កម្ពុជានឹងធ្វើជាម្ចាស់ផ្ទះនៃកិច្ចប្រជុំចំនួនពីរ គឺកិច្ចប្រជុំកំពូលសាកលស្តីពីបច្ចេកវិទ្យា និង​សេដ្ឋកិច្ច​ចិន និងកិច្ចប្រជុំកំពូល ស្តីពីសហគ្រិនភាព និងសេដ្ឋកិច្ចអាស៊ី ឆ្នាំ២០២៤នេះ ដោយ​កិច្ច​ប្រជុំ​នេះ គឺនឹងរៀបចំឡើងដោយវិទ្យាស្ថានយុទ្ធសាស្រ្តKSI។

នៅក្នុងកិច្ចជំនួបជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជានាថ្ងៃទី៨ ខែ​មេសា ឆ្នាំ២០២៤នេះ ឱ្យលោក តាន់ ស្រ៊ី មីសែល យ៉ាវ (Tan Sri Michael Yeoh) ប្រធាន​វិទ្យា​ស្ថាន​យុទ្ធសាស្រ្ត KSI ប្រចាំតំបន់អាស៊ីប៉ាស៊ីហ្វិក បានថ្លែង កោតសរសើរ និងវាយតម្លៃ​ខ្ពស់​ចំពោះ​ការ​អភិវឌ្ឍរីកចម្រើនលើគ្រប់វិស័យរបស់កម្ពុជារហូតដល់ពេលបច្ចុប្បន្ននេះ ហើយ​លោក​មាន​ជំនឿ​ជាក់​ថា ក្រោមការដឹកនាំរបស់សម្តេចធិបតី កម្ពុជានឹងមានការអភិវឌ្ឍ និង​រីក​ចម្រើន​កាន់​តែ​ខ្លាំង​ក្លាបន្ថែមទៀតផងដែរ។

លោកប្រធាន​វិទ្យាស្ថាន ក៏បានគោរពជម្រាបជូនសម្តេចធិបតី អំពីការពិនិត្យ​លទ្ធភាព​ក្នុង​ការ​មក​ពង្រីក​ការ​វិនិយោគបន្ថែមរបស់ខ្លួននៅក្នុងកម្ពុជាផងដែរ ជាពិសេសលើវិស័យកសិកម្ម ថាមពល​ជីវម៉ាស បច្ចេកវិទ្យាហិរញ្ញវត្ថុ និងឌីជីថល ព្រមទាំងការបង្កើតនូវ “World Digital Chamber” ។ បន្ថែម​លើនេះ លោកប្រធានវិទ្យាស្ថាន បានគោរពជម្រាបជូនសម្តេចធីបតី អំពីការបង្កើត ASEAN Economic Club នៅកម្ពុជា ហើយក្នុងឆ្នាំនេះ« វិទ្យាស្ថានយុទ្ធសាស្រ្ត KSI បាន​ផ្តួច​ផ្តើម​គំនិ​ត​ស្នើ​សុំ​ឱ្យ​ព្រះរាជាណាចក្រកម្ពុជាធ្វើជាម្ចាស់ផ្ទះក្នុងការរៀបចំព្រឹត្តការណ៍ចំនួន ២៖ កិច្ច​ប្រជុំ​កំពូល​សាកល​ស្តីពី​បច្ចេកវិទ្យា និងសេដ្ឋកិច្ចចិន (Global Chinese Economic & Technology Summit-GCET) 2024 និង កិច្ចប្រជុំកំពូលស្តីពីសហគ្រិនភាព និង សេដ្ឋកិច្ចអាស៊ី (Asia Economic & Entrepreneurship Summit -AEES) 2024 ។ខណៈកម្មវិធីទាំង២នេះ គឺ​ជា​ឱកាស​ក្នុង​ការទាក់ទាញវិនិយោគិនក្នុងតំបន់អាស៊ាន និងជុំវិញពិភពលោក អំពីឱកាស​វិនិយោគ​នៅ​កម្ពុជា​។

