និយ័តករធានារ៉ាប់រងកម្ពុជា (ន.ធ.ក.) និងបណ្តាក្រុមហ៊ុនធានារ៉ាប់រង បានឯកភាព​គ្នាលើ​ចំណុច​សំខាន់ៗ​ចំនួនបី ដើម្បីជាធាតុចូលនៅក្នុង​ការ​បង្កើន​កិច្ច​សហការ និង​ដោះស្រាយ​បញ្ហា​ប្រឈមនានា។

ការឯកភាពគ្នានេះ បានធ្វើឡើងនៅក្នុងវេទិកានិយ័តករ និងអគ្គនាយកធានារ៉ាប់រង ឆ្នាំ២០២៤ នៅល្ងាចថ្ងៃទី០៥ ខែមេសា ឆ្នាំ២០២៤ នៅក្រុងសៀមរាប។

ឯកឧត្តម ប៊ូ ច័ន្ទភីរូ អគ្គនាយក នៃនិយ័តករធានារ៉ាប់រងកម្ពុជា បានឲ្យដឹងថា វេទិកានិយ័តករ និង​អគ្គនាយក​ធានារ៉ាប់រង ឆ្នាំ២០២៤ នេះរៀបចំឡើងក្នុងគោលបំណង បង្កើន​កិច្ច​សហការ​រវាង​វិស័យរដ្ឋ និងឯកជនដើម្បីធានាបាននូវការអនុវត្តការងារប្រកបដោយប្រសិទ្ធភាព ស័ក្តិសិទ្ធភាព និង​អត្ថ​ប្រយោជន៍នៃការធានារ៉ាប់រង និងការធានារ៉ាប់រងជាកាតព្វកិច្ច និងផ្តល់​ឱកាស​ជូន​វិស័យ​ឯកជន​បង្ហាញ​ពីផលវិបាក បញ្ហាប្រឈមនានា ដែលកំពុងជួបប្រទះ​ក្នុង​ការ​ប្រកប​អាជីវកម្ម​កន្លង​មក ដើម្បីស្វែងយល់ និងរកដំណោះស្រាយរួមគ្នា ក្នុងគោលដៅពង្រីកសក្តានុពល ក៏ដូចជា​បង្កើន​ការ​យល់​ដឹងអំពីវិស័យធានារ៉ាប់រងឱ្យកាន់តែទូលំទូលាយដល់សាធារណជនទូទៅផងដែរ។

ក្នុងការបញ្ចៀស ហានិភ័យនានាដែលនឹងអាចកើតមានក្នុងពេលអនាគត ហើយជា​លទ្ធផល​វេទិកា​និយ័តករ និងអគ្គនាយកធានារ៉ាប់រង គ.ស.២០២៤ បានដោះស្រាយ និងឯកភាពលើ ៣ចំណុចរួមមាន៖ ទី១ ឯកភាពជំរុញការអនុវត្តបទប្បញ្ញត្តិជាធរមានចំពោះឯកសារ និងលក្ខ​ខណ្ឌតម្រូវ។ ទី២ ឯកភាពផ្តល់រយៈពេលគ្រប់គ្រាន់ដល់គ្រឹះស្ថានធានារ៉ាប់រងក្នុងការពិនិត្យ និង​ផ្តល់ធាតុចូល សម្រាប់កិច្ចពិគ្រោះយោបល់អំពីការរៀបចំលិខិតបទដ្ឋានគតិយុត្តពាក់ព័ន្ធ និងទី៣ ឯកភាពផ្តល់ការអនុញ្ញាតជាក់ស្តែងតាមករណីផលិតផលនីមួយៗលើកលែងតែផលិតផលដែលមានការពាក់ព័ន្ធ។

យោងតាមនិយ័តករធានារ៉ាប់រងកម្ពុជា បច្ចុប្បន្ននេះកម្ពុជា មានគ្រឹះស្ថាន​ធានា​រ៉ាប់​រង​សរុប​ចំនួន​៩៧ ដែលក្នុងនោះរួមមាន ក្រុមហ៊ុនធានារ៉ាប់រងទូទៅ ចំនួន១៨, ក្រុមហ៊ុនធានារ៉ាប់រងអាយុជីវិត, ក្រុមហ៊ុន​ធានារ៉ាប់រងខ្នាតតូច ចំនួន៧, ក្រុមហ៊ុនធានារ៉ាប់រងបន្ត ចំនួន១, ក្រុមហ៊ុនជើង​សារ​ធានា​រ៉ាប់រង ចំនួន២០, ក្រុមហ៊ុនភ្នាក់ងារធានាប្រាប់រ៉ាប់រង ចំនួន៣៤ និងក្រុមហ៊ុន​វាយ​តម្លៃ​ហានិភ័យ​ធានា​រ៉ាប់រង ចំនួន៣ កំពុងធ្វើប្រតិបត្តិការអាជីវកម្មធានារ៉ាប់រង៕