ក្រុមអ្នកជួយសង្គ្រោះ នៅថ្ងៃសៅរ៍ (ទី៦ ខែមេសា) នេះ គ្រោងនឹងនាំយកឧបករណ៍ធុនធ្ងន់ទៅទាញយក សាកសពមនុស្ស ២នាក់ដែលកប់ក្រោមផ្ទាំងថ្ម នៅលើផ្លូវឡើងភ្នំ ដោយមានរយៈពេល ៣ថ្ងៃបន្ទាប់ពីមានគ្រោះរញ្ជួយដីដ៏ខ្លាំងបំផុតនៅកោះតៃវ៉ាន់ជាលើកដំបូងក្នុងរយៈពេល ២៥ឆ្នាំ។

មនុស្ស ៤នាក់ទៀត នៅតែបាត់ខ្លួននៅផ្លូវ Shakadang តែមួយ នៅក្នុងឧទ្យានជាតិ Taroko ដែលជាកន្លែងដ៏ល្បីល្បាញដោយសារសណ្ឋានដីភ្នំដ៏ក្រាស់របស់តំបន់នេះ។ ការងារស្វែងរក និងស្តារឡើងវិញ ត្រូវបានកំណត់ឲ្យចាប់ផ្ដើមឡើងវិញ បន្ទាប់ពីត្រូវបានផ្អាកកាលពីរសៀលថ្ងៃសុក្រ ដោយសារនៅមានរលករញ្ជួយ។

សូមបញ្ជាក់ថា យ៉ាងហោចណាស់មនុស្ស ១២នាក់បានស្លាប់ដោយសារការរញ្ជួយដីកម្រិត ៧,២រ៉ិចទ័រ ដែលបានវាយប្រហារកាលពីព្រឹកថ្ងៃពុធ នៅឯឆ្នេរសមុទ្រភាគខាងកើតរបស់កោះតៃវ៉ាន់ ហើយមនុស្ស ១០នាក់ផ្សេងទៀត នៅតែបាត់ខ្លួន។

យ៉ាងណាក្ដី មនុស្សជាង ៦០០នាក់ ក្នុងនោះរួមទាំងប្រហែល ៤៥០នាក់ នៅសណ្ឋាគារមួយ ក្នុងឧទ្យានជាតិ Taroko ផងដែរ នៅតែជាប់ទៅណាមិនរួច នៅតាមទីតាំងផ្សេងៗ ដែលត្រូវបានកាត់ផ្តាច់ដោយសារបំណាក់ដី និងការខូចខាតផ្សេងទៀត៕