អធិការបតីអាល្លឺម៉ង់លោក Olaf Scholz បានផ្ញើការបង្ហោះលើកដំបូងរបស់លោកនៅលើបណ្ដាញសង្គម TikTok នៅថ្ងៃចន្ទ (ទី៨ ខែមេសា) នេះ ដោយលោកបានចូលរួមក្នុងបញ្ជីឈ្មោះនៃអ្នកនយោបាយលោកខាងលិចដែលកំពុងកើនឡើង ដែលបានទុកចោលដោយឡែកនូវការព្រួយបារម្ភអំពីសុវត្ថិភាព ក្នុងការប្រើប្រាស់បណ្ដាញសង្គមរបស់ប្រទេសចិនមួយនេះ។

លោក Scholz បានបង្ហោះនៅលើបណ្ដាញសង្គម X ថា៖ «ខ្ញុំមិនរាំទេ។ សូមសន្យា។ #TikTok»។ ការបង្ហោះបណ្ដាញសង្គម TikTok លើកដំបូងរបស់លោក Scholz ដែលផ្ញើដោយគណនីថ្មីរបស់លោក TeamBundeskanzler (Team Chancellor) គឺជាវីដេអូធ្វើឡើងអមដោយចង្វាក់ភ្លេងយឺតៗរបស់ឧបករណ៍តន្ត្រីបាសស៊ូន (ឧបករណ៍ស្រដៀងនឹងប៉ី) ដែលបង្ហាញពីកាបូបយួរនៅលើសាឡុងមួយ មុនពេលកាម៉ារ៉ាបង្វិលទៅកាន់មេដឹកនាំអាល្លឺម៉ង់ដែលកំពុងអង្គុយនៅឯតុការិយាល័យរបស់លោក។

សេចក្តីថ្លែងការណ៍ពីអ្នកនាំពាក្យរដ្ឋាភិបាលលោក Steffen Hebestreit បានឲ្យដឹងថា៖ «ការិយាល័យសារព័ត៌មានសហព័ន្ធ កំពុងពង្រីកវិសាលភាពព័ត៌មានរបស់ខ្លួនកាន់តែខ្លាំងឡើង សម្រាប់ប្រជាពលរដ្ឋ ដែលកំពុងប្រើប្រាស់បណ្ដាញសង្គម TikTok ដើម្បីសិក្សាស្វែងយល់ និងពិភាក្សាអំពីនយោបាយ»។

យោងតាមសេចក្តីថ្លែងការណ៍នោះ បានឲ្យដឹងថា វត្តមាននៅបណ្ដាញសង្គម TikTok របស់លោក Scholz គឺសំដៅលើការមានទំនាក់ទំនងជាមួយមនុស្សវ័យក្មេងជាពិសេស។ ត្រឹមព្រឹកព្រលឹមថ្ងៃចន្ទនេះ គណនីរបស់ Scholz មានអ្នកតាមដានចំនួន ៦១៥នាក់ ដែលចំនួននេះនៅតែឆ្ងាយពីតួលេខអ្នកតាមដានជាង ៤១១.០០០នាក់របស់គណបក្សស្តាំជ្រុលនិយម គឺគណបក្សផ្លាស់ប្ដូរអាល្លឺម៉ង់ (AfD) ដែលមានភាពសកម្មខ្លាំងណាស់នៅលើវេទិការបស់បណ្ដាញសង្គមនេះ៕