អង្គការកម្ពុជាអភិវឌ្ឍន៍សហគមន៍ និងបរិស្ថាន និងអង្គការ អុកស្វាម បានរួមគ្នារៀបចំពិព័រណ៍ «ឥទ្ធិពលនៃបរិយាបន្ន» ក្នុងគោលបំណងអបអរសារទរខួប ៨ឆ្នាំ នៃកិច្ចសហប្រតិបត្តិការ វឌ្ឍនភាព និង​សមិទ្ធផល ដែលសម្រេចបានជាមួយអង្គការដៃគូ និងក្រុមគោលដៅ និងការ​សម្រេច​បាន​ជោគជ័យគួរជាទីមោទននៃគម្រោង វ៉យ ក្នុងប្រទេសកម្ពុជា។

លោកស្រី ភាណ សោភ័ណ នាយិកាអង្គការអុកស្វាម នៅក្នុងកម្មវិធីកាលពីរសៀលនៅថ្ងៃទី៥ ខែ​មេសា ឆ្នាំ២០២៤ បានមានប្រសាសន៍ថា ការរៀបចំកម្មវិធីនេះឡើង ដើម្បីលើកកម្ពស់ និងពង្រឹង​ការ​ផ្សព្វផ្សាយ និង​បង្កើនការយល់ដឹងអំពីបរិយាបន្ន និងភាពចម្រុះ ដោយបាន​ពង្រឹង​ភាព​អង់អាច​ដល់​សហគមន៍​ដែលធ្វើការជាមួយ ដើម្បីជំរុញពួក​គេ​មាន​លទ្ធភាព​ចូលរួម​យ៉ាង​ពេញ​លេញ​លើ​គ្រប់ក​ម្រិត និងនៅក្នុងវេទិកានានា ចាប់ផ្តើមពីកម្រិតការអភិវឌ្ឍន៍សហគមន៍ រហូតដល់កិច្ច​ពិភាក្សា​កម្រិត​គោលនយោបាយ ដោយឈរទៅលើគោលការណ៍ "បរិយាបន្ន ដោយមិនទុក​នរណា​ម្នាក់​ចោល​ឡើយ។

ទាក់ទិននឹង វ៉យ លោកស្រីនាយិកា បានបញ្ជាក់ថា គឺជាកម្មវិធីផ្តល់ជំនួយ​ប្រកប​ដោយភាព​ច្នៃ​ប្រឌិត ដើម្បីគាំទ្រមនុស្ស និងក្រុមដែលប្រឈមនឹងភាពងាយរងគ្រោះ ឬការរើសអើង ដើម្បី​ពួក​គេ​​​មានលទ្ធភាព និងឥទ្ធិពល ទទួលបានធនធានសម្រាប់បង្កើនផលិតភាព ទទួលបាន​សេវា​សង្គម និងឱកាសចូលរួមក្នុងការធ្វើសេចក្តីសំរេចលើការអភិវឌ្ឍកម្រិតគោលនយោបាយ។ កម្មវិធី វ៉យ នេះដែរ មានគោលបំណងពង្រឹងសមត្ថភាព និងភាពអង់អាច​របស់​អង្គការ​សង្គម​ស៊ីវិល​តំណាង​ឲ្យ​ក្រុមគោលដៅដែលងាយរងគ្រោះ និងក្រុមដែលមានសម្លេងភាគតិច ដើម្បីមាន​ឥទ្ធិពល​ក្នុងការស្វែងរកមតិគាំទ្រ និងដើម្បីធានាថា សំឡេងរបស់ពួកគេត្រូវបានឮ និងឆ្លើយតប។

លោក ស៊ូ សុជាតិ នាយកប្រតិបត្តិរបស់អង្គការ Live & Learn Cambodia បានលើកឡើងថា ពិតជា​មានសារៈសំខាន់ណាស់ដែលមនុស្ស ឬក្រុមដែលប្រឈមនឹងភាពងាយរងគ្រោះ ឬការ​រើស​អើង មានកន្លែងសម្រាប់បញ្ចេញនិងលើកឡើងនូវកង្វល់របស់ពួកគេ ដើម្បីដោះស្រាយតម្រូវការ និង​អាទិភាពរបស់ពួកគេ។ លោកបានបន្តថា មានមោទនភាព​ក្នុង​ការ​សម្រប​សម្រួល​បង្កើត​ជា​កន្លែង​ និងការផ្តល់ឱ្យអង្គការដៃគូ និងក្រុមគោលដៅ​នូវ​ឱកាស​សម្រាប់​ការសន្ទនា​ប្រកប​ដោយ​អត្ថន័យ​ពេញ​លេញ និងការទំនាក់ទំនងគ្នាទៅវិញទៅមក រួមទាំងជាមួយ​អាជ្ញាធរ​ពាក់ព័ន្ធ​របស់​ពួក​គេ​ផង​ដែរ។

សូមបញ្ជាក់ថា កម្មវិធីនេះដែរ ក៏មានការតាំងបង្ហាញស្តង់ពិព័រណ៍, សិក្ខាសាលាចែករំលែក និង​រៀន​សូត្រ, សកម្មភាពជាក្រុម និងការដាក់បង្ហាញសមិទ្ធផលនៃគម្រោង ពីដៃអង្គការដៃគូទាំង២៦ របស់​កម្មវិធី វ៉យវគ្គទី២ (២០២១-២០២៤)។ តាមរយៈការបង្ហាញសាច់រឿង, ការជជែកពិភាក្សា និង​ការសម្តែង និងលើកឡើងអំពីដំណើរវិវត្តន៍​ឆ្ពោះទៅកាន់​បរិយាបន្ន​របស់​សហគមន៍​នៃ​ក្រុម​គោល​ដៅ​ទាំងអស់ រួមមានក្រុមជនមានពិការភាព ក្រុមអ្នកស្រលាញ់ភេទដូចគ្នា អ្នកប្តូរយេនឌ័រ ក្រុម​ស្ត្រីដែលប្រឈមមុខនឹងការកេងប្រវ័ញ្ច អំពើហិង្សា និង/ឬការរំលោភបំពាន ក្រុមយុវជន និង​មនុស្សវ័​យចាស់ដែលងាយរងគ្រោះ ក្រុមជនជាតិដើមភាគតិច និងជនជាតិភាគតិច៕ អត្ថបទ៖ ឈិត បូរ៉ាវី