ភ្នំពេញ៖ រាជធានីភ្នំពេញ និងទីក្រុងហូជីមិញមានកិច្ចសហប្រតិបត្តិការល្អ ទាំងវីស័យវប្បធម៌ សេដ្ឋកិច្ចការអប់រំ និងទេសចរណ៍ជាដើម ហើយរាជធានីភ្នំពេញក៏ជាទីក្រុងមួយដែលបានពង្រីកខ្លួនកាន់តែខ្លាំងក្លា ជាមួយនិងការអភិវឌ្ឍយ៉ាងឆាប់រហ័ស មានអគារខ្ពស់ៗជាច្រើន ដែលធ្វើឲ្យកំណើនសេដ្ឋកិច្ចមានការកើនឡើងជាលំដាប់។

នេះជាការលើកឡើងរបស់ឯកឧត្ដម ង្វៀម វ៉ានណាម ឧត្ដមសេនីយ៍ទោ មេបញ្ជាការស្នាក់ការកណ្តាលយោធាទីក្រុងហូជីមិញ និងជាប្រធានសមាគមមិត្តភាពកម្ពុជា-វៀតណាមប្រចាំទីក្រុងហូជីមិញ ខណៈដែលឯកឧត្ដម ដឹកនាំប្រតិភូមកជួបសំណេះសំណាល ជាមួយ ឯកឧត្ដម ឃួង ស្រេង អភិបាលរាជធានីភ្នំពេញ និងឯកឧត្ដម ម៉ប់ សារិន ប្រធានក្រុមប្រឹក្សារាជធានីភ្នំពេញ ក្នុងបុណ្យចូលឆ្នាំថ្មីប្រពៃណីជាតិ នាព្រឹកថ្ងៃទី០៧ ខែមេសា ឆ្នាំ២០២៤នេះ នៅសាលារាជធានីភ្នំពេញ។

ឯកឧត្ដម ង្វៀម វ៉ានណាម បានលើកឡើងទៀតថា កម្ពុជា និងវៀតណាម ឲ្យតែមាន​ពិធីបុណ្យ​ចូលឆ្នាំថ្មី​ប្រពៃណីជាតិនៃប្រទេសទាំងពីរតែងបានជួបសំណេះសំណាល និងជូនពរគ្នា​ទៅវិញទៅមក ដែលនេះជាប្រពៃណីដ៏ល្អរវាងប្រទេសទាំងពីរ ក្នុងនាមជាអ្នកជិតខាងគ្នា ហើយការជួបគ្នានេះក៏ដើម្បីពង្រឹង ពង្រីក កិច្ចសហប្រតិបត្តិការរវាងទីក្រុងនិងទីក្រុងឲ្យកាន់​តែល្អប្រសើរឡើងបន្ថែមទៀតផងដែរ។ទំនាក់ទំនងនៃប្រទេសទាំងពីរបានជំរុញ​ឲ្យទីក្រុងមួយ​ចំនួនរបស់រៀតណាម បានចងសម្ព័ន្ធមេត្រីភាពជាមួយនឹងរាជធានីភ្នំពេញផងដែរ ក្នុងនោះ​ទីក្រុងហូជីមិញក៏បានចងសម្ព័ន្ធមេត្រីភាពជាមួយរាជធានីភ្នំពេញ។ មិនត្រឹមតែប៉ុណ្ណោះទេ កងពលមួយចំនួនរបស់កម្ពុជារួមជាមួយ និងកងរាជអាវុធហត្ថលើផ្ទៃប្រទេស និងកងរាជអាវុធ​ហត្ថរាជធានីភ្នំពេញក៏បានចងសម្ព័ន្ធមេត្រីភាពជាមួយទីក្រុងហូជីមិញផងដែរ ដែលធ្វើឲ្យទំនាក់ទំនង​កាទូត​នៃប្រទេសទាំង២កាន់តែល្អប្រសើរថែមទៀត។

ឯកឧត្ដម ឃួង ស្រេង បានមានប្រសាសន៍ថា វៀតណាមនិងកម្ពុជា គឺមានទំនាក់ទំនងការទូតជាមួយគ្នា តាំងពីថ្ងៃទី២៥ ខែមិថុនា ឆ្នាំ១៩៦៧ ដែលគិតមកដល់ពេល​នេះមានរយៈពេល៥៧ឆ្នាំហើយ ជាទំនាក់ទំនងគ្រប់ជ្រុងជ្រោយ និងយូរអង្វែង។ ជាមួយនឹងទំនាក់ទំនងសហប្រតិបត្តិការដ៏ល្អនេះ នាំឲ្យមានអ្នកវិនិយោគទុនវៀតណាម បានមកវិនិយោគទុននៅកម្ពុជាយ៉ាងច្រើនសន្ធឹកសន្ធាប់ ដែលបានធ្វើឲ្យទំហំពាណិជ្ជកម្មរបស់​វៀតណាម​នៅកម្ពុជាបានការឡើងជាលំដាប់ផងដែរ។ បន្ថែមពីនេះសម្រាប់យុវជនកម្ពុជា និង​យុវជនវៀតណាម​ក៏បានធ្វើទំនាក់ទំនងគ្នាល្អ ​និងមានភាពរឹងមាំផងដែរ សម្រាប់បន្តទំនាក់ទំនង​នេះកាន់តែល្អទៅថ្ងៃអនាគត។ ផ្ដើមចេញពីទំនាក់ទំនងការទូតរវាងវៀតណាមនិងកម្ពុជានាពេលនេះ នឹងបន្តពូនជ្រុំទៅដល់យុវជនជំនន់ក្រោយ បន្តទំនាក់ទំនងនេះកាន់តែល្អបន្ថែមទៀត​ទៅថ្ងៃអនាគត។

ឯកឧត្ដម ឃួង ស្រេង មានប្រសាសន៍បន្តទៀតថា តាមគោលនយោបាយរាជរដ្ឋាភិបាល​ដឹកនាំ​ដោយសម្ដេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី នៃព្រះរាជាណាចក្រកម្ពុជា​គឺការរិតចំណង​សាមគ្គីភាពជាមួយវៀតណាមឲ្យកាន់តែរឹងមាំ និងយូរអង្វែង ដើម្បីប្រយោជន៍​នៃប្រជាជនទាំង២ កម្ពុជា-វៀតណាម៕ អត្ថបទ ៖ ប្រាក់ វ៉ាន់ដា