លោកជំទាវ ជា ផល្គុន ប្រធានកិត្តិយសគណៈកម្មការសាខាសមាគមនារីកម្ពុជាដើម្បីសន្តិភាព និង​អភិវឌ្ឍន៍ក្រសួងសង្គមកិច្ច អតីតយុទ្ធជន និងយុវនីតិសម្បទា និងថ្នាក់ដឹកនាំក្រសួង រួម​ទាំង​ស្ថាប័ន​ពាក់ព័ន្ធ អង្គការជាតិ អន្តរជាតិ សប្បុរសជន និងវិស័យឯកជន បានចុះជួប​សំណេះ​សំណាល​សួរ​សុខទុក្ខ និងចែកអំណោយជូនដល់គ្រួសារក្រីក្រ និងងាយរងគ្រោះ រស់​នៅ​ក្រុង​តាខ្មៅ​សរុប​ចំនួន ៣២៣គ្រួសារ នៅសមាគមកុមារនៃក្ដីសង្ឃឹមកម្ពុជា ស្ថិតនៅក្រុងតាខ្មៅ ខេត្ត​កណ្ដាល។

ការចុះសួរសុខទុក្ខ និងចែកអំណោយនេះ ប្រព្រឹត្តិទៅនៅរសៀលថ្ងៃទី ៧ ខែមេសា ឆ្នាំ ២០២៤។ ពិធី​នេះ​រៀបចំឡើង ស្របនឹងឱកាសអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ដែល​នឹង​ចូល​មក​ដល់​ក្នុងពេលខាងមុខនេះ។

លោកជំទាវ ជា ផល្គុន ប្រធានកិត្តិយសគណៈកម្មការសាខាសមាគមនារីកម្ពុជាដើម្បីសន្តិភាព និង​អភិវឌ្ឍន៍ នៃក្រសួងសង្គមកិច្ច អតីតយុទ្ធជន និងយុវនីតិសម្បទា បានលើកឡើងថា សកម្មភាព​នេះ​បង្ហាញ​ពី​ការយកចិត្តទុករបស់រាជរដ្ឋាភិបាល និងស្ថាប័នពាក់ព័ន្ធទាំងអស់ ដល់កុមារ និងក្រុម​គ្រួសារ​កុមារ​រងគ្រោះ និងងាយរងគ្រោះ។ លើសពីនេះ គឺ ស្របពេលដែល​រាជ​រដ្ឋាភិបាល​កម្ពុជា​បាន​បង្កើន​ការយកចិត្តទុកដាក់ជួយទ្រទ្រង់ដល់ជីវភាពរស់នៅរបស់ប្រជាពលរដ្ឋ ដោយ​បាន​ដាក់​ចេញ​នូវ​កម្មវិធីជាតិជំនួយសង្គមក្នុងកញ្ចប់គ្រួសារ។ កម្មវិធីនេះ​ដែរ​គឺ​បាន​សមាហរណ​កម្ម​កម្ម​វិធី​ចំនួន​៤​បញ្ចូលគ្នារួមមាន កម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម២ឆ្នាំ កម្មវិធីអាហារូបករណ៍សម្រាប់សិស្សក្រីក្រនៅបឋមសិក្សា និងមធ្យមសិក្សាចំណេះទូទៅ កម្មវិធី​ឧបត្ថម្ភ​សាច់ប្រាក់ជូនជនមានពិការភាព  កម្មវិធីឧបត្ថម្ភសាច់ប្រាក់ជូនជនចាស់ជរា (អាយុ៦០​ឆ្នាំ​ឡើង​) និងមានរួមបញ្ចូលការ ឧបត្ថម្ភគោលសម្រាប់គ្រួសារ និងឧបត្ថម្ភ​សមាជិក​គ្រួសារ​អ្នក​ផ្ទុក​មេរោគ​អេដស៍ និងជំងឺអេដស៍ដែលនឹងចាប់ផ្តើមអនុវត្តជាផ្លូវការនៅក្នុងអំឡុងខែមេសា ឆ្នាំ​២០២៤​តទៅ។

លោកជំទាវបានសំណូមពរឱ្យ សប្បុរសជននានា បន្តរួមសហការ​គ្នា​លុប​បំបា​ត់​ការ​រើសអើង​ចំពោះ​ជន​ងាយ​រងគ្រោះផ្សេងៗទៀត ហើយបង្ក លក្ខណ:ងាយស្រួល មានលទ្ធភាពគ្រប់គ្រាន់ ក្នុង​ការ​ចូល​រួម​គ្រប់សកម្មភាពសប្បុរសធម៌។

សូមបញ្ជាក់ថា ក្នុងពិធីចែកអំណោយនេះ ក្នុង១គ្រួសារទទួលបាន អង្ករ៧គីឡូក្នុងកុមារ១នាក់ មីយើង​១​កេសក្នុង១គ្រួសារ ទឹកសុទ្ធ១កេសក្នុង១គ្រួសារ ត្រីខកំប៉ុង១យួរក្នុង១គ្រួសារ ទឹក​ស៊ី​អ៊ីវ​១​យួរ​ក្នុង១គ្រួសារ ទឹកត្រី១យួរក្នុង១គ្រួសារ និងអាហារសម្រន់១ប្រអប់ក្នុង១គ្រួសារ៕ អត្ថបទ៖ គឹមហុក