ភ្នំពេញ ៖ ដើម្បីអបអរក្នុងឱកាសបុណ្យចូលឆ្នាំថ្មី ប្រពៃណីជាតិ កាលពីល្ងាចថ្ងៃទី៨ ខែមេសា ឆ្នាំ២០២៤ កាកបាទក្រហមកម្ពុជា ដែលមាន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន រួមជាមួយសិល្បករ និងបរវកញ្ញាកម្ពុជា បានអញ្ជើញសំណេះ សំណាល ប្រគល់អំណោយ និងរៀបចំអាហារមួយពេល ជូនជនមានពិការភាពចំនួន ៣៥០នាក់ នៅសមាគមតន្រ្តីសំនៀងជន ពិការ ដែលមានទីតាំងស្ថិតនៅ ភូមិជំរៅ សង្កាត់គោករកា ខណ្ឌព្រែកព្រៅ រាជធានីភ្នំពេញ។

ក្នុងឱកាសជួបសំណេះសំណាលនោះលោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានផ្តាំផ្ញើសួរសុខទុក្ខ និងក្តីនឹករលឹក ជាពិសេស សម្តេចប្រធាន លោកតែងគិតគូរ ពីការរស់នៅប្រចាំថ្ងៃរបស់ជនពិការទាំងអស់។ ជាមួយគ្នានោះលោកជំទាវ ម៉ែន នារីសោភ័គ ក៏បានលើកទឹកចិត្ត ដល់ការតស៊ូរបស់ក្រុមជនពិការ ដើម្បីរស់នៅក្នុងសង្គមដោយសេចក្តីថ្លៃថ្នូរ និងស្មើមុខស្មើមាត់ដូចមនុស្សមិនពិការដែរ ព្រមទាំងអំពាវនាវ ដល់សប្បុរសជន មេត្តាជួយឧបត្ថម្ភគាំទ្របន្ថែមទៀតដល់ជនពិការ ដើម្បីឈានទៅលុបបំបាត់ការរើសអើង ចំពោះជនមានពិការភាពនៅកម្ពុជាយើង។

ឯកឧត្តម ចាប តូ ប្រធានសមាគមតន្រ្តីសំនៀងជនពិការ ពិតជាមានសេចក្តីរំភើបរីករាយខ្លាំងណាស់ ក្រៅអំពីការជួយឧបត្ថម្ភ ដី អគារស្នាក់នៅ និងបង្រៀនជំនាញ បំពាក់សម្ភារៈ ធ្វើផ្លូវថ្នល់ ផ្តល់រថយន្ត រៀបអាពាហ៍ពិពាហ៍ឱ្យកូនៗ។ល។ ជារៀងរាល់ មុនបុណ្យចូលឆ្នាំប្រពៃណីជាតិខ្មែរ សម្តេចម៉ែកិត្តិព្រឹទ្ធបណ្ឌិត លោកតែងបានចាត់តំណាង មកចុះសួរសុខទុក្ខ និងសំណេះសំណាល ព្រមទាំងនាំយកមកនូវគ្រឿង ឧបភោគ បរិភោគ និងថវិកា ដល់កូនៗជនមានពិការភាពភ្នែក និងកាយ សម្បទា មិនដែលខាន។

សូមបញ្ជាក់ថា ចំពោះអំណោយប្រគល់ជូនសមាគមតន្ត្រីសំនៀងជនពិការរួមមាន៖ អង្ករ៣តោន មី២០កេស ត្រីខ៥កេស ទឹកត្រី១០យួរ ទឹកក្រូច៣០កេស ទឹកបរិសុទ្ធ៤០កេស ផ្លែក្រូច៥កេស អាល់កុល៣០ពីដុង និងថវិកា១០លានរៀល ព្រមទាំងរៀបចំអាហារសាមគ្គីជូនមួយពេលដ៏ឆ្ងាញ់ពិសារថែមទៀត៕

អត្ថបទៈ សំ ងីម