ត្បូងឃ្មុំ ៖ ផ្លូវជនបទស្ថិតក្រោមក្របខណ្ឌក្រសួងអភិវឌ្ឍន៍ជនបទ បានកំពុងផ្តល់អត្ថប្រយោជន៍ជាច្រើន ពោលគឺការអភិវឌ្ឍន៍ហេដ្ឋារចនា សម្ព័ន្ធ ផ្លូវ ស្ពាន នៅតាមមូលដ្ឋាន បានកំពុងតភ្ជាប់ប្រទាក់ក្រឡាគ្នា និងបានកំពុងសម្រួលការធ្វើដំណើររបស់ប្រជាពលរដ្ឋមូលដ្ឋាន និងសាធារណជនទូទៅ។

​ឯកឧត្តម សាន វិសាល រដ្ឋលេខាធិការក្រសួងអភិវឌ្ឍន៍ជនបទ និងជាសមាជិកគណៈកម្មាធិការលទ្ធកម្ម (គ.ល) លើកឡើង នៅក្នុងការចុះត្រួតពិនិត្យ វាយតម្លៃប្រគល់ទទួល បញ្ចប់ជាស្ថាពររយៈពេលធានាសុពលភាព គុណភាពការងារថែទាំខួបផ្លូវចំនួន ៤ខ្សែ ក្រាលក្រួសក្រហមប្រវែងសរុប ១៧ គីឡូម៉ែត្រ ទទឹងខ្នងលើ ៦ ម៉ែត្រ និងសាងសង់លូមូលគ្រប់ភេទចំនួន ២៨ កន្លែង ស្ថិតនៅឃុំកក់ ស្រុកពញាក្រែក ខេត្តត្បូងឃ្មុំ នៅថ្ងៃទី ៨ ខែ មេសា ឆ្នាំ ២០២៤ នេះថា ជុំវិញបញ្ហាហេដ្ឋរចនាសម្ព័ន្ធនេះ នៅក្នុងអាណត្តិទី ៧ នៃ រដ្ឋសភា, រាជរដ្ឋាភិបាលក្រោមការដឹកនាំប្រកបដោយភាពឆ្លៀសវៃ របស់សម្តេចមហាបវរធីបតី ហ៊ុន ម៉ាណែត នាយករដ្ឋមន្រ្តី សម្តេច បានយកចិត្តទុកដាក់យ៉ាងខ្លាំង ជាក់ស្តែងនៅក្នុងអាណត្តិថ្មីនេះ រាជរដ្ឋាភិបាលនឹងបន្តការគាំទ្រដល់ការជួស ជុល ថែទាំផ្លូវ ស្ពាន និងផ្លូវលំជនបទ ព្រមទាំងហេដ្ឋរចនាសម្ព័ន្ធផ្សេងៗជាច្រើនទៀត។ 

ជុំវិញផ្លូវខាងលើនេះ ឯកឧត្តម គង់ ភឿន ប្រធាននាយកដ្ឋានផ្លូវលំជនបទ បានលើកឡើងថា បន្ទាប់ពីបានគោលការណ៍ ឯកភាពពីក្រសួងអភិវឌ្ឍន៍ជនបទរួចមក នាយកដ្ឋានផ្លូវលំជនបទ ក៏បានអនុវត្តការងារនេះភ្លាម ដើម្បីជួយសម្រួលដល់ប្រជាពលរដ្ឋ ក្នុងមូលដ្ឋាននេះ ឱ្យមានភាពងាយស្រួលក្នុងការធ្វើចរាចរទៅមក ការដឹកជញ្ជូនកសិផល និងដំណាំបន្ទាប់បន្សំរបស់ប្រជាពលរដ្ឋមក កាន់ទីផ្សារ ជួយសម្រួលដល់សិស្សានុសិស្ស សម្រួលដល់ការដឹកជញ្ជូនអ្នកជម្ងឹមកកាន់មណ្ឌលសុខភាពបានទាន់ពេលវេលា ជៀសវាង នូវគ្រោះថ្នាក់ផ្សេងៗនារដូវទឹកឡើង ព្រមទាំងបង្កលក្ខណៈងាយស្រួលដល់សេវាកម្មនានាដូចជា៖ អប់រំ សុខភាព អនាម័យ ព័ត៌មាន សិក្សាធិការជាដើម។ ទាក់ទិនគម្រោងថែទាំនេះដែរ ឯកឧត្តម សាន វិសាល បានឯកភាព និងវាយតម្លៃខ្ពស់ ចំពោះការខិតខំប្រឹងប្រែង អនុវត្តថែ ទាំផ្លូវទាំងនេះបានល្អប្រសើរ ប្រកបដោយគុណភាពនៅលើកម្រិតផ្លូវជនបទទាំងនេះ ដោយបានកំពុងផ្តល់អត្ថប្រយោជន៍ សម្រាប់ជួយ សម្រួលដល់ការធ្វើដំណើររបស់ប្រជាពលរដ្ឋ និងសាធារណជនទូទៅ ពោលគឺការអភិវឌ្ឍន៍ហេដ្ឋារចនាសម្ព័ន្ធនៅតាមមូលដ្ឋាន ដែល ស្ថិតនៅក្រុមក្រោមក្របខណ្ឌក្រសួងអភិវឌ្ឍន៍ជនបទ បានកំពុងតភ្ជាប់ប្រទាក់ក្រឡាគ្នាទៅកាន់តំបន់ផ្សេងៗ ដោយគម្រោងទាំងនេះ បានកើតឡើងក្រោមការខិតខំប្រឹងប្រែងរបស់រាជរដ្ឋាភិបាល នៃការតភ្ជាប់ផ្លូវពីមូលដ្ឋាន មកកាន់ទីប្រជុំជន និងទីក្រុង ជាដើម៕

អត្ថបទ៖ សុន រ៉ាឌី