មន្ត្រីក្នុងតំបន់បានឲ្យដឹងថា ការវាយប្រហាររបស់រុស្ស៊ីលើទីក្រុង Kharkiv ដែលជាទីក្រុងធំបំផុត​ទី២ របស់ប្រទេសអ៊ុយក្រែន បានសម្លាប់ជនស៊ីវិលយ៉ាងហោចណាស់ ៦នាក់ និងរបួស ១០នាក់ នៅព្រឹកថ្ងៃសៅរ៍ (ទី៦ ខែមេសា) នេះ។

នករបាលជាតិអ៊ុយក្រែនបានប្រាប់ថា ការវាយប្រហារនេះ ធ្វើឡើងដោយយានដ្រូន។ មានការ​ផ្សព្វផ្សាយ​ពីរូបភាពនៃអណ្ដាតភ្លើងដែលបានឆាបឆេះ នៅតាមផ្លូវក្នុងទីក្រុង និងក្បែរអគារនានា។

សារព័ត៌មាន Reuters អាចបញ្ជាក់ទីតាំងពីប្លង់ផ្លូវ ការរចនាអគារលំនៅឋាន​ដែលមាន​ដូចជា​លក្ខណៈ និងបង្អួចរបស់អាគារនោះ អាជីវកម្មនៅក្បែរនោះ ភ្លើងតាមដងផ្លូវ ក៏ដូចជាស្លាកសញ្ញា​នៅក្នុង​រូបភាពដែលត្រូវគ្នានឹងរូបភាពនៃតំបន់នោះ។ តែយ៉ាងណាក្ដី សារព័ត៌មាន Reuters មិន​អាច​ផ្ទៀងផ្ទាត់​កាលបរិច្ឆេទដោយឯករាជ្យបានទេ។

ជាមួយគ្នានេះ យោធាអ៊ុយក្រែនបានឲ្យដឹងនៅលើបណ្ដាញសង្គម Facebook ថា ប្រព័ន្ធការពារ​ដែន​អាកាសរបស់ខ្លួន បានបំផ្លាញយានដ្រូនចំនួន ២៨គ្រឿង ក្នុងចំណោម ៣២គ្រឿង និងមីស៊ីល​ចំនួន ៣គ្រាប់ ក្នុងចំណោម ៦គ្រាប់ ដែលរុស្ស៊ីបានបាញ់។

គួរបញ្ជាក់ថា ទីក្រុង Kharkiv នៅភាគឦសានរបស់អ៊ុយក្រែន គឺជាគោលដៅ​របស់រុស្ស៊ី​ជាញឹក​ញាប់ ដោយមានការវាយប្រហារកាន់តែខ្លាំងឡើងៗ ក្នុងប៉ុន្មានសប្តាហ៍ថ្មីៗនេះ។ កាលពីថ្ងៃពុធ (ទី៣ ខែមេសា) ការវាយប្រហារដោយយានដ្រូនលើទីក្រុងនេះ បានសម្លាប់មនុស្ស ៣នាក់ ហើយ​អគារផ្ទះល្វែងបានរងការខូចខាតយ៉ាងធ្ងន់ធ្ងរ៕