ក្រោយមានបទបញ្ជាពីសម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា ឱ្យចុះបង្ក្រាបបទល្មើសធនធានធម្មជាតិនៅតំបន់ដីអភិរក្សរបស់រដ្ឋ ចាប់ពីដើមខែមីនា រហូតមកដល់ដើមខែមេសា ឆ្នាំ ២០២៤នេះ ក្រុមការងារចម្រុះមកពីក្រសួងបរិស្ថាន កងរាជអាវុធហត្ថលើផ្ទៃប្រទេស និងកងកម្លាំងគណៈបញ្ជាឯកភាពខេត្ត បានចុះឃ្លុំផ្ទៃដីដែលរងការទន្រ្ទានបានជិត២ម៉ឺនហិកតា និងឃាត់ខ្លួនមនុស្ស ៤៧ នាក់ ក្នុងនោះបញ្ជូនទៅតុលាការ១៨នាក់។ នេះបើតាមការបញ្ជាក់របស់ ឯកឧត្តម ខ្វៃ អាទិត្យា អនុរដ្ឋលេខាធិការ និងជាអ្នកនាំពាក្យក្រសួងបរិស្ថាន។
ឯកឧត្តម ខ្វៃ អាទិត្យា បានឱ្យដឹងតាមរយៈកិច្ចសម្ភាសន៍ជាមួយទូរទស្សន៍ BTV កាលពីថ្ងៃទី៧ ខែមេសានេះថា ក្រោមពីមានបទបញ្ជារបស់សម្ដេចធិបតី នាយករដ្ឋមន្រ្ដី អាជ្ញាធរនៅគ្រប់ខេត្តទាំងអស់ដែលមានតំបន់ការពារធម្មជាតិ គឺបានប្រតិបត្តិការយ៉ាងសស្រាក់សស្រាំ ទប់ស្កាត់បទល្មើស ការរុករានទន្រ្ទានដីព្រៃរបស់រដ្ឋ ដែលសកម្មភាពនេះ គឺជាប្រតិបត្តិការដ៏ធំរបស់រាជរដ្ឋាភិបាលនៅក្នុងអាណត្តិទី៧នេះ ដែលបានយកចិត្តទុកដាក់ទៅលើការការពារបរិស្ថាន និងធនធានធម្មជាតិនៅក្នុងប្រទេសកម្ពុជា។
ឯកឧត្តមថ្លែងថា ក្នុងពេលអនុវត្តយុទ្ធនាការបង្ក្រាបបទល្មើសធនធានធម្មជាតិនៅក្នុងខេត្តពោធិ៍សាត់ ដែលបានចាប់ផ្ដើមកាលពីថ្ងៃទី១១ ខែមីនា ឆ្នាំ ២០២៤ ដែលមានការដឹកនាំ និងបញ្ជាដោយផ្ទាល់ដោយ នាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស និងឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន រួមជាមួយនឹងអភិបាលខេត្តពោធិ៍សាត់ ដែលជាប្រធានគណៈបញ្ជាការឯកភាពខេត្ត បានពិភាក្សាគ្នា និងសម្ដេចចុះអន្តរាគមន៍បង្ក្រាបបទល្មើសធនធានធម្មជាតិនេះ នៅក្នុងស្រុកចំនួនពីរ គឺស្រុកវាលវែង និងស្រុកភ្នំក្រវាញ។
ក្នុងនោះកម្លាំងចម្រុះសរុបចំនួន ៧៨៩នាក់ ដោយបែងចែកជាក្រុមតូចៗចំនួន ១០ ក្រុមបន្ថែមទៀត សម្រាប់ធ្វើប្រត្តិបត្ដិការ ទប់ស្កាក់បទល្មើស ការកាប់ទន្រ្ទាន រុករានដីព្រៃ នៅក្នុងតំបន់ការពារធម្មជាតិ ដោយបានកងកម្លាំងចម្រុះ បានឃ្លុំដីបានជិត ២ម៉ឺនហិកតា ឃាត់មនុស្ស ៤៧ នាក់ និងបញ្ជូនទៅតុលាការចំនួន ១៨ នាក់។
សូមបញ្ជាក់ថា ប្រតិបត្តិការបង្រ្កាប ទប់ស្កាត់បទល្មើសធនធានធម្មជាតិ នៅតាមបណ្ដាខេត្តមានតំបន់ការពារធម្មជាតិ ជាពិសេសនៅខេត្តពោធិ៍សាត់ មានទ្រង់ទ្រាយធំ និងបានរៀបចំឡើងបន្ទាប់ពីមានបញ្ជារបស់សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បញ្ជាឱ្យក្រសួងបរិស្ថាន ក្រសួង ស្ថាប័ន ព្រមទាំងអាជ្ញាធរពាក់ព័ន្ធ ពង្រឹងការគ្រប់គ្រងធនធានធម្មជាតិទូទាំងប្រទេស និងអនុវត្តច្បាប់ឱ្យបានតឹងរឹង ចំពោះអ្នកប្រព្រឹត្តបទល្មើសព្រៃឈើ៕ អត្ថបទ៖ វ៉ន ដារ៉ា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