ថ្លែងនៅក្នុង​កិច្ច​ជំនួបនោះដែរ សម្តេចធិបតី ហ៊ុន ម៉ាណែត បានស្វាគមន៍ ប្រកបដោយក្តី​រីករាយ​ដែលបាន​ជួប​ពិភាក្សាការងារជាមួយលោកប្រធានវិទ្យាស្ថាន និងសហការីព្រម​ទាំង​បាន​សម្តែង​ក្ដី​សោម​នស្ស អំពីការរៀបចំកម្មវិធីទាំងពីរនេះ ដោយសម្តេចធិបតី បានណែនាំ​ឱ្យ​វិទ្យាស្ថាន​យុទ្ធ​សាស្រ្ត​ KSI ធ្វើការពិភាក្សាជាមួយក្រសួង-ស្ថាប័នពាក់ព័ន្ធរបស់កម្ពុជាបន្ថែមទៀត។ ជាមួយ​គ្នា​នោះ ​សម្តេចធិបតី បាន​ទទួ​ល​យក​ការ​អញ្ជើញ​របស់​លោក​ប្រធា​ន​វិទ្យាស្ថាន​ក្នុង​ការ​ចូល​រួ​ម​ជា​អធិបតី​ និងថ្លែងសុន្ទរកថាគន្លឹះ ក្នុងកម្មវិធីទាំងពីរនេះ។

ពាក់ព័ន្ធនឹងការជំរុញការវិនិយោគលើបច្ចេកវិទ្យាហិរញ្ញវត្ថុ និងវិស័យឌីជីថល សម្តេចធិបតី បាន​គូស​បញ្ជាក់ផងដែរថា រាជរដ្ឋាភិបាលកម្ពុជា ដែលមានធនាគារជាតិនៃកម្ពុជា ក្រសួងប្រៃសណីយ៍ និង​ទូរគមនាគមន៍ និងក្រសួង-ស្ថាប័នពាក់ព័ន្ធ បាននិងកំពុងខិតខំជំរុញការអភិវឌ្ឍបច្ចេកវិទ្យា ដើម្បី​ធ្វើ​សមាហរណកម្មសេដ្ឋកិច្ចកម្ពុជាទៅជាសេដ្ឋកិច្ចឌីជីថល។ បន្ថែមលើនេះ​សម្តេច​ធិបតី​ក៏​បាន​បញ្ជាក់​ផងដែរថា រាជរដ្ឋាភិបាលអាណត្តិទី៧​នឹង​បន្ត​ការ​អភិវឌ្ឍ​គោល​នយោបាយ​ដោយ​ឈរ​លើ​ស្មារតី​សង្គតិភាព និងនិរន្តរភាព ដើម្បីសម្រេចបាននូវចក្ខុវិស័យឆ្នាំ២០៥០ ក្លាយជា​ប្រទេស​មាន​ចំណូល​ខ្ពស់ ដោយផ្តោតលើការអភិវឌ្ឍមូលធនមនុស្ស ដែលជាលក្ខ​ខណ្ឌ​ចាំបាច់​មិន​អាច​ខ្វះ​បាន​សម្រាប់​ជំរុញពិពិធកម្ម និងកំណើនសេដ្ឋកិច្ចប្រកបដោយភាពធន់ ចីរភាព និងបរិយាប័ន្ន។

សម្តេចធិបតីក៏បានបញ្ជាក់បន្ថែមផងដែរថា រាជរដ្ឋាភិបាលកម្ពុជានឹងបន្តថែរក្សាសុខសន្តិភាព ស្ថិរភាព​នយោបាយ និងការធានាដល់បរិស្ថាននៃការវិនិយោគ ព្រមទាំង​រៀបចំ​នូវ​ផែន​ការ​យុទ្ធ​សាស្រ្ត​ផ្នែក​ពាណិជ្ជកម្ម ទាំងក្នុងក្របខ័ណ្ឌទ្វេភាគី និងពហុភាគី ដើម្បីធានាបាន​នូវ​កាលា​នុវត្ត​ភាព និងរក្សាបាននូវភាពប្រកួតប្រជែងរបស់កម្ពុជាក្នុងតំបន់ និងពិភពលោក។ មួយវិញ​ទៀត​សម្ដេច​ធិបតី បានបញ្ជាក់អំពីគំនិតផ្តួចផ្តើមថ្មីៗរបស់រាជរដ្ឋាភិបាល ដូចជាការបង្កើត​ឡើង​នូវ​គណៈ​កម្មាធិការ​ផ្ដល់យោបល់លើគោលនយោបាយពាណិជ្ជកម្ម ដើម្បីធានាប្រសិទ្ធភាព និង​ស័ក្តិ​សិទ្ធ​ភាព​នៃការអនុវត្តគោលនយោបាយពាណិជ្ជកម្មនានា និងស្វាគមន៍ការផ្ដល់មតិយោបល់ ក៏​ដូច​ជា​ធាតុ​ចូលនានាពីវិទ្យាស្ថានយុទ្ធសាស្ត្រ៕ អត្ថបទ បាន ចក់