​បាល់ទាត់៖ ​ក្រុម​តោ​ខៀវ Chelsea បានសំរេច​លុបចោល​កា​រ​ប្រកួត​មិត្តភាព​កំដៅ​សាច់ដុំ​យប់មិញ ​ទល់នឹង​ក្រុម​មកពី​សាធារណរដ្ឋ​អៀក​ឡង់ Drogheda ក្រោយ​សង្ស័យ​មាន​ករណី​ឆ្លង Covid-19​។

​​Chelsea កំពុងស្ថិត​ក្នុង​សាធារណរដ្ឋ​អៀក​ឡង់​បោះជំរំ​ហ្វឹកហាត់​ត្រៀម​រដូវ​កាល​ថ្មី ដោយ​គ្រោង​ជួប Drogheda នៅ​ក្របខណ្ឌ​លី​គ​កំពូល​អៀក​ឡង់​។ ​​អ្នកនាំពាក្យ​របស់​តោ​ខៀវ Chelsea បានឱ្យ​ថា​ ក្លិប​កំពុង​តាមដាន​ពី​ករណី​សង្ស័យ​ឆ្លង Covid-19 នេះ​តែ​មិនបាន​បង្ហាញ​អត្តសញ្ញាណ​ថា​អ្នក​ឡើយ ​តែ​បាន​បញ្ជាក់ថា​ អ្នក​ដែល​សង្ស័យ​នេះ​កំពុង​ត្រូវបាន​ដាក់​នៅ​ដាច់ដោយឡែក​ហើយ​។

​​សូមបញ្ជាក់ថា​ នៅក្នុង​សប្តាហ៍​នេះដែរ Arsenal ក៏បាន​លុបចោល​ការប្រកួត​មិត្តភាព​របស់ខ្លួន​មួយ​ចំនួន​ផងដែរ ​ដូចជា​គំរោងការ​ប្រកួត​ពាន Florida Cup នៅ​សហរដ្ឋអាមេរិក​ត្រូវបាន​លុប​ចោល​ដោយ​សារ​បញ្ហា​ដូចគ្នានេះ ស្រប​ពេលដែល Manchester City ក៏បាន​លុបចោល​ការប្រកួត​ដែរ​។ ​Chelsea ត្រូវ​បើក​រដូវ​កាល​ថ្មី English Premier League ជួប​ជាមួយ Crystal Palace ថ្ងៃទី១៤ ខែសីហា​ខាងមុខ​៕

​អត្ថបទ​៖​នាង សុភា​វុ​ធ