រដ្ឋមន្ត្រីការបរទេសរបស់កោះតៃវ៉ាន់ នៅថ្ងៃសៅរ៍ (ទី៦ ខែមេសា) នេះ បានរិះគន់ប្រទេសបូលីវី ចំពោះ​ការបង្ហាញសាមគ្គីភាពជាមួយប្រទេសចិន បន្ទាប់ពីមាន​គ្រោះរញ្ជួយ​ដីវាយ​ប្រហារ​លើ​កោះ​នេះ។

គួរ​បញ្ជាក់ថា មនុស្សយ៉ាងហោចណាស់ ១០នាក់ បានស្លាប់ និងជាង ១.១០០នាក់ បាន​រងរបួស​ដោយ​សារគ្រោះរញ្ជួយដីកម្រិត ៧,២រ៉ិចទ័រ ដែលបានវាយប្រហារកោះតៃវ៉ាន់ កាលពីថ្ងៃពុធ (ទី៣ ខែមេសា) ដោយការមានច្បាប់សាងសង់យ៉ាងតឹងរ៉ឹង និងការត្រៀមខ្លួនជាស្រេច សម្រាប់​គ្រោះ​មហន្តរាយ​គ្រប់ទីកន្លែង ត្រូវបានចាត់ទុកថា ជាការបញ្ចៀសបាននូវការខូចខាតធ្ងន់ធ្ងរជាងនេះ។

កាលពីថ្ងៃសុក្រ (ទី៥ ខែមេសា) ក្រសួងការបរទេសបូលីវីបានចេញសេចក្តីថ្លែងការណ៍មួយ ដោយ​និយាយ​ថា ប្រទេសនេះ «សូមបង្ហាញនូវ​សាមគ្គីភាព​របស់​ខ្លួន​ជាមួយ​សាធារណរដ្ឋ​ប្រជាមានិត​ចិន នៅចំពោះមុខការបាត់បង់អាយុជីវិត និងការខូច​ខាត​សម្ភារៈ​ធ្ងន់​ធ្ងរដែល​បណ្តាល​មក​ពី​គ្រោះរ​ញ្ជួយដីដ៏ធំមួយដែលបានកើតឡើងក្នុងរយៈពេលប៉ុន្មានម៉ោងថ្មីៗនេះ នៅឯឆ្នេរ​សមុទ្រ​របស់​កោះតៃវ៉ាន់»។

ពាក់ព័ន្ធនឹងសេចក្ដីថ្លែងការរបស់បូលីវីនោះ នៅថ្ងៃសៅរ៍នេះ តាមរយៈការ​បង្ហោះ​នៅ​លើ​បណ្ដាញ​សង្គម X រដ្ឋមន្ត្រីការបរទេសកោះតៃវ៉ាន់លោក Joseph Wu បានឲ្យដឹងថា៖ «អ្នកមិន​គួរ​ក្លាយ​ជា​អាយ៉ង​ដ៏​គួរ​ឲ្យអាណិត និងអាក្រក់របស់អ្នកវាតទីនិយម គឺ PRC (សាធារណរដ្ឋប្រជាមានិតចិន) ពោល​គឺ​ធ្វើតាមខ្សែញាក់របស់ទីក្រុងប៉េកាំងនោះឡើយ»។ លោកបានបន្ថែមថា៖ «មិនខុស​ពី​កោះតៃវ៉ាន់​ដែរ បូលីវីមិនមែនជាផ្នែកនៃប្រទេសចិនកុម្មុយនីស្តទេ។ មិនថា ច្រើន ឬក៏តិច»។

ដោយឡែក ក្រសួងការបរទេសតៃវ៉ាន់ក៏បានថ្កោលទោសសេចក្តីថ្លែងការណ៍របស់បូលីវីផងដែរ ដោយ​លើកឡើងថា ប្រទេសនេះកំពុងធ្វើតាមរដ្ឋាភិបាលចិន ដើម្បីផ្សព្វផ្សាយ​ការ​និយាយ​មិន​ពិត​ជា​អន្តរជាតិ ដែលមើលងាយដល់អធិបតេយ្យភាពរបស់យើង។

ទីក្រុងប៉េកាំង​បានអះអាងថា កោះតៃវ៉ាន់ជាទឹកដីរបស់ខ្លួន ហើយមិនដែលបោះបង់នូវគំនិត ក្នុង​ការ​ការ​ប្រើប្រាស់កម្លាំង ដើម្បីនាំយក​កោះដែល​គ្រប់​គ្រង​ដោយ​ខ្លួនឯង​នេះ​ឲ្យមក​ស្ថិត​ក្រោម​ការ​គ្រប់​គ្រង​របស់ខ្លួនឡើយ៕