រុស្ស៊ីបាននិយាយថា អ៊ុយក្រែនបានវាយប្រហារស្ថានីយរោងចក្រថាមពលនុយក្លេអ៊ែរហ្សាប៉ូរីហ្សា ដែលគ្រប់គ្រងដោយកងទ័ពរុស្ស៊ីចំនួនបីលើក កាលពីថ្ងៃអាទិត្យ និងបានទាមទារអោយលោកខាងលិចឆ្លើយតប ទោះបីជាក្រុងគីវ បាននិយាយថា ខ្លួនមិនបានពាក់ព័ន្ធនឹងការវាយប្រហារនោះទេ។

ទីភ្នាក់ងារថាមពលអាតូមិកអន្ដរជាតិ ដែលមានអ្នកជំនាញនៅកន្លែងនោះ បាននិយាយថា វាជាលើកដំបូងហើយដែលរោងចក្រថាមពលនុយក្លេអ៊ែរ ធំជាងគេបំផុតរបស់អឺរ៉ុបមួយនេះ បានក្លាយជាគោលដៅវាយប្រហារដោយផ្ទាល់ចាប់តាំងពីខែវិច្ឆិកាឆ្នាំ២០២២មក និងបាននិយាយថា ការវាយប្រហារនេះ គឺមានជាប់ទាក់ទងនឹងសុវត្ថិភាពនុយក្លេអ៊ែរ។

កងទ័ពរុស្ស៊ី បានចូលកាន់កាប់រោងចក្រថាមពលនេះ ក្នុងឆ្នាំ២០២២ភ្លាមៗ បន្ទាប់ពីការវាយលុកទ្រង់ទ្រាយធំរបស់ពួកគេក្នុងប្រទេសអ៊ុយក្រែនមក។ ភាគីក្រុងមូស្គូនិង ក្រុងគីវ បានចោទគ្នាទៅវិញទៅមក ម្ដងហើយម្ដងទៀត ពីការបង្ករគ្រោះថ្នាក់នុយក្លេរអ៊ែរដោយការវាយប្រហារោងចក្រនេះ។

សាជីវកម្មនុយក្លេអ៊ែររបស់រដ្ឋរុស្ស៊ីឈ្មោះ រ៉ូសាតុម (Rosatom) បាននិយាថា អ៊ុយក្រែនបានវាយប្រហាររោងចក្រនេះចំនួន៣លើកកាលពីថ្ងៃអាទិត្យ ដោយប្រើប្រាស់យានដ្រូន បណ្ដាលអោយមនុស្ស៣នាក់ រងរបួសនៅជិតអាហារដ្ឋានមួយ បន្ទាប់មកបានវាយប្រហារកន្លែងដឹកជញ្ជូនមួយ និងបន្ទាប់មកទៀតបានវាយប្រហារដំបូលអគារពីលើម៉ាស៊ីនរេប្រតិករ (Reactor)លេខ៦។

មន្រ្ដីស៊ើបការណ៍អ៊ុយក្រែនម្នាក់ បាននិយាយថា ក្រុងគីវ មិនមានការពាក់ព័ន្ធនឹងការវាយប្រហារស្ថានីយនោះទេ និងបានលើកឡើងថា វាជាស្នាដៃរបស់រុស្ស៊ីដោយផ្ទាល់។