នគរបាលអ៊ីរ៉ង់ នៅថ្ងៃសៅរ៍ (ទី៦ ខែមេសា) បានប្រកាសពីការចាប់ខ្លួននៃសមាជិកជាន់ខ្ពស់​របស់​រដ្ឋឥស្លាម (IS) ជាមួយសមាជិក ២នាក់ផ្សេងទៀតនៃក្រុមដែលត្រូវបានសង្ស័យថា រៀប​ចំ​ផែន​ការ​វាយប្រហារអត្តឃាត អំឡុងពេលនៃការប្រារព្ធពិធី នាសប្តាហ៍ក្រោយ ដែល​ជា​ការ​បញ្ចប់​នៃ​ខែ​ដ៏ពិសិដ្ឋរបស់ពិធីបុណ្យរ៉ាម៉ាដាន។

បើយោងតាមប្រព័ន្ធផ្សព្វផ្សាយអ៊ីរ៉ង់ បានឲ្យដឹងថា នគរបាលបាននិយាយថា ជនសង្ស័យឈ្មោះ Mohammad Zaker ដែលគេស្គាល់ថា «Ramesh» និង២នាក់ទៀត ត្រូវបានចាប់ខ្លួននៅទីក្រុង Karaj ភាគខាងលិចនៃរដ្ឋធានីតេអេរ៉ង់ បន្ទាប់ពីមានការប៉ះទង្គិចគ្នា។ ពួកគេបាននិយាយថា មនុស្ស ៨នាក់ផ្សេងទៀតដែលរួមដំណើរជាមួយបុរសទាំងនោះ ក៏ត្រូវបានចាប់ខ្លួនផងដែរ។

ក្រុមរដ្ឋឥស្លាមបានអះអាងទទួលខុសត្រូវ ចំពោះការផ្ទុះចំនួន២ នៅអ៊ីរ៉ង់ កាលពីខែមករា ដែល​ហេតុ​ការណ៍​នោះបានសម្លាប់មនុស្សជិត ១០០នាក់ និងរបួសជាច្រើននាក់ នៅឯ​ពិធី​រំលឹក​ខួប​លើកទី៤ នៃការធ្វើឃាតលើមេបញ្ជាការជាន់ខ្ពស់លោក Qassem Soleimani នៅប្រទេសអ៊ីរ៉ាក់ កាល​ពី​ឆ្នាំ២០២០ ដោយយានដ្រូនរបស់សហរដ្ឋអាមេរិក។

បន្ទាប់ពីមានហេតុការណ៍ នាពេលនោះ នៅក្នុងសេចក្តីថ្លែង​ការណ៍​មួយ​ដែល​បាន​បង្ហោះ​នៅ​លើ​កម្ម​វិធី​ផ្ញើសារ Telegram របស់ខ្លួន ក្រុមសកម្មប្រយុទ្ធមូស្លីមនិកាយ Sunni ដែលមាន​ការស្អប់​ខ្ពើម​យ៉ាង​ខ្លាំង ចំពោះនិកាយ Shi'ite ដ៏មានឥទ្ធិពលរបស់ប្រទេសអ៊ីរ៉ង់ បាននិយាយថា សមាជិក IS ២នាក់ បានបំផ្ទុះគ្រាប់បែកចងនឹងចង្កេះ នៅក្នុងហ្វូងមនុស្សដែល​បាន​ប្រមូល​ផ្តុំ​នៅ​ទី​បញ្ចុះ​សព ក្នុងទីក្រុង Kerman ភាគអាគ្នេយ៍អ៊ីរ៉ង់៕