សិស្សានុសិស្ស និងនាយកសាលាបានបញ្ជាក់ថា សង្ក្រាន្តឆ្នាំថ្មីនៅវិទ្យាល័យហ៊ុន សែន អង្គចក ស្រុក​ជុំគិរីឆ្នាំនេះរៀបចំបានល្អ ទាំងសន្តិសុខ សណ្តាប់ធ្នាប់ អនាម័យបរិស្ថាន ការតុបតែងលម្អ ការ​ចូលរួម​ទស្សនា ពិសេសបានបង្ហាញទម្រង់របាំ និងល្បែងប្រជាប្រិយខ្មែរជាច្រើនប្រភេទ សំដៅ​លើក​កម្ពស់សិល្បៈ វប្បធម៌ អរីយធម៌ ទំនៀមទម្លាប់របស់ខ្មែរសុទ្ធសាធ ញ៉ាំឲ្យសង្ក្រាន្ត​កាន់​តែ​មាន​ភាព​ទាក់ទាញ និងសប្បាយរីករាយជាងមុន ។

សិស្សានុសិស្សវិទ្យាល័យ ហ៊ុន សែន អង្គចក ស្ថិតនៅក្នុងភូមិត្រពាំងវែង ឃុំត្រពាំងរាំង ស្រុកជំគិរី ខេត្ត​កំពត បានលើកឡើងថា ពួកគេពិតជាសប្បាយរីករាយ និងមានមោទនភាពយ៉ាងខ្លាំង ដែល​ឆ្នាំ​នេះ​សាលារៀនបានរៀបចំសង្ក្រាន្តឆ្នាំថ្មីបានល្អ អធឹកអធម និងសប្បាយរីករាយជាងមុន។ ពួក​គាត់​បាន​បង្ហាញការកត់សំគាល់ថា សង្ក្រាន្តឆ្នាំនេះមានភាពទាក់ទាញខ្លាំង ដោយសារ​មាន​ការ​ចូល​សម្តែង​របាំ និងលេងល្បែងប្រជាប្រិយខ្មែរជាច្រើនប្រភេទ ពីក្រុមសិស្សានុសិស្ស។ ហើយ​ទិដ្ឋភាព​ និងបរិយាកាសជារួម នៃសង្ក្រាន្តឆ្នាំនេះ មើលទៅមានទម្រង់ជាខ្មែរសុទ្ធសាធ មិន​បាន​ចម្លង​ពី​ប្រទេសណាទេ ។ 

លោក កៅ ជ្រឿន នាយករងសាលាវិទ្យាល័យ ហ៊ុន សែន អង្គចក បានប្រាប់ឲ្យដឹងថា សង្ក្រាន្ត​វិទ្យាល័យ ហ៊ុន សែន អង្គចក រៀបចំបានល្អ ក្រោមបរិយាកាសសប្បាយរីករាយបំផុត ដោយមាន​ការ​ចូល​រួម​ពីអាជ្ញាធរ ថ្នាក់ដឹកនាំមន្ទីរ លោកគ្រូ អ្នកគ្រូ សិស្សានុសិស្ស និងប្រជាពលរដ្ឋ​មក​ទស្សនាជាង១ពាន់នាក់។ សង្ក្រាន្តរៀចំឡើងដោយផ្ទិតផ្ចង់បំផុត ដោយគិតទៅលើអត្ថរូប និង​អត្ថន័យ ដើម្បីបំផុសយុវជនឲ្យចូលរួមថែរក្សា សិល្បៈ វប្បធម៌ ប្រពៃណី ទំនៀមទម្លាប់ និង​ល្បែង​ប្រជាប្រិយ​របស់ខ្មែរ។ លោកបានបន្តថា កម្មវិធីមានដូចជា ការប្រគេនចង្ហាន់ដល់ព្រះសង្ឃ និ​ង​លើក​រាសី ការសម្តែងរបាំរបាំត្រុដិ របាំជូនពរ របាំគោះអង្រែ របាំពង្សាវតាខ្មែរ ការទស្សនា និង​ភ្លក់​ម្ហូប​អាហារដែលបានរៀបចំដោយសិស្សតាមតូបនីមួយៗ កម្មវិធីប្រឡងចម្រៀង ការលេងល្បែង​ប្រជាប្រិយ​ខ្មែរដូចជា៖ វាយក្អម ឆក់ស្លឹកឈើ ចោលឈូង លាក់កន្សែង ។ លោកបានបន្តថា តំណាង​ឲ្យ​គ្រូ និងសិស្សនៃវិទ្យាល័យហ៊ុន សែន អង្គចក សូមថ្លែងអំណរគុណដល់ថ្នាក់ដឹកនាំ ដែល​ស្វែង​រកសន្តិភាព និងការអភិវឌ្ឍន៍លើកគ្រប់វិស័យ ពិសេសបង្ក​ឱកាស​ឲ្យ​សាលា​រៀន​បាន​រៀបចំ​សង្ក្រាន្ត​ឆ្នាំថ្មីយ៉ាងសប្បាយរីករាយបំផុត។

ស្រុកជុំគិរី ជាអតីតសមរភូមិសង្គ្រាមអូសបន្លាយយូរជាងគេ ក្នុងចំណោមស្រុកទាំងអស់​របស់​ខេត្ត​កំពត ប៉ុន្តែបច្ចុប្បន្ន ជ្រកក្រោមម្លប់នៃសន្តិភាព ស្រុកជុំគិរី​មាន​ការ​អភិវឌ្ឍ​រីកច្រើនលើកគ្រប់វិស័យ ក្នុងនោះវិស័យអប់រំ កូនចៅប្រជាពលរដ្ឋមានឱកាសសិក្សារៀនសូត្របានគ្រប់ៗគ្នា ជាក់ស្តែង​សង្ក្រាន្ត​វិទ្យាល័យអាចដំណើរការទៅបានយ៉ាងរីករាយនាពេលនេះ ក៏ដោយសារតែ​មាន​ការ​ចូល​រួម​សហការសាមគ្គី រៀបចំពីសំណាក់សិស្សានុសិស្ស និងលោកគ្រូ អ្នកគ្រូទាំងអស់ផងដែរ៕