បន្ទាយមានជ័យ​ ៖ ឯកឧត្ដម​ ឌិត​ ទីណា​ រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទនិងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យបានអញ្ជើញសំណេះសំណាល​ និងសួរសុខទុក្ខកងកម្លាំងប្រដាប់អាវុធឈរជើងក្នុងភូមិសាស្រ្តខេត្តបន្ទាយមានជ័យ​ ក្នុងឱកាសបុណ្យចូលឆ្នាំថ្មី​ ប្រពៃណីជាតិ​ ឆ្នាំរោង​ ឆស័ក​ ពុទ្ធសករាជ២៥៦៨​ គ.ស២០២៤​ មានការចូលរួមពីឯកឧត្តម​ អ៊ុំ​ រាត្រី​ អភិបាលនៃគណៈអភិបាលខេត្ត​ ឯកឧត្តម​ ប្លែក​ វ៉ារី​ ប្រធានក្រុមប្រឹក្សាខេត្តឯកឧត្តម​ លោកជំទាវ​ ក្រុមការងារ​ មេបញ្ជាការកងកម្លាំងព្រមទាំងបីប្រភេទ លោក​ លោកស្រីមន្ទីរ​ អង្គភាពពាក់ព័ន្ធ​ អភិបាលក្រុង-ស្រុកបាន​ ចូលរួមប្រារព្ធធ្វើនៅបរិវេណសាលាខេត្តបន្ទាយមានជ័យ​ ថ្ងៃទី០៦​ ខែមេសា​ ឆ្នាំ២០២៤។ 

ឯកឧត្តម​ អ៊ុំ​ រាត្រី​ ថ្លែងអំណរគុណដ៏ជ្រាលជ្រៅ ប្រកបដោយមនោសញ្ចេតនាគោរពស្រឡាញ់ និងដឹងគុណដ៏កក់ក្តៅជាទីបំផុត ចំពោះកងកម្លាំងប្រដាប់អាវុធទូទាំងខេត្តបន្ទាយមានជ័យ ដែលបានលះបង់កម្លាំងកាយចិត្តក្នុងកិច្ចការងារការពារសន្តិសុខ​ សណ្តាប់ធ្នាប់​ ការពារបុព្វហេតុជាតិមាតុភូមិរហូតដល់កម្ពុជាទទួលបានសុខសន្តិភាព។ 

ក្នុងឱកាសនោះ​ ឯកឧត្តម​ ឌិត​ ទីណា​ មានប្រសាសន៍ថា​ កងកម្លាំង​ គឺជារបាំងការពារដ៏រឹងមាំក្នុងបុព្វហេតុជាតិ មាតុភូមិនៃយើង ដែលជា និច្ចកាល តែងតែបានសច្ចាប្រណិធានជាប់ជានិច្ចនូវស្មារតី គោរពស្រឡាញ់ ការពារ ជាតិ សាសនា និងព្រះមហាក្សត្រ ប្រយុទ្ធទប់ទល់ជាមួយខ្មាំងសត្រូវ រក្សាបូរណភាពដែនដីនៃព្រះរាជាណាចក្រ អច្ឆរិយៈនៃយើង។

ឯកឧត្តម​ ឌិត​ ទីណា​ ក៏បានបញ្ជាក់ថា​ ការផ្តល់សេវាសាធារណៈគោលដៅដ៏សំខាន់​ គឺចង់ឱ្យសេវាសាធារណៈ ខេត្តបន្ទាយមានជ័យក្លាយទៅជាសេវាសាធារណៈល្អដាច់គេនៅក្នុងទូទាំងប្រទេស​ ដោយឡែក​ការការពារសន្តិសុខក៏ជាសេវាសាធារណៈមួយយ៉ាងសំខាន់​មិនអាចខ្វះបាន ក្នុងការការពារជាតិ​ ដែលយេីងត្រូវយកចិត្តទុកដាក់ផងដែរ​៕​ អត្ថបទ​ រឿង​ ចន្ទ្រា