ការវាយប្រហាររបស់អ៊ីស្រាអែលលើប្រទេសលីបង់ភាគខាងត្បូងនៅព្រឹកថ្ងៃចន្ទនេះ បានសម្លាប់មេបញ្ជាការប្រចាំតំបន់ម្នាក់របស់ក្រុមហេសបូឡាហ៍លីបង់ដែលប្រដាប់ដោយអាវុធធុនធ្ងន់ ខណៈដែលអង្គការសហប្រជាជាតិ បានព្រមានថា ការបាញ់ផ្លោងកំពុងរីករាលដាល និងជំរុញឲ្យបញ្ឈប់អំពើហិង្សានេះ។

ក្រុមហេសបូឡា និងយោធាអ៊ីស្រាអែល បាននិងកំពុងបាញ់ប្រហារគ្នា នៅទូទាំងព្រំដែនភាគខាងត្បូងនៃប្រទេសលីបង់ ស្របជាមួយនឹងសង្រ្គាមនៅតំបន់ហ្កាហ្សា ដោយបន្ថែមការភ័យខ្លាចនៃជម្លោះ ក្នុងតំបន់កាន់តែធំឡើង។

យោធាអ៊ីស្រាអែល និងប្រភពសន្តិសុខលីបង់ បាននិយាយថា នៅព្រឹកថ្ងៃចន្ទនេះ អ៊ីស្រាអែល បានវាយប្រហារដោយយានដ្រូនទៅលើភូមិ al-Sultaniyah និងបានសម្លាប់មេបញ្ជាការប្រចាំតំបន់ម្នាក់ នៅក្នុងអង្គភាពសម្រាំង Radwan របស់ក្រុមហេសបូឡា និងមនុស្សពីរនាក់ផ្សេងទៀត ។

យោធាអ៊ីស្រាអែល បានកំណត់អត្តសញ្ញាណមេបញ្ជាការថា ជា Ali Ahmed Hassin ហើយបាននិយាយថា លោកទទួលខុសត្រូវចំពោះការរៀបចំផែនការ និងប្រតិបត្តិការវាយប្រហារប្រឆាំងនឹងអ៊ីស្រាអែល។ ក្រុមហេសបូឡា បានចេញសេចក្តីជូនដំណឹងបុណ្យសពលោក Hassin ប៉ុន្តែមិនមានព័ត៌មានលម្អិតអំពី  តួនាទីរបស់លោកទេ។

ការវាយប្រហាររបស់អ៊ីស្រាអែល បានសម្លាប់អ្នកប្រយុទ្ធហេសបូឡា ប្រហែល ២៧០នាក់ ក្នុងរយៈពេល៦ ខែចុងក្រោយនេះ ព្រមទាំងជនស៊ីវិលប្រហែល ៥០នាក់ រួមទាំងកុមារ គ្រូពេទ្យ និងអ្នកសារព័ត៌មានផង   ដែរ។ ការបាញ់គ្រាប់រ៉ុក្កែតរបស់ក្រុមហេសបូឡា បានសម្លាប់ទាហានអ៊ីស្រាអែល១២នាក់ និងជនស៊ីវិល៦  នាក់។