កំពង់ឆ្នាំង៖ គម្របព្រៃឈើឆ្នាំ២០០២ ដែលការពារដោយអនុក្រឹត ស្ថិតក្នុងភូមិកោះខ្ទម ឃុំជៀប ស្រុកទឹកផុស ខេត្តកំពង់ឆ្នាំង ត្រូវបានជនសង្ស័យចូលលួចឈូសបំផ្លាញព្រៃយកដីជាកម្មសិទ្ធិនាពេលកន្លងទៅថ្មីៗនេះ ។ ដោយគោរពតាមបទបញ្ជាដ៏ម៉ឺងម៉ាត់របស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នៅម៉ោង១១ថ្ងៃត្រង់ ថ្ងៃទី០៨ ខែមេសា ឆ្នាំ២០២៤នេះ លោក សាន់ យូ តំណាងឯកឧត្តម ស៊ុន សុវណ្ណារិទ្ធិ អភិបាលខេត្ត, ឯកឧត្តម ឯក ស៊ុនរស្មី ព្រះរាជអាជ្ញាអមសាលាដំបូងខេត្ត, មន្ទីរកសិកម្មខេត្ត, ខ័ណ្ឌរដ្ឋបាលព្រៃឈើកំពង់ឆ្នាំង, និងអាជ្ញាធរស្រុក បានចុះទៅពិនិត្យទីតាំងកើតហេតុភ្លាមៗ ក្រោយពីដឹងព័ត៌មានជាក់លាក់ពីប្រជាពលរដ្ឋក្នុងមូលដ្ឋាន។

 ក្រោយពីក្រុមការងារបានចុះទៅពិនិត្យទីតាំងកើតហេតុរួចមក លោក ពារ គឹមហេង នាយខ័ណ្ឌរដ្ឋបាលព្រៃឈើកំពង់ឆ្នាំងបានអោយដឹងថា៖ ព្រៃឈើនៅចំណុចកើតហេតុនោះ ជាគម្របព្រៃឈើឆ្នាំ២០០២ដែលការពារដោយអនុក្រឹត ត្រូវបានជនសង្ស័យឈូសឆាយបំផ្លាញយកអស់ប្រមាណជាង១ហិកតា ។ បន្ទាប់ពីពិនិត្យឃើញបែបនេះហើយ លោកបានធ្វើការស្រាវជ្រាវបន្ត និងប្រកាសអោយជនសង្ស័យចូលមកបំភ្លឺចំពោះមុខសមត្ថកិច្ចជាបន្ទាន់ មិនអោយលើសពី១ខែឡើយ ។ ប្រសិនបើលើសរយៈពេល១ខែមិនឃើញចូលខ្លួនមកបំភ្លឺទេ លោកនឹងដាក់ជនសង្ស័យទៅជា «អញត្តជន» តែម្តង។

 លោកស្រី ហែម គៀន មេឃុំជៀប ស្រុកទឹកផុស បានអោយដឹងថា៖ ដីនៅទីតាំងកើតហេតុនោះ ជាដីធ្វើស្រែរបស់ប្រជាជនក្នុងភូមិកោះខ្ទមកាលពីប៉ុន្មានឆ្នាំមុន ក្រោយមកត្រូវបានបោះបង់ចោល ហើយម្ចាស់ដីនោះបានបន្តលក់ទៅអោយគេផ្សេងទៀត ស្រាប់តែថ្មីៗនេះឈ្មោះ វ៉ែន ឈឿន ជាអ្នករស់នៅភូមិស្វាយចេក ឃុំចោងម៉ោង ស្រុកទឹកផុស ខេត្តកំពង់ឆ្នាំង បានយកត្រាក់ទ័រលួចចូលឈូសគម្របព្រៃឈើទាំងនោះដោយមិនបានសុំលោកស្រីជាមេឃុំ ឬមេភូមិនោះឡើយ។ កាលពីថ្ងៃទី០៣ ខែមេសា ឆ្នាំ២០២៤ នៅក្នុងកិច្ចប្រជុំមួយ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានហាមដាច់ខាតមិនអោយអាជ្ញាភូមិឃុំស្រុក ពាក់ព័ន្ធនឹងបទល្មើសឈូសបំផ្លាញព្រៃលិចទឹក គម្របព្រៃឈើ និងដែនជម្រកសត្វព្រៃនោះឡើយ។ 

 ទាក់ទងនឹងករណីខាងលើ ឯកឧត្តម ស៊ុន សុវណ្ណារិទ្ធិ ប្រធានគណៈបញ្ជាការឯកភាពរដ្ឋបាលខេត្តកំពង់ឆ្នាំងបានថ្លែងបញ្ជាក់ថា៖ ពាក់ព័ន្ធនឹងបទល្មើសខាងលើនេះ ឯកឧត្តមមិនអត់ឱនអោយជនសង្ស័យដែលប្រព្រឹត្តិទង្វើល្មើសនេះដាច់ខាត ឯកឧត្តមនឹងអោយមន្ទីរកសិកម្ម រុក្ខាប្រម៉ាញ់ និងនេសាទ ខ័ណ្ឌរដ្ឋបាលព្រៃឈើ រួមនិងអាជ្ញាធរភូមិឃុំស្រុកស្រាវជ្រាវអោយឃើញជនសង្ស័យ រួចបញ្ជូនទៅឯកឧត្តមព្រះរាជអាជ្ញាអមសាលាដំបូងខេត្ត ដើម្បីផ្តន្ទាទោសតាមច្បាប់៕ ដោយ ៖ កាំង ហុងវាស្នា