សូរ្យគ្រាសពេញលេញ ឬបរិបូរណ៍ នឹងកើតមាននៅថ្ងៃចន្ទ (ទី៨ ខែមេសា) នេះ។ ព្រះចន្ទនឹងគោចរមកបាំងពន្លឺព្រះអាទិត្យ ដែលនឹងនាំមកនូវភាពងងឹតដល់មនុស្សរាប់លាននាក់ នៅក្នុងប្រទេសម៉ិកស៊ិក សហរដ្ឋអាមេរិក និងកាណាដា។ ហើយពាក់ព័ន្ធនឹងបាតុភូតនេះ បណ្ដាហោរាសាស្រ្ត ដែលពឹងលើការមើលផ្កាយនានា ដើម្បីឆ្លើយនឹងសំណួរជាច្រើននៃដំណើរជីវិតនោះ ជឿថា មនុស្សម្នាត្រូវរងផលប៉ះពាល់ដោយការគោចរមកឈរក្នុងទីតាំងតែ១ របស់ព្រះអាទិត្យ ព្រះចន្ទ និងផែនដីនេះ។

ហោរាសាស្រ្តម្នាក់ គឺលោកស្រី Lori Bell ដែលមានដើមកំណើតនៅទីក្រុង Miami រដ្ឋ Florida សហរដ្ឋអាមេរិក គិតថា នេះមិនមែនជារឿងចៃដន្យនោះទេដែលសូរ្យគ្រាសនេះនឹងកាត់ផ្តាច់ផ្លូវឆ្លងកាត់ភាគច្រើននៃសហរដ្ឋអាមេរិក កំពុងកើតឡើងអំឡុងឆ្នាំបោះឆ្នោតនេះ។ លោកស្រីបានប្រាប់ថា ជាពិសេស លោក Donald Trump កំពុងរងឥទ្ធិពលដោយហេតុការណ៍នៅលើមេឃនេះ។

លោកស្រី Bell បាននិយាយថា៖ «មិនមែនជារឿងគួរឲ្យភ្ញាក់ផ្អើលទេ តារាងរបស់លោក Trump គឺសូរ្យគ្រាស ធ្លាក់ចូលទៅក្នុងផ្ទះទី៩។ ផ្ទះទី៩ គឺមានពាក់ព័ន្ធនឹងភាពស្របច្បាប់។ ឥឡូវនេះ គាត់មានបញ្ហាផ្លូវច្បាប់មួយចំនួន ហើយវាកើតមានសូរ្យគ្រាស ដូច្នេះគាត់មិនមានពន្លឺពេញលេញបរិបូរណ៍នោះទេ។ ជាមូលដ្ឋាន គាត់ស្ថិតនៅក្នុងភាពងងឹត»។

ហោរាសាស្ត្រលោកស្រី Jessica Lanyadoo ក៏បានកត់សម្គាល់ផងដែរអំពីឥទ្ធិពលរបស់សូរ្យគ្រាស ក្នុងរដូវបោះឆ្នោតនេះ។ លោកស្រី បានប្រាប់ថា៖ «ចុងក្រោយ ដូចជាការប៉ះពាល់តិចតួច ពោលគឺផលប៉ះពាល់ចុងក្រោយរបស់បាតុភូតនេះ នឹងកើតឡើងក្នុងរដូវបោះឆ្នោត នៅពេលដែលការបោះឆ្នោតពិតប្រាកដកើតឡើងនៅក្នុងសហរដ្ឋអាមេរិក ហើយនៅក្នុងក្បួនរបស់ហោរាសាស្រ្ត ការវិលត្រឡប់មករបស់ភព Pluto (ភ្លុយតូ) ត្រូវបានផ្សារភ្ជាប់ជាមួយនឹងការដួលរលំនៃចក្រភព ឬអាណាចក្រ។ ឥឡូវនេះ មិនមែនគ្រប់ជាតិសាសន៍ទាំងអស់ដែលជួបប្រទះនឹងការវិលត្រឡប់របស់ភពភ្លុយតូ សុទ្ធតែកើតមានការដួលរលំដែលពួកគេ មិនអាចក្រោកបាននោះទេ»។

លោកស្រីបានបន្ថែមថា នេះគឺជាប្រទេសមួយដែលកំពុងឆ្លងកាត់វិបត្តិដ៏ធំ និងផ្លូវមួយ ឬ ផ្សេងទៀត ខណៈតាមទស្សនៈហោរាសាស្ត្រ យើងនឹងមានបដិវត្តន៍»។ តែយ៉ាងណាក្ដី លោកស្រី Lanyadoo មានអារម្មណ៍ថា សូរ្យគ្រាសមិនមែនជាសញ្ញានៃភាពអាប់អួនោះទេ៕