នាយករដ្ឋមន្រ្តីអ៊ីស្រាអែលលោក Benjamin Netanyahu និយាយកាលពីថ្ងៃអាទិត្យថា អ៊ីស្រាអែលនឹងមិនឯកភាពជាមួយបទឈប់បាញ់នោះឡើយ ក្រោយសង្រ្គាមរយៈពេល ៦ខែប្រឆាំងនឹងក្រុមហាម៉ាស់នៅតំបន់ហ្កាហ្សា លុះត្រាតែមានការដោះលែងចំណាប់ថ្នូរនៅតំបន់ហ្កាហ្សា ។ 

សេចក្តីអត្ថាធិប្បាយរបស់លោក Netanyahu បានធ្វើងឡើងនៅពេលចាប់ផ្តើមកិច្ចប្រជុំគណៈរដ្ឋមន្រ្តីប្រចាំសប្តាហ៍ ស្របពេលដែលជុំថ្មីនៃកិច្ចប្រជុំស្វែងរកបទឈប់បាញ់ចាប់ផ្តើមនៅប្រទេសអេហ្ស៊ីប ។ 

លោក Netanyahu និយាយថា បើទោះបីជាមានសំពាធអន្តរជាតិកើនឡើងយ៉ាងណាក្តី អ៊ីស្រាអែល នឹងមិនយល់ព្រមចំពោះការទាមទារណាមួយរបស់ក្រុមភេរវកម្មហាម៉ាស់នោះទេ ក្រោយការវាយប្រហារសម្លាប់មនុស្សរបស់ពួកគេនៅតំបន់ភាគខាងត្បូងអ៊ីស្រាអែល កាលពីថ្ងៃទី ៧ ខែតុលា ឆ្នាំ ២០២៣កន្លងទៅ ។ 

ក្រសួងសុខាភិបាលនៅហ្កាហ្សា បានប្រកាសកាលពីថ្ងៃអាទិត្យថា ចំនួនអ្នកស្លាប់របស់ប៉ាឡេស្ទីន នៅក្នុងការវាយប្រហាររបស់អ៊ីស្រាអែល បានកើនឡើងដល់ជិត ៣៣.២០០ នាក់ ។  

ក្រសួងបាននិយាយនៅក្នុងសេចក្តីថ្លែងការណ៍ថា ក្នុងរយៈពេល ២៤ ម៉ោងកន្លងមកនេះ កងទ័ពអ៊ីស្រាអែលបានសម្លាប់ជនជាតិប៉ាឡេស្ទីន ៣៨ នាក់ និងបង្ករបួស ៧១១ នាក់ផ្សេងទៀត ដែលនាំឲ្យចំនួនអ្នកស្លាប់សរុបកើនឡើងដល់ ៣៣.១៧៥ នាក់ និងរបួសដល់ ៧៥.៨៨៦ នាក់ចាប់តាំងពីជម្លោះអ៊ីស្រាអែល និងក្រុមហាម៉ាស បានផ្ទុះឡើង ៕