អាជីវករផ្សារធំថ្មី ក្នុងពេលបច្ចុប្បន្ននេះ បាននាំគ្នាលេងល្បែងប្រជាប្រិយ ក៏ដូចជារាំកម្សាន្តរាល់ថ្ងៃ ដើម្បី​អបអរសាទរពិធីបុណ្យចូលឆ្នាំប្រពៃណីជាតិខ្មែរ ក៏ដូចជាផ្ដល់ភាពសប្បាយរីករាយ បង្ហាញ​វប្បធម៌​ប្រពៃណីជាតិខ្មែរដល់ភ្ញៀវទេសចរបរទេស។

ការលេងល្បែងប្រជាប្រិយ ការរាំកម្សាន្ត កំពុងមានការផុសផុល ស្របពេលដែលពិធីបុណ្យចូលឆ្នាំ ប្រពៃណី​ជាតិខ្មែរខិតចូលមកដល់។ ជាក់ស្ដែងសម្រាប់ផ្សារធំថ្មី ជាគោលដៅ​ទេសចរណ៍​សំខាន់​មួយ​នៅ​រាជធានីភ្នំពេញ ក៏មានការលេងល្បែងប្រជាប្រិយ និងរាំកម្សាន្តរៀងរាល់ល្ងាច ជាប្រចាំ​ថ្ងៃ​ផង​ដែរ។

ក្រុមអាជីវករនៅចន្លោះម៉ោង ៣.៣០រសៀល តែងមានការជួបជុំគ្នា ទាញព្រ័ត លេងបោះឈូង បោះ​អង្គុញ វាយក្អម និងលាក់កន្សែងជាដើម។ លើសពីនេះ ពួកគេ​នាំ​គ្នា​រាំ​កម្សាន្ត​នូវ​ចង្វាក់​ប្រពៃណី​ខ្មែរ​ផងដែរ។ ពលរដ្ឋលើកឡើងពីភាពសប្បាយចិត្ត ដែលផ្សារធំថ្មី​បាន​រៀបចំ​លេង​កម្សាន្ត​បែប​នេះ។​ អាជីវករ​គ្រប់រូប​ក៏​ដូចជា​ប្រជាពលរដ្ឋ​ដែល​អញ្ជើញ​មកផ្សារ​ធំថ្មី​សុទ្ធតែអាច​ចូល​លេង​កម្សាន្ត​ទាំង​អស់គ្នា។

ការរៀបចំលេង​កម្សាន្តនៅផ្សារធំថ្មីនេះបានទាក់ទាញទាំងភ្ញៀវទេសចរបរទេស ឱ្យឈរមើល ថត​យកទិដ្ឋភាព និងថែមទាំងអូសទាញឱ្យពួកគេចូលលេង និងរាំកម្សាន្តជាមួយ​ក្រុម​អាជីវករ​ថែម​ទៀត​ផង​។ ក្នុងនាមជាភ្ញៀវទេសចរបរទេស ពួកគេម្នាក់ៗ បង្ហាញភាពសប្បាយរីករាយជាខ្លាំង ដែល​បានចូលរួមកម្សាន្តជាមួយប្រជាពលរដ្ឋកម្ពុជា ក្នុងការមកកម្សាន្តនៅកម្ពុជានាពេលនេះ។

សូម​ជម្រាបថា ពិធីបុណ្យចូលឆ្នាំប្រពៃណីជាតិខ្មែរ សម្រាប់ឆ្នាំ ២០២៤នេះ មានរយៈ​ពេល​រហូត​ដល់ ៤ថ្ងៃ ចាប់រាប់ពីថ្ងៃ ទី១៣ រហូតដល់ថ្ងៃ១៦ ខែមេសា។ កំឡុងពេលនេះ ប្រជាពលរដ្ឋ​ជា​ច្រើន​ ពិសេសអ្នករស់នៅនិងប្រកបរបរចិញ្ចឹមជីវិតនៅរាជធានីភ្នំពេញ និងធ្វើដំណើរ​ទៅ​ស្រុក​កំណើត​ជួប​ជុំបងប្អូន និងមានការទៅកម្សាន្តតាមតំបន់ទេសចរណ៍នានាក្នុងចំនួនច្រើនផងដែរ៕ អត្ថបទ៖ គឹមហុក