អាជ្ញាធរអូស្ត្រាលីនៅថ្ងៃសៅរ៍ (ទី៦ ខែមេសា) នេះ បានឲ្យដឹងថា មនុស្សយ៉ាងហោចណាស់ ១៥២នាក់ ត្រូវបានជួយសង្គ្រោះពីទឹកជំនន់ នៅរដ្ឋ New South Wales ភាគខាងកើត បន្ទាប់ពីភ្លៀងធ្លាក់ខ្លាំង បានបង្កឲ្យមានការព្រមានដល់អ្នកស្រុកឲ្យផ្លាស់ទីទៅកាន់ទីខ្ពស់ៗ។

អាជ្ញាធរបាននិយាយថា ការជួយសង្គ្រោះចំនួន ៧២ដង ត្រូវបានធ្វើឡើងនៅក្នុងរដ្ឋធានី Sydney ដែលជាទីក្រុងធំបំផុតរបស់ប្រទេសអូស្ត្រាលី ជាកន្លែងដែលមានទឹកជំនន់ដ៏គ្រោះថ្នាក់ នៅក្នុងតំបន់ទំនាបជាយក្រុងមួយចំនួន។ សេវាសង្គ្រោះបន្ទាន់របស់រដ្ឋ New South Wales ដែលបានដោះស្រាយជាមួយការហៅទូរសព្ទសុំជំនួយចំនួន ៤.១២៨ដង ក្នុងរយៈពេល ២៤ម៉ោង រហូតដល់ម៉ោង ៥:០០ ម៉ោងក្នុងស្រុក បាននិយាយថា បទបញ្ជាឲ្យមានការជម្លៀសសង្គ្រោះបន្ទាន់ចំនួន ១៥ ត្រូវបានដាក់នៅទូទាំងរដ្ឋ។

ភ្លៀងធ្លាក់ខ្លាំងបានកើតមាននៅភាគអាគ្នេយ៍នៃប្រទេសអូស្ត្រាលី កាលពីថ្ងៃសុក្រ (ទី៥ ខែមេសា) ដែលស្ទើរតែស្មើនឹងភ្លៀងធ្លាក់ ១ខែមកលើទីក្រុងស៊ីដនី និងជំរុញឲ្យមានការព្រមានដល់ប្រជាជនឲ្យជៀសវាងការធ្វើដំណើរដែលមិនសំខាន់ និងស្នាក់នៅតែក្នុងផ្ទះ។

ទិន្នន័យពីអ្នកព្យាករណ៍អាកាសធាតុរបស់ប្រទេសបានបង្ហាញថា ទីក្រុងស៊ីដនីបានមានភ្លៀងធ្លាក់កម្រិត ១១១មីលីម៉ែត្រ ក្នុងរយៈពេល ២៤ម៉ោង ដល់ព្រឹកថ្ងៃសុក្រ ដោយជិតស្មើនឹងកម្រិតភ្លៀងធ្លាក់ជាមធ្យម ១២១,៥មីលីម៉ែត្រ សម្រាប់ខែមេសា៕