នៅថ្ងៃទី ៨ ខែមេសានេះ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ បាន​បើក​សន្និបាត​បូក​សរុ​ប​លទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងផែនការ។ ក្នុង​ពិធី​បើកឯកឧត្តម ប៊ិន ត្រឈៃ ថ្លែងថា រហូតមកដល់​បច្ចុប្បន្ន​ក្រសួង​ផែនការ​បាន​កំណត់​អត្ត​សញ្ញាណ​គ្រួសារក្រីក្របានប្រមាណ១លាន២សែនគ្រួសារ ហើយបច្ចុប្បន្នគ្រួសារ​ទាំង​នោះ​បាន​ទទួល​អត្ថ​ប្រយោជន៍ពីរាជរដ្ឋាភិបាល។

ឯកឧត្តម រដ្ឋមន្ត្រី ប៊ិន ត្រឈៃ ថ្លែងថា ក្រសួងផែនការជាសេនារបស់រាជរដ្ឋាភិបាល បាន​ធ្វើ​ការងារ​កំណត់អត្តសញ្ញាណកម្មគ្រួសារក្រីក្រ និងគ្រួសារងាយរងហានីភ័យដំបូងនៅឆ្នាំ២០០៦ រហូត​មក​ដល់ឆ្នាំ២០២៣នេះ ក្រសួងផែនការបានកំណត់អត្តសញ្ញាណកម្មគ្រួសារ និង​គ្រួសារ​ងាយ​រង​ហានីភ័យ បានប្រមាណ១លាន២សែនគ្រួសារសរុបមនុស្សប្រមាណជាង៥លាននាក់ ក្នុង ១.២លានគ្រួសារនេះ មានគ្រួសារក្រីក្រជាង ៨០ ម៉ឺនគ្រួសា គ្រួសារងាយរងហានិភ័យ ៤០ ម៉ឺន​គ្រួសារ និងគ្រួសារដែលមានផ្ទុកជំអងឺអេដស៍ និងមេរោគអេដស៍ ២ ម៉ឺនគ្រួសារ។

ឯកឧត្តម ប៊ិន ត្រឈៃ ថ្លែងថា ទិន្នន័យ​ពី​ការ​ធ្វើ​អត្ត​សញ្ញាណ​កម្ម​គ្រួសារ​ក្រីក្រ​ត្រូវ​បាន​យក​ទៅ​ប្រើប្រាស់​ក្នុងកម្មវិធីគាំពារសង្គម និងជំនួយសង្គមផ្សេងៗ ហើយបច្ចុប្បន្នក្រសួងបាននិងកំពុងគិតគូធ្វើនវានុវត្តន៍និងបដិវត្តន៍កម្មឌីជីថល នៃនីតិវិធី​កំណត់​អត្ត​សញ្ញាណ​កម្មគ្រួសារក្រីក្រ សំដៅបង្កើនប្រសិទ្ធភាព កាត់បន្ថយពេលវេលា ផ្តល់និន្នន័យដែល​មាន​បច្ចុប្បន្ន​ភាព និងកាត់បន្ថយការចំណាយក្នុងការអនុវត្តផងដែរ។

ឯកឧត្តម ថេង បញ្ញាធន ប្រតិភូរាជរដ្ឋាភិបាលកម្ពុជា ទទួលបន្ទុក​អគ្គនាយកដ្ឋាន​ផែនការ​នៃ​ក្រសួង​ផែន​ការ ថ្លែងថា ការចុះបញ្ជីឈ្មោះគ្រួសារក្រីក្រ នៅតាមមូលដ្ឋានឃុំសង្កាត់ បច្ចុប្បន្នគឺធ្វើ​តាម​គោលការណ៍ច្បាស់លាស់ និងមានប្រាំជំហាន រួមមាន៖ ១ ការដាក់ពាក្យ​សុំ​សម្ភាសន៍​គ្រួសា​រ​ក្រីក្រ​ ២ក្រុមការងារឃុំសង្កាត់សម្រេចលើពាក្យសុំ ៣ ក្រុមការងារចុះសម្ភាសន៍ ៤ ក្រុម​ការងារ​ឃុំ​សង្កាត់​ធ្វើ​សុពលភាពសម្ភាសន៍ និងទី៥ ផលិតផ្តល់បណ្ណមូលនីធិសមធម៌ ហើយបច្ចុប្បន្ន​ក្រុម​ការងារ​ក៏​កំពុងត្រៀមខ្លួនអនុវត្តកម្មវិធីកញ្ចប់គ្រួសារពេលអនាគត ។

ឯកឧត្តម បន្តថា ក្រៅពីនេះ ក្រសួងក៏ធ្វើការងារគាំទ្រនានាទៀត រួមមាន៖ ការវាស់វែង​ភាព​ក្រីក្ររ​បស់​កុមារ និងប្រជាជនកម្ពុជាដោយផ្អែកលើចំណូលចំណាយ និងផែ្អកលើពហុសមាភាគ ការងារ​លើក​កម្ពស់ស្ថា​នភាពអាហារូបត្ថម និងតាមរយៈការបញ្ចូលមីក្រួសារជាតិក្នុងចំណីជាដើម៕ អត្ថបទ៖ ស៊ុម សុខជា