មីយ៉ាន់ម៉ា៖ រលកវីរុស Covid-19 កំពុងតែបំផ្លាញសហភាពមីយ៉ាន់ម៉ា ដែលជាប្រទេសកំពុងលិចលង់ស្រាប់បន្ទាប់ពីរដ្ឋប្រហារយោធាក្នុងខែកុម្ភៈ ដោយមានមនុស្សជាច្រើនកំពុងឈរតម្រង់ជួររង់ចាំអុកស៊ីសែន ជាច្រើនម៉ោងនៅតាមទីក្រុងធំៗ និងសំងំឈឺធ្ងន់នៅផ្ទះ ព្រោះពេទ្យទាំងនោះខ្លាចមិនហ៊ានទៅមើលអ្នកជំងឺ នៅក្រោមឈ្មោះជាបុគ្គលិកពេទ្យ និងមន្ទីរពេទ្យមានឧបករណ៍វេជ្ជសាស្ត្រមិនគ្រប់គ្រាន់។
ក្នុងអំឡុងពេលប៉ុន្មានខែនៃភាពចលាចលនយោបាយបង្ហូរឈាម កងកម្លាំងសន្តិសុខមីយ៉ាន់ម៉ាបានសម្លាប់មនុស្សជាង ៩០០នាក់ រួមទាំងការបាញ់សម្លាប់ក្រុមបាតុករនៅតាមដងផ្លូវ និងបានឡោមព័ទ្ធភូមិទាំងមូល។ មនុស្សរាប់ពាន់នាក់ត្រូវបានឃុំខ្លួននៅក្នុងការបង្ក្រាបដែលកំពុងបន្ត ដោយមានរបាយការណ៍ស្ដីពីការធ្វើទារុណកម្មកាន់តែច្រើន។ សង្គមស៊ីវិលត្រូវបានសឹករិចរិល ហើយប្រព័ន្ធថែទាំសុខភាពដែលងាយរងគ្រោះបានដួលរលំ។ ក្រុមវេជ្ជបណ្ឌិត និងបុគ្គលិកសុខាភិបាលផ្សេងទៀត ដែលភាគច្រើនបានចេញតវ៉ាប្រឆាំងរដ្ឋប្រហារ ត្រូវបានបង្ខំឱ្យលាក់ខ្លួនដើម្បីគេចពីការវាយប្រហារ និងការតាមប្រមាញ់ចាប់ខ្លួនពីសំណាក់កងកម្លាំងយោធា។
ខណៈដែលសហភាពមីយ៉ាន់ម៉ាប្រឈមនឹងការផ្ទុះឡើងនៃវីរុស Covid-19 ដ៏ធ្ងន់ធ្ងរបំផុតរបស់ខ្លួន វេជ្ជបណ្ឌិត និងអ្នកស្ម័គ្រចិត្តដែលបាននិយាយទៅកាន់ទូរទស្សន៍ CNN បានចោទប្រកាន់យោធាថា បានប្រើប្រាស់ជំងឺរាតត្បាតសកលនេះ ជាអាវុធប្រឆាំងនឹងប្រជាជនខ្លួនឯង។ ពួកគេបាននិយាយថា យោធាបានរឹតត្បិតការលក់អុកស៊ីសែនសំខាន់ៗដល់សាធារណជន ហើយមិនទទួលយកអ្នកជំងឺចូលសម្រាកព្យាបាលនៅមន្ទីរពេទ្យ ដែលគ្រប់គ្រងដោយយោធា។ ការផ្ទុះឡើងនៃវីរុស Covid-19 ក៏បានរាលដាលដល់ពន្ធនាគារផងដែរ ដែលរួមមានទាំងពន្ធនាគារធំគឺពន្ធនាគារ Insein សម្រាប់ឃុំខ្លួនអ្នកតវ៉ាប្រឆាំងនឹងរដ្ឋប្រហារ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
