គិតចាប់ពីថ្ងៃទី១១ ខែមេសានេះតទៅ កម្មករកម្មការនីបម្រើការងារក្នុងវិស័យរោងចក្រកាត់ដេរ នឹង​ចាកចេញពីរាជធានីភ្នំពេញទៅកាន់ស្រុកកំណើតរៀងៗខ្លួន ដើម្បីត្រៀមជួបជុំក្រុមគ្រួសារ ក្នុង​ឱកាស​ពិធីបុណ្យចូលឆ្នាំប្រពៃណីជាតិខ្មែរ ដែលនឹងឈានមកដល់នៅនាពេលខាង​មុខឆាប់ៗ​នេះ​។

អ្នកស្រី ទួន សុឃឿន មានស្រុកកំណើតនៅខេត្តពោធិ៍សាត់ ជាកម្មការិនីរោងចក្រ​កាត់​ដេរ​សម្លៀក​បំពាក់ ស៊ីជី ក្លូរី ស្ថិតនៅតំបន់ទ្រុងមាន់ ខណ្ឌមានជ័យ រាជធានីភ្នំពេញ បានប្រាប់ ប៊ីធីវី ឱ្យដឹងថា សម្រាប់ឆ្នាំនេះ កម្មករនិយោជិត​ក្នុង​រោងចក្រ​ទាំងអស់​ទទួល​ការ​អនុញ្ញាត​ឲ្យ​ឈប់​សម្រាក​រយៈ​៧ថ្ងៃ​ គិតចាប់ពីថ្ងៃទី១១ រហូតដល់ថ្ងៃទី១៨ ខែមេសា ឆ្នាំ២០២៤ ទើបត្រឡប់​ចូល​បំពេញ​ការងារ​ធម្មតា​ឡើង​វិញ។ អ្នកស្រីបានឲ្យដឹងទៀតថា ការឈប់សម្រាប់ជាច្រើនថ្ងៃនេះ ក្រៅពីកំណើត គឺ​មិន​មាន​គម្រោងទៅកម្សាន្តនៅទីណានោះទេ ដោយសារចង់ជួបជុំគ្រួសារ និង​សាច់ញាតិ​បង​ប្អូន​នៅ​ស្រុក​កំណើតតែប៉ុណ្ណោះ។

ជាមួយគ្នា​នេះក្រុមកម្មការនីនៃរោងចក្រខាងលើនេះ បានបង្ហាញទឹកមុខសប្បាយរីករាយ និង​លើក​ឡើង​ស្រដៀង​គ្នាថា ជារៀងរាល់ឆ្នាំក្នុងពិធីបុណ្យចូលឆ្នាំ ឆ្នាំនេះក៏មិនខុសពីឆ្នាំមុនៗដែរ ក្រៅ​ពី​ការ​ជួប​ជុំក្រុមគ្រួសារនៅតាមផ្ទះ ក៏នឹងនាំគ្នាធ្វើចង្ហាន់ និងរៀបចំ​ទេយ្យទាន​ផ្សេងៗ​ប្រគេ​ន​ព្រះសង្ឃ បន្ទាប់មកជួបជុំសាច់ញាតិទៅលេងសង្រ្កានតាមភូមិឃុំ និងការលេង​ល្បែង​ប្រជា​ប្រិយ​ជា​ដើម ក្នុងឱកាសពិធីបុណ្យចូលឆ្នាំប្រពៃណីជាតិខ្មែរ។

សូមជម្រាបថា រាល់ឆ្នាំក្នុងអំឡុងពិធីបុណ្យចូលឆ្នាំប្រពៃណីជាតិខ្មែរ ប្រជា​ពលរដ្ឋ​ភាគ​ច្រើន​តែង​តែ​ចាក​ចេញ​ពីរាជធានីភ្នំពេញ ទៅជួបជុំក្រុមគ្រួសារនៅស្រុកកំណើត និងខ្លះទៀតធ្វើ​ដំណើរ​កម្សាន្ត​ទាំង​ក្នុង និងក្រៅប្រទេស។ សម្រាប់ឆ្នាំ២០២៤នេះ រាជរដ្ឋាភិបាលកម្ពុជា បានប្រកាស​អនុញ្ញាត​ឱ្យ​កម្មករនិយោជិតទាំងអស់ឈប់សម្រាកដោយមានប្រាក់ឈ្នួលរយៈពេល៤ថ្ងៃ គឺថ្ងៃ​១៣-១៤-១៥ និង១៦ ខែមេសា ឆ្នាំ២០២៤៕ អត្ថបទ៖ ឈិត បូរ៉ាវី