មន្ត្រីក្រុមហាម៉ាស បាននិយាយនៅថ្ងៃចន្ទនេះថា គ្មានការរីកចកម្រើនណាមួយ ត្រូវបានធ្វើឡើង នៅក្នុងកិច្ចចរចាបទឈប់បាញ់នៅតំបន់ហ្កាហ្សា ក្នុងទីក្រុងគែរ ក៏មានការចូលរួមដោយគណៈប្រតិភូមកពីអ៊ីស្រាអែល កាតា និងសហរដ្ឋអាមេរិក ភ្លាមៗបន្ទាប់ពីប្រភពអេហ្ស៊ីប បានបញ្ជាក់ថា មានរីកចម្រើន ទៅលើអ្វីដែលបានកំណត់ក្នុងរបៀបវារៈ។ 

មហាអំណាចលោកខាងលិច បានសម្តែងការខឹងសម្បាចំពោះអ្វីដែលពួកគេមើលឃើញថា ជាចំនួនអ្នកស្លាប់ជនស៊ីវិលប៉ាឡេស្ទីនខ្ពស់ ដែលមិនអាចទទួលយកបាន និងវិបត្តិមនុស្សធម៌នៅតំបន់ហ្កាហ្សាដែលកើតឡើងពីការវាយលុករបស់យោធាអ៊ីស្រាអែល ដើម្បីបំផ្លាញក្រុមហាម៉ាស នៅតំបន់ហ្កាហ្សាដ៏តូច និងមានប្រជាជនរស់នៅច្រើន។

អ៊ីស្រាអែល និងក្រុមហាម៉ាស បានបញ្ជូនក្រុមទៅកាន់ប្រទេសអេហ្ស៊ីបកាលពីថ្ងៃអាទិត្យ បន្ទាប់ពីការមកដល់កាលពីថ្ងៃសៅរ៍របស់ប្រធានទីភ្នាក់ងារចារកម្ម CIA លោក William Burns ដែលវត្តមានរបស់លោក បានគូសបញ្ជាក់អំពីការកើនឡើងសម្ពាធរបស់សហរដ្ឋអាមេរិកសម្រាប់កិច្ចព្រមព្រៀងដោះលែងចំណាប់ថ្នូរដែលត្រូវបានឃុំខ្លួននៅតំបន់ហ្កាហ្សា និងទទួលបានជំនួយសម្រាប់ជនស៊ីវិលដែលកំពុងរងគ្រោះ។

មន្ត្រីក្រុមហាម៉ាស ដែលសុំមិនបញ្ចេញឈ្មោះ បានប្រាប់សារព័ត៌មានរ៉យទ័រថា៖«មិនមានការផ្លាស់ប្តូរទីតាំងនៃការកាន់កាប់នេះទេ ដូច្នេះហើយគ្មានអ្វីថ្មីទេ នៅក្នុងកិច្ចពិភាក្សាទីក្រុងគែរ» ហើយ«ពុំទាន់មានការរីកចម្រើននៅឡើយ»។