​បាល់ទាត់៖ ​ខ្សែប្រយុទ្ធ Everton, Richarlison បាន​ក្លាយជា​តួឯក​ក្នុងការ​ប្រកួត​ក្រោយ​ស៊ុត​ ៣​គ្រាប់​ម្នាក់ឯង​ក្នុង​រយៈពេល ៣០នាទី​ឱ្យ​ប្រេ​ស៊ី​ល​ចាប់ផ្តើម​យុទ្ធនាការ​ប្រកួត ​នៅ​ព្រឹត្តិការណ៍​អូឡាំពិក​រដូវក្តៅ​ជាមួយនឹង​ជ័យជំនះ ៤-២ លើ​អាល្លឺម៉ង់​។

​​នេះ​ជាការ​ប្រកួត​​ដែល​ក្រុម​ទាំងពីរ​ធ្លាប់​ជួបគ្នា​នៅ​ឆ្នាំ២០១៦ វគ្គ​ផ្តាច់ព្រ័ត្រ​ដណ្តើម​មេដាយមាស ខណៈ​ក្រុម​ការពារ​តំណែង​ជើងឯក​ប្រេ​ស៊ី​ល ​នៅតែ​រក្សា​ជ័យជំនះ​របស់ខ្លួន​បាន​។ ​​៣​គ្រាប់​របស់ Richarlison គឺ​រកបាន​ត្រឹម​រយៈពេល ៣០នាទី​ដំបូង​ពោលគឺ​នៅ​នាទី​ទី៧, ២២ និង ៣០ មុនពេល​ដែល Mattheus Cunha ស៊ុត​បាល់ ១១ម៉ែត្រ​មិនបាន​សំរេច​នៅ​ចុង​វគ្គ​ទី១​។​ ​​អាល្លឺម៉ង់​ក៏​រកបាន​ ២​គ្រាប់​មកវិញ​ដែរ​នៅ​វគ្គ​ទី២ ដោយ Nadiem Amiri និង Ragnar Ache មុន​ពេលដែល​ខ្សែប្រយុទ្ធ Leverkusen, Paulinho បន្ថែម​គ្រាប់​ចុងក្រោយ​ឱ្យ​ប្រេ​ស៊ី​ល​យកឈ្នះ​អាល្លឺម៉ង់ ៤-២​។ ​ជ័យជំនះ​នេះ​ធ្វើឱ្យ​ប្រេ​ស៊ី​ល​ឈរលើ​គេ​ក្នុង​ពូ​ល D ជាមួយនឹង​កូ​ឌី​វ័រ​ដែល​យកឈ្នះ​អារ៉ាប៊ីសាអ៊ូឌីត ២-១ ដោយ​គ្រាប់​បាល់​ជ័យជំនះ​របស់​ខ្សែបំរើ AC Milan, Frank Kessie​។ ​​ងាក​ទៅ​ពូ​ល A ក្រុម​ម្ចាស់ផ្ទះ​ជប៉ុន​ក៏​ចាប់ផ្តើម​ដោយ​ជ័យជំនះ​ដែរ​ ក្រោយ​យកឈ្នះ​អាហ្វ្រិក​ខាងត្បូង ១-០ ដោយ Takefusa Kubo ស្របពេល​ដែល​ម៉ិ​ក​ស៊ិ​ក​បំបាក់​បារាំង ៤-១ ឈរលើ​គេ​ក្នុង​ពូ​ល A នេះ​។

​​នៅ​ពូ​ល B រ៉ូ​ម៉ា​នី និង​នូ​វែ​ហ្ស៊ី​ឡង់​រកបាន ៣​ពិន្ទុ​ដូចគ្នា​ក្រោយ​ជ័យជំនះ ១-០ រៀងខ្លួន​លើ​គូប្រកួត​។ ​​រ៉ូ​ម៉ា​នី​បាន​យកឈ្នះ​ហុង​ឌុយ​រ៉ា​ស ១-០ ដោយ​គ្រាប់​បាល់​ចូល​ទី​ខ្លួនឯង​របស់ Elvin Oliva ខណៈនូ​វែ​ហ្ស៊ី​ឡង់​យកឈ្នះ​កូរ៉េ ១-០ ដូចគ្នា​ដោយ​គ្រាប់​បាល់​របស់ Chris Wood​។ នេះ​ជា​ជ័យជំនះ​ជា​ប្រវត្តិសាស្ត្រ​សំរាប់​ក្រុម​នូ​វែ​ហ្ស៊ី​ឡង់ ​នៅ​ព្រឹត្តិការណ៍​អូឡាំពិក​នេះ​។ ​ចំណែក​នៅក្នុង​ពូ​ល C អេ​ស្ប៉ា​ញ​ធ្វើ​អ្វី​អេ​ហ្ស៊ី​ប​មិនបានបាន​ត្រឹម​លទ្ធផល​ស្មើគ្នា 0-០ ស្របពេល​អូស្ត្រាលី​យកឈ្នះ​អា​ហ្ស​ង់​ទីន ២-០ ដោយ Lachlan Wales និង Marco Tilio៕

​អត្ថបទ​៖​នាង សុភា​វុ​ធ