លើ​ការ​បញ្ជូនរថយន្តត្រួតពិនិត្យគុណភាពខ្យល់ «វិស្ណុ» ចល័តទូទាំងប្រទេស។ ក្នុងត្រីមាសទី១ ឆ្នាំ​២០២៤ គុណភាពខ្យល់មានសភាពល្អប្រសើរ បើប្រៀប​ធៀប​ទៅ​នឹង​ស្តង់ដារ​គុណភាព​ខ្យល់​សាធារណៈ ​ដោយកម្រិតភាគល្អិតនិចល់ PM 2.5 ជាមធ្យមក្នុងរយៈពេល៣ខែនេះ ស្មើនឹង​២៣,៦០ មីក្រូក្រាមក្នុង១ម៉ែត្រគូប ប៉ុណ្ណោះ៕ អត្ថបទ៖ទូច សោភ័ណ